Acts 7

Stiwen cegulec je maaden

1Odocob ihanec dana agena ilo uqa Stiwen sisildon, “Dana i age madegina eu melefo?” don.

2Stiwen jejeg hewi maaden, “Cotiel memeielca, ija je maadigina dah meiga! Wele ege memige Ebraham Mesopotemia bibilen Haran qee nuec Anut kobolkobolca ono uqaca camasac men. 3Odimei madon:

‘Hinana sihulca hinana mahaca culimeg maha ija ihachigenna nuuga,’ don.
(Jenesis 12.1)

4Eunu uqa Kaldia agena hatu culimei nui Haran hatuna bilen. Hibna Ebraham memeg cal meceb Anutna odudeceb hu hatu i qila age bileginana bilen. 5Anut odonqa uqa maha naha uqana bahic oso qee utel, maha mita osahic bahicha qee utel. Euqa Anut utigiannu je hahun maden. Anut uqa Ebraham melca qeeqa eu uqana bahicca uqana sihul hibna biluqagan eu ageca agena biligian ec je hahun maden. 6Anut uqa edi madon:

‘Hinana sihul age hatu filna cele dana biluqagan.
Ono age gahidoc cabi oqagan,
odocob age qisaadebil cabi ooig cabi gel 400 ono biluqagan.
7Euqa dana me qee madoqagan eu ija wadac me qee adigen.
Eu hedocob hibna age hatu eu culimeig hu ene bibileig ija binani suluqagan,’ don.
(Jenesis 15.13-14)

8Odocob Anut uqa Ebraham bal cehec jenu deweg cagu qoc kobol uten. Odocob Aisak cali hon. Deel 8-pela hedocob Ebraham uqa Aisak deweg cagu qon. Odocob Aisak hibna melah Jekob cali hon. Odocob hibna Jekob melahul 12-pela cali hoin. Dana 12-pela i age egena sihul gug 12-pela memigeil bahic,” aden.

9“Jekob melahul age waliniga Josefnu heel memeig age Isip hatu ono gihacdoc cabi ugiannu suldoin, euqa Anut uqaca bilen. 10Odimei uqana culumen cunugnu besiton. Saen Josef uqa Isip agena king amegna bilen Anut uqa duman meca, cisdoc meca uten. Odocob king hatu eu cofdoc biligiannu muden. Uqaha uqadodoc jo cofdoc biligiannu muden. 11Odocob saen euna Isip hatuca, Kenan hatuca ono sabnu cahel aqen. Odocob dana cajaca mel cunug wen bilein. Ege jajanigeil age sab ocnu cabi bahic. 12Odocob Jekob Isip hatu ono sabca ec dumei uqa melahul ege jajanigeil age casac suladeceb wele age qee lecna lein. 13Odocob age Isip ono li lecisdocobil Josef uqa waliniga ec maadeceb doin. Odocob Isip agena king uqa Josefna sihulnu dugia bili hon. 14Eunu Josef uqa memeg Jekobna je suldon. Odimei madon, ‘Sihunel cunug dana caja 75 cunugca age Isip ene hoqagan,’ don. 15Odocob Jekob Isip nuen. Ono uqaca uqa melahulca cal mein. 16Age Josef Jekobca dewenela ganac Sekem ono ehi nui Ebraham heel eu Hemo sihul agenadec qaig silwana fajen euna heel cisalein,” aden.

17“Saen Anut uqa Ebraham je hahun madon eu wele dodoldodon egena sihul ha Isip hatuna ono fulusdon. 18Saen euna king oso uqa Josefnu qee doc Isip ono calimei hatu eu cofdon. 19Uqa egena sihul uhuladimei uqa qisaadi maadeceb age agena mel sim basoloig eundec cal mecnu ehadi nui maha gemo culadoloig. 20Saen euna Moses uqa cali hon. Uqa mel galeca bahic, uqa jagel cijed memegna jobon bilen. 21Odocob saen uqa jobondec ehi nui fil mudein euna king ateg uqa umei melah bahic cinigwe cofdodon ben men. 22Uqa Isip agena kobol docca iwaldodogin ben men, eu uqana je madec odocca eu gagadic men,” aden.

23“Saen Moses uqana cabi gel 40 odi uqa cotugul Isrel eu ono li feciadigiannu cisdon. 24Ono nuimei uqa Isipdec dana oso Isreldec oso qoqon fimei eunu uqa li Isreldec wadacdocnu cesuldumei Isipdec qocob cal men. 25Uqa Isrel dana eu age Anut besiadigiannu cabi uten ec odi doqagan ec cisdon qa eu age odi qee cisdoloin. 26Deel osona uqa Isreldec dana lecis cacadesin mecialimei uqa cahacalimei tanawaligiannu odon. Odimei maalen, ‘Se, dana lecis ale Isreldec himec. Odi eetanu cadesina?’ alen. 27Euqa oso uqa cotig wadon eu Moses gesac sundumei madon:

‘In hina ege cofgecca gesilgecca mihen?’ don.
Uqa sisildon,
28‘Hina cum Isipdec qagadoganwe odi ijaha qagateganfo?’ don.
(Kisim Bek 2.14)

29Moses je eu dah mimei uqa Isipdec busali nui Midia mahana ono bilen. Ono uqa aideg mel manahal lecis basalen,” aden.

30“Cabi gel 40 hedocob Tibudna ensel na nag oso ja cijec belicanna tatawen fen, wadauna
(7.30)Age je Matju 3.1na nijia eu feiga.
Sainai aluh cemenug.
31Moses eu odi fimei tumatumaen. Odimei cisdudu fi cuhadugia eunu na nag eu cemenugca len. Euqa dodoldodon uqa Tibud jejeg dah men.

32‘Ija hina jajaninel agena Anut, ija Ebraham, Aisak, Jekobca agena Anut,’ en.
(Kisim Bek 3.6)

Odocob Moses qelelimei jejeg cali honna isec feciecnu culen.
33Odocob Tibud Moses madon:

‘Cudun hina tawaga eu maha gun.
Eunu hina jaim tacec eu huluga.
34Isip dana age ijana dana cajaca me qee odadegina eu ija figina.
Ija agena sogoec eu dah migina eunu ija besadigennu niga.
Qila, ija hina sulhecemin Isip hatuna nuegan,’ don,” aden.
(Kisim Bek 3.5, 7-8, 10)

35“Moses i Isrel dana age uqanu cuculeig sisildoin, ‘In hina ege cofgecca gesiligecca mihen?’ doin. Euqa Anut uqa ensel na nag oso ja cijec belicanna tatawen fen uqa ebenna besiadimei cofadigiannu suldon. 36Uqa Isrel dana Isipdec ehadi nuen. Uqa kobolkobol gagadic odocca Isip onoca macas golcana odon. Odocob cabi gel 40 leceb wadauna ha odon. 37Moses i uqa Isrel dana maaden:

‘Anut ija ageca sulteceb homwe eu odi uqa je hahun madec dana oso hibna age gemonadec ageca suldocob hugian,’ aden.
(Loo 18.15)

38Moses uqa Isrel tamanecca wadauna ono bilein, saen euna uqa ege jajanigeilca bibilegin ensel uqa Sainai aluhna ono je madon eu uqa cebac bilec je igecnu uten,” aden.

39“Euqa ege jajanigeil Mosesna je qee toodoloin. Uqa gesac sundodoig age haun Isip ceseloqagannu cisdoin. 40Eunu age Eron madoin:

‘Ege kadan tibud mudadigecem ege jic aqunigeiga.
Ege dana Moses egina uqa Isipdec ehigi ahon eu ana nuia qee doqona,’ doin.
(Kisim Bek 32.1)

41Eunu age uhulec kadan tibud eu bulmakau nag ihicon qu mudein. Uqa ihandoin. Odimeig sab ben cicileig uhulec kadan tibud agedodoc mudeinnu celeboein. 42Eunu Anut age hibemaden. Odimei Anutna je hahun madec dana agena jaqec jena taweia eu madenawe:

‘O Isrel dana caja! Age cabi gel 40 wadauna cocoboig dool aqimeig ihanoloig saen euna age ijanu ihantoloig ec cisdoginafo?
Age Molekna jo talahca Refan tibud uqana malaqa ihiconca gahialein.
Eu uhulec kadan tibud himec age eunu cuha foqagannu mudein.
Eunu ija age Babilon hibilohu isec suladecemin beli biluqagan,’ madenawe
(Amos 5.25-27)

odi Anut uqa malaqa sao ohis binan suluqagannu ahawaaden,” aden.
(7.43)Molek eu kadan tibud oso dana caja sihul fil age eunu cuha fein. Refan eu malaqa oso ageha eunu cuha fein. Je i Stiwen maden uqa je hahun madec dana, Amos, uqana buk 5.25-27nadec on. Amos uqa odi maden. Isrel wele bilein age Anutnu cuha fecnu bahic qee felein. Euqa age Anutna je hibemdumeig age sihul fil agena kadan tibudnu cuha fein. Hibna Anut uqa Isrel age uqa hibemdoin eu fen. Eunu uqa Babilon culadeceb age humeig Isrel han cadi cilehadimeig ehadecebil Isrel age beli Babilon hatuna gihacdocna bilein. Age 2 King 24.10-16 feiga.


44“Ege jajanigeil age wadauna bibileig talah jo eu Anut ageca bilen eu ihacaden. Anut Moses mudigiannu madon odi mudein, uqana hahun Moses fen eu odi mudein. 45Hibna ege jajanigeil talah jo memegail mudein eu gahidumeig Josua toodocobil belimeig maha hatu Anut dana eunadec cunug qee maden eu oqagannu belein. Odocob talah jo eu maha euna bibilen leceb Dewid king cali hon. 46Dewid uqa Anut amegna me bileceb Anut uqa Dewidnu gale don. Uqa Jekobna Anut sisildon, ‘Hina cois tecemfi ija jo hina bilegannu cehihigen,’ don. 47Euqa Solomon uqa jo eu cehiton,” aden.

48“Euqa Anut Ohis Bahic uqa jo dana ceheginana qee bilina. Ge, Anutna je hahun madec dana odi maden:

49‘Tibud madena, “Sao jobon eu ijana bilec bahim.
Odocob maha eu ija jaimi mec cabal.
Cel jo adec bahic ija cehitegan? Cel cudunna ija biligen?
50Ceteteh cunug i ija ebenina mudem,” ena,’ en,” aden.
(Aisaia 66.1-2)

51“Age Anutna je toodoc dana qee! Age wawaga eu haiden dana cinigwe! Age dahiniga me je dah mecwe qee! Age jajanagail Kis Gun cahacdoloigwe eu odi age ha Kis Gun gaidgaid cahacdogina. 52Age jajanagail Anutna je hahun madec dana cunug dewenega tuadein. Je hahun madec dana eu age madein, ‘Hibna Anut uqa uqana Dana Ititom Bahic egeca suldugian,’ ein eu age aqein. Odocob qila age Dana Ititom i age balijimeig qoin. 53Anutna ensel Mosesna loo je adein eu age oin. Euqa age qee toodoloin,” aden.

Age Stiwen meenna qocobil cal men

54Odocob cegulec dana je eu dah mimeig age gemanaga geh bahic beceb maimaga kicododoig gemanagaca mecidoin. 55Euqa Stiwen Kis Gun waugna am beceb sao jobon tatiimei Anutna kobolkobol fimei Jisas Memeg eben meulana isec tatawen fen. 56Odimei Stiwen maaden, “Feiga! Ija sao jobon cebec hudeceb Dana Melah Anut eben meulana isec tatawen figina!” aden.

57Uceldodoig cegulec dana ebenegana dahiniga cit qoin. Odimeig age cunug bahic gulu qahi cemenug lein. 58Hewi qelecebil taun ben hibiloh isec leceb meen heli qoin. Dana age Stiwenna je dah mein eu age agena lotoc dana haun oso, ijan Sol, jaihna olomdoin.
(7.58)Isrel agena loo je eu odi maden, “Dana oso uqa kobol me qee bahic oso odocobfi age ehudi taun ben hibiloh isec limeig ono meen heli qocobil cal migian,” en. Age Wok Pris 24.13-16ca, Namba 15.35ca feiga.
59Meenna odi ququ ninijegin Stiwen uqa Tibud inondudu madon, “Jisas Tibud ija doloni oga!” don. 60Uqa mahana gob cehimei gehca utai madon, “Tibud! Hina i agena silail inu dahin celeiale!” don. Uqa eu odi dih mamadi ha cal men.

Copyright information for `AEY