2 Corinthians 2

Ija age wawaga culumenca madifig inni age ija oditecebil ija wawi ceeligian? Eu age ija odadecemin wawaga me qee men. Eunu ija wawina ageca haun limig wawaga culumenca qee madigaun eu odi wele ija ageca limig wawaga culumenca mademwe eu me bahic ec madem. Eunu ija ageca qee lelem. Age dana cajaca ija oditecebil ija wawi ceelena. Odocob ija ageca lecemin wawi me qee migiannu qee gale tel. Gug eunu himec ija jaqiadec eu wele jaqiadimig sulduadem. Ija dugina, ceteh osonu ija ceeligina age cunugha ceteh eunu himec ceeloqagan. Eu mele, ija wele jaqiadem saen euna ija jaen qiqiten wawi qajen. Ija amulini nenen jaqiadem. Ija age wawaga culumenca madecnu qee jaqiadelem qa ija agenu nalunuga geh bahic migina eunu doqagannu jaqiadem.

Korin age dana cahuldona eu uqana silail dahiniga celigian

Dana eu uqa oso waug culumenca mudenfi uqa ija wawi culumenca qee mitel. Uqa age cunug wawaga culumenca maden. Euqa ija ceteh inu galac mec je madecwe qee madigaun. Eunu ija je nag madigen, uqa age leih wawaga culumenca maden. Mati age dana i tamanecnadec ititacdoin eu uqa ameg ihoc on. Qilaqa age falicdoqagannufi eu me bahic. Odimeig uqa waug me qee bahic mec eu cileh bahic doiaunnu age uqana silail dahiniga celeceb wahohogdoigale. Eunu ija niniadigina, age uqanu nalug megina ec eu madocobil doiale. Ge, jaqec je ija wele jaqiadem eu ija temadecnu dih jaqiadem. Age ijana je ceteh cunug eu gaid toodoginafo, qeefo ec dugennu odi odom. 10 Odocob age dana oso uqana silail dahiniga celecebfi ijaha uqana silail dahini celigian. Odocob dana oso uqa cahuldon eu ija uqana silail dahini celigian ec mele nijecebfi eunu ija Krais amegna age cesuladigennu dana i uqana silail dahini celigian. 11 Seten uqa ege uqana cisdoc kobolca eu wele doqona. Eunu cilehgigi woolgeiaunnu ija odi jaqiadem.

Pol uqa Taitas fecnu gale don

12 Euqa ija Troas ono Kraisnu me je qasali maadecnu calem euna Tibud uqa cabinu jic ono qaheceb fem. 13 Euqa ija wawi meleec coti Taitas ono wali fecwe qee. Eunu ija wawi ben bahic me qee men. Odocob ija Troas dana cajaca ono odio adimig ija hu Masedonia hatuna calem.

Anutna gagadic odocna aposel age han wooldogina

14 Qilaqa ija Anut hetaga dugina! Ge, Krais uqa na babalecna tibud me qee gagadic odocca agena gagadic odoc cagasi qee mudimei hannu wooladen. Krais hannu wooladen eunu Anut uqa ege uqana gihacdoc dana iwalgigi ehigina. Odocob Anut uqa ege odigeceb Kraisnu me je madocomun dana cajaca cunug Kraisnu dogina. Kraisnu doc eu dedeman tinca cinigwe anaana cunugna nuina.
(2.14)But ina leceb 7.4na Pol uqa galolo je odi maden. Uqa uqana jic cobocnu je eu 7.5na haun saen.
15 Ge, Krais uqa ihaneceb cijeceb dedeman tinca wasi Anutca tena eu ege. Dedeman tinca eu dana cajaca age fadalec jic tabag megina eu gemogemo nuina. Dana cajaca age fadalec jicna cobogina eu agenu dedeman i cal mec uqana dedeman cinigwe. Odocob dedeman eu agenu cal mec cali hugian. Odocob dedeman tinca eu dana cajaca Anut cahahaadena euha gemogemo nuina. Euqa dana cajaca Anut cahahaadena eu agenu dedeman i cebac bilec uqana dedeman cinigwe. Odocob dedeman eu agenu cebac bilec cali hugian. In uqa cabi i ocnu ihoc? 17 Ge, ege dana mati bahic cinigwe qee, mati age cocobi Anutna je madecnu cabiwe eu meen qaig ocnu cabi ibuldogina. Euqa ege cabi i Anutnadec om, ege Anutna sos. Ege dana wawige tutucca, Kraisca wawige osol mimi Anut amegna je i Anut igen eu tutuc qasali madoqona.

Copyright information for `AEY