1 Corinthians 3

Tamanecna cabi dana eu Anutna cabi dana

Ija cotiel, wele age mel simwe Kraisca gabandoc biloloig. Eunu saen euna ija dana Kisca eundec Anutna je maadolig eu ija age Korin maadecwe qee. Euqa ija dana age dewenega hilahna kobol toodogina eundec maadigina eu odiwe ija wele maadolig. Age sab gagadicca ocnu saciadu qee bilelein. Eunu ija age su adolig, sab gagadicca qee adolig. Odocob qilaha age sab gagadicca ocnu saciadu qee bilegina. Ge, age fee dadanii cotoganu macumac megina eunu age qila gaid dewenega hilahna kobol toodogina. Age odi oodoig age dewenega hilahna kobol toodogina eu odi mahanadec dana odoginawe odogina. Ge, saen agenadec oso madena, “Ija Polna,” ena, odocob oso, “Ija Apolosna,” ena, kobol ina eu age dana mahanadec cinigwe bilegina.

Age eunu cisdu cuhadoiga. Apolos uqa eeta? Ija Pol, ija eeta? Ele Anutna cabi dana dih. Tibud uqa ele cabi filfil ilen, odocob elena cabi euna age Anutnu wawaga meleen. Ija sab aig cehem. Apolos uqa wa bilisadon. Euqa Anut uqa odocob sab wasen. Eunu dana sab aig cehenca, dana wa bilisadonca eu ale ijanalaca qee. Euqa Anut uqa odocob sab wasena eunu uqa dih ijanca. Ele dana Anutna cabi hihijag, ele Anutnu osobenca cabi owona. Odocob Anutna cabi eu age. Eunu dana sab aig cehenaca, dana wa bilisadonaca eu ale ihocihoc. Odocob ale filfil cabi osin eu odi ameg owasan.

Tamanecnu cabi dana eu uqa jo cehec dana

Odocob Anutna jo eu ageha.
10 Anut uqa uqana jo cehecnu duman uum iten. Eunu ija jo cehecnu memei danawe jo big gug mem. Odocob dana oso uqa eu tatacanna cehegina. Euqa Anut uqa big gug osol men nijia eu Jisas Krais. Eunu oso uqa big gug fil mecnu qee nijel. Eunu dana cunug leih age adi jo cehec cabi eu tatacan cehi cuhadoigale. 12 Aria, dana age big gug eu tatacanna cehoqagan saen euna leih age goldna cehoqagan, odocob leih age silwana cehoqagan, odocob leih age meen ameg ben fajec euna cehoqagan, odocob leih age na culutna cehoqagan, odocob leih age gigina cehoqagan, odocob leih age cinimna cehoqagan. 13 Odocob Anut uqa dana cajaca cunug agena cabi temdugiannu deel euna agena cabi eu jana gesiladigian. Ja eu agena cabi temadigian. Eunu dana cunug agena cabi eu hibna camasac migian. Odocob dana cajaca cunug agena cabi eu mefo, me qeefo ec foqagan. 14 Dana oso uqa big gug eu tatacanna jo cehen eu uqana cabi tawecebfi dana eu uqa ameg ugian. 15 Euqa oso uqa jo fil cehen eu jana cijecebfi uqa ameg qee oiaun. Anut uqa dana eu cahahadugian, euqa dana uqa ceteh janadec sigali onawe Anut uqa dana eu janadec sigali u cahahadugian.

Anutna cuha jo gun eu age

16 Anutna cuha jo eu age, odocob Anutna Kis age wawagana bilia ec qee doginafo? 17 Anutna cuha jo eu gun. Odocob Anutna cuha jo gun eu age. Eunu dana oso Anutna cuha jo fadaldocobfi Anut uqa dana eu fadaldugian.

Ege dana binanaga cain suluqaun

18 Anutna jaqec je eu odi madena:

“Anut uqa dana cisdoc silecca agena cisdoc sileccana cedadena eu odi dool bolobna cedadenawe,” ena.
(Job 5.13)

Odocob Anutna jaqec je oso madena:

“Tibud uqa dona, dana cisdoc silecca agena cisdoc eu ceteh gauc dih,” ena.
(Buk Song 94.11)

Eunu mahanadec cisdoc silecca eu Anut amegna eu kobol gad. Odocob Anut uqa dana cajaca age uqana cisdoc silecca oqagannu gale dona. Eunu dana oso uqadodoc cain uhuldoiaun. Age gemonadec oso uqa mahanadec kobolna ija cisdoc silecca ec cisdonafi uqa mahanadec dana amagana dana gad ibuldoiale.

21 Ceteh cunug eu Korin agena. Eu Polfo, Apolosfo, Pitafo, maha ifo, cebac bilecfo, cal mecfo, ceteh qila biliafo, ceteh hibna cali hugianfo ceteh cunug eu agena. Odocob age Krais uqana, odocob Krais uqa Anut uqana. Eunu oso uqa dana oso ijan cain suliaun.
(3.21-23)1 Korin 1.12naca, 3.4naca Pol uqa Korin tamanec age qatanadec bibileig oso madena, “Ija Pol toodugina,” ena, odocob oso madena, “Ija Apolos toodugina,” ena. Euqa je eundec eu dana mahana bilegina eu agena cisdoc toodona. Korin age Anutna cisdoc eu camasac fogo adecebfi age Anut uqa Polca, Apolosca, ceteh leihca eu Korin cesuladecebil age Krais agena bahic caloqagannu maden eu doqagan. Eunu age madoqagan, “Pol eu egena,” ecebil madoqagan, “Apolos eu egena,” oqagan. Age 1 Korin 3.1-9 eu feiga.


Copyright information for `AEY