2 Corinthians 8

Kristen cunug age Judia Kristen dana cajaca cesuladecnu meen qaig gabandoin

O cotigeil, Anut uqa tamanec Masedonia hatuna bilegina eeladec uum adimei cesuladen ec docnu gale gena. Culumen ben eu ageca caleceb age wawaga geh bahic temdon. Odocob age sawen bahic bilein qa agena ceelec eu am bec ihoc len. Odocob age Anutna dana cajaca Judia hatuna bilegina eunu cisdumeig dana eu age cesuladecnu meen qaig gabandoin. Ija camasac madigen, agedodoc agena gale adec toodumeig meen qaig i mein. Age ceteh adecnu ihoc eu age adein. Age i wooldumeig gehca haun adein. Age ege cois adocomun age Anutna dana cajaca qagoc eu dana leih gami osoben cesuladi cabi oqagannu gehca ninigein. Ege age meen qaig adoqagan ec casac cisdom qa agena odoc eu egena cisdoc wooldon. Age casac agedodoc Tibud utein. Odimeig age Anutna gale doc toodumeig age agedodoc egeha igein.

Wele Taitas uqa meen qaig gabandocnu cabi tulidocob calen. Eunu ege uqa cabi i uqa Korin gemo sanan men eu qee mudigiannu cesusdocomun uqa ceseli ageca len. Age ceteh cunug odi cuhadogina. Age Anutnu wawaga gagadic meleena, odocob age wawaga meleecnu je eunu cabi gagadic ogina, odocob age doc silecca bahic, odocob age Anutna cabi ocnu nalug megina, odocob age egenu nalunige gehca megina. Odocob eunu age qila age uum adecnu kobol iha u cuhadoqagannu cabi oigale.

Ija age toodu odocnu bahic loo je qee miadelem. Euqa Masedonia tamanec age meen qaig adecnu cabi me bahic oin eunu camasac maadem. Odimig Masedonia cabi oin euna ija Korin gesiladi figina, agena nalunuga mecnu kobol eu mele bahic ec figennu odigina. Ge, egena Tibud Jisas Krais uum igec igen eu age dogina. Uqa cehewan ben tumutumca biloloi, euqa uqa agenu ceteh cunug cuculi sawen dana ibuldon. Eunu uqa sawen dana bilec euna age cehewanagaca bilec adigiannu odi odon.

10 Qila ija meen qaig gabandocnu ijana cisdoc maadigen. Age cabi gel osona wele cabi i sanan mein, odocob age cabi i qee muduqagannu gauc dih qee odoloin qa age qee muduqagannu bahic gale aden. Eunu age qila cabi i qee muduqagan eu me bahic. 11 Aria, qila age gad odocobil qee meiale. Eu kobol me bahic. Age wele mahuc bahic cabi i oqagannu odoloig. Eunu age qila cabi i mahuc bahic qee mudoqagannu ha agena meen qaig ihocna adecnu odoiga. 12 Ge, dana uqa ceteh adecnu bahic gale dufei Anut uqa kobol inu gale ben bahic dona. Euqa dana uqa cetehca qee, uqa adecnu ihoc qee, Anut uqa dana eu qee gesildona.

13 Ija dana leih age culumenca qee bibilegin qa Korin age culumenca bilegina ec qee madigina. 14 Euqa qila saen ina age ceteh matica bilegina, odocob dana leih age cetehca qee bilegina. Eunu age dana cetehca qee eundec ceteh leih adecebil ihocihoc biluqagan eu kobol tutuc. Odocob dana cetehca qee eundec age hibna ceteh matica biluqagan, odocob Korin age cetehca qee biluqagan saen euna dana eundec age Korin cesuladecnu ihoc. Odocob kobol ina dana eundec age eu ageca ihocihoc biluqagan. 15 Eu odiwe Anutna jaqec je madena:

“Dana uqa sab geh cedi gabandon eu uqana hal gadac qee wooldol.
Odocob dana uqa sab geh qee cedi gabandon eu uqa sabnu qee gohic mel,” ena.
(Kisim Bek 16.18)

Pol uqa cabi hijagul age Korin meen qaig gabandocnu cesuladoqagannu suladen

16 Ege Anut hetaga doqona. Uqa Taitas tulidocob waug cajen. Odocob uqa ege cisdoqonawe odi cisdona. Uqa age cesuladecnu bahic gale dona. 17 Ge, ija uqa Korin nuegan ec cesusdudu madocomin ageca ligian. Eu himec qee, ija qee madoc uqa ija Korin ono nuigennu gale ben bahic tena ec maden. Eunu uqa uqana gale doc toodumei ageca lecnu odona. 18 Ege uqaca wawige meleec cotige oso osoben sulaloqona. Cotige eu uqa tamanec cunugnana me je qasali maadecnu binanca. 19 Eu himec qee. Tamanec cunug age cotige i uqa ege gami cocobi meen qaig gabandocnu cabi i cesulgigiannu nesili ehudein. Ege Tibud binan sulecnu cabi i oqona. Odocob ege cabi i ocnu gale ben gena eunu dana ihacadecnu cabi i oqona. 20 Ege bagol adec ben i tutuc cofdocnu odoqona eunu dana oso ceteh inu je me qee madecnufi qee gale geiaun. 21 Ge, ege kobol me eu odocnu cisdoqona. Ege Tibud amegna dih qee odoqona qa ege dana amagana ha odoqona.

22 Eunu ege wawige meleec cotige osoha aleca osoben suladoqona.
(8.22)Ege wawaga meleec cotola lecis Pol uqa Taitas gami suladen eu ijanala qee doqona.
Ege uqa saen matina temdom, odocob uqa cesuladecnu gagadic mena eu fom. Odocob qila uqa age cabi i oqagannu waug meleena eunu uqa cesuladecnu gagadic bahic mena.

23 Taitasnu, uqa ija age cesuladecnu cabi hijani, uqa ijaca cabi owona. Wawige meleec cotigeil lecis i ale sulaloqona, eu ale tamanec agena sos. Odocob ale alena cabina Krais binan sulesina. 24 Eunu age dana i kobol me odadoqagan. Odocob tamanecna dana cajaca cunug age eu fimeig agena nalunuga mecnu kobol du cuhadoqagan. Odocob ege dana i age Korin agena nalunuga mecnu kobol eu me bahic ec culai maadom, odocob tamanecna dana cajaca cunug age je eu gauc qee euna foqagan.

Copyright information for `AEY