1 Corinthians 5

Wal kobol eu Korin tamanec dunuh bilia

Ija je oso agenu dah mem eu odi. Wal kobol oso Korin tamanec dunuh bilia ec matein. Odocob eu wal kobol fil, eu haiden qee odogina. Eu dana oso uqa memegna caja on ec matein. Euqa age dana cunug wooladoqona ec cisdogina. Age eetanu agedodoc ijanaga sulegina? Age deboec eu culimeig qajeiga, eu me bahic. Odimeig dana uqa wal kobol i odona eu ititacdocobil uqa age gami tamanecna cain biliaun.

Ge eu mele, ija deweni eu agenu onoca bahic biligina qa ija doloni eu ageca bilia eu odiwe ija ageca biluquna. Ija dana wal kobol me qee i odon eu uqana je wele Jisas Tibud ijanna gesildom. Eunu age odi odoqagan. Age osoben ceguluqaganna ija doloni ageca bibileb age egena Tibud Jisas uqana gagadic odocna age dana i Tibudna ceseli hoc deelna uqa dolog eu Anut cahahadugiannu Seten ebenna mecebil uqa deweg me qee mudigian.

Korin tamanec age dana age kobol me qee odogina eu ititacadoqagan

Age agedodoc ijanaganu deboegina eu cois qee! Age jis nag bahic eu odocob bred cunug diena ec qee doginafo? Anut uqa age bred haun jisca qee cinigwe caloqagannu gale dona. Eunu age silailna jis weledec eu u qeleiga. Odocob age cunug cataniec caloqagan. Krais, uqa egena Pasowa ja qoc sipsip nag, dana age wele ihandoin. Eunu eu mele age qila cataniec bilegina ec ija dugina. Eunu ege egena Pasowa sab jec foqale. Euqa ege jis weledec, eu silailna kobol qisol mecca, toodu egena Pasowa sab jec cain foqaun qa ege bred jisca qee, eu cataniec kobol meleca, toodu egena Pasowa sab jec foqale.
(5.8)But 6-8 Pol uqa Bred Jisca Qee Jec Deel eunu cisdona. Sab jec eu Pasowa Sab Jec Ben Deel toodona. Pol uqa galolo je madena. Jis eu kobol me qee, eunu Kristen dana cajaca age kobol i cain toodu odowain. Ageha je Mak 14.1na nijia eu feiga.


Ija wele ijana jaqec jena age wal dana eundecca cain ihol mi cobowain ec jaqiadem. 10 Euqa age dana cunug maha inadec age wal kobolca, osona ceteh ocnu amaga qoc kobolca, heje oc kobolca, kadan tibudnu cuha fec kobolca odogina eu age gami cain ihol mi cobowain eunu qee jaqiadelem. Age odi odoubmiqa age maha i cunug culoub. 11 Euqa je ija jaqiadem uqana gug eu odi. Dana oso ija wawige meleec cotige ena eu uqa wal kobol odonafi, uqa osona ceteh ocnu ameg qonafi, uqa kadan tibudnu cuha fenafi, uqa dana agenu je um aqenafi, uqa ceu jeceb dalul qonafi, uqa heje onafi, age dana eundec gami cain ihol mi cobowain. Age dana eundec gami sabha cain jowain. 12 Anutna jaqec je odi madena:

“Age dana me qee age gemona bilegina eu ititacadeiga,” ena.
(Loo 17.7; 19.19; 21.21; 22.21, 24; 24.7)

Euqa dana age tamanec dunuh qee bilegina eu Anut gesiladigian. Eunu dana age tamanec dunuh qee bilegina eu gesiladecnu cabi eu ija ebenina qee nijel. Euqa dana age Korin agena tamanec dunuh bilegina eu gesiladecnu cabi eu Korin tamanec agena bahic.

Copyright information for `AEY