Hebrews 12

Ege Jisas fimeb uqanu wawige meleigian

Eunu ege adi? Dana cajaca wele bahic eu age tawimeig taen ben cinigwe talilgec bilegina. Odimeig wawige meleec kobol iwalgegina. Eunu ege ceteh culumenca eundecca silail mec ege faggena eu culecnu. Odimeb ege wawige gagadic mumudi jic ege nuecnu Anut ihacgen eu gagadic guguluqale. Ege amige eu meciocomun Jisasca nuigian. Uqa egena wawige meleec gug odocob hibna uqa egena wawige meleec odocob ihoc ligian. Wele Jisas uqa ceelec hibna ugiannu waug ninijen gagadic bilen. Odimei culumen gahidumei na babalecna cal men. Uqa na babalecna ono majag hewudein eu ceteh gauc bahic ec cisdon. Qila uqa Anutna bilec cabal meulana isec bilina.

Ege tutuc mecnu Anut culumen igina

Age cain alal adeiaunnu, odocob age wawaga cain guleleiaunnu age Jisasnu cisdu cuhadoigale. Silail dana wele age Jisasca cad me qee bahic bilein. Euqa uqa gagadic bahic bilen. Age silail cilehdocnu han cadein qa han eunu age golanaga qee basecdoloin. Acahna age wawaga gagadic mudecnu Tibud maaden eu wele dahiniga celen? Eu age uqana mel ec madimei maden:

“Ijana mel, Tibud uqa hina tutuc mihec kobol oso odifei eu gauc himec ec cain cisdogaun.
Uqa tutuc mihec culumen ihifei eu hina wawin cain me qee meiaun.
Ge hina dogona, Tibud uqa dana oso nalug menafi eu uqa uqana kobol tutuc mudina.
Odimei uqa dana oso ehudimei uqa melah ec madifei eu uqaha qisadona,” en.
(Sindaun 3.11-12)

Age gagadic tatawi Anut culdecebil tutuc madeia. Anut uqa melahul kobol odadena eu odiha age odadena. Cel mel oso uqa memeg qee eeldona? Oso qee bilel. Mel memega cunug age agena mel eeladegina. Memega qee eeladenafi eu age uqana mel bahic qee. Age eu odi eu mel memegca qee cinigwe. Age eunu cisdogina. Memige mahanadec eu age eelgein. Odocob binanaga suluquna. Eunu me bahic ege kis agena Memeg bisalu bibili cebac bilec eu ocnu. 10 Ege memige mahanadec eu age egena kobol saen nag odi himec tutuc migein, agena gale adecna. Euqa Anut uqa ege cesulgigiannu bahic tutuc migina, odocob ege uqana kobol gun eu oqannu. 11 Memige uqa ege tutuc migec culumen igina qila saen euna ege ceelecca qee biluquna. Ege wawige eu culumen dona. Euqa tutuc migimei ege ititom kobol himec odocomunfi wawige malol biligian.

Ege hihibanige teceb gagadic tawoqale

12 Eunu age ebenega gagadicca qee gauc caculi tawecebfi gagadic mi suli umeig cabi oiga. Odocob age jaimaga gobca laleg mecebfi age gagadic taweiga. 13 Odocob jaimaga oso eu me qeefi gob ameg eu cunug qee casali hoiaunnu

“age jaimagana bahic jic tutuc coboiga,” en.
(Sindaun 4.26)

Qee bahic! Eu haun me migian.

14 Age dana cunugca ege gami wawige malol bilecnu cabi gagadic oiga. Odimeig kobol gun euna bilecnu cabi gagadic oiga. Dana oso uqa kobol gun qee toodona uqa Tibud qee feiaun. 15 Age cofdu cuhadoiga. Qee fifi dana cotoga oso culdecebil toni qocob Anutna eelgec uum igec eu culiaunnu. Qee fifi dana cotoga oso culdecebil age gemona aig gulihinca gisinawe caleiaunnu, odimei gulihin aadi Anut amegna gegehinca madeiaunnu. 16 Qee fifi dana oso wal kobol toodoiaunnu. Qee fifi dana oso Anut hibemdoiaun eu odiwe wele Iso odon. Uqa sab fajecna saen osol himec euna matu bilec eeldoc cunug helen. 17 Age dogina, hibna uqa eeldoc eu muguh ugia odon qa Anut qeeo ec maden. Iso uqa eeldoc oubnu geh bahic qajen qa uqa haun waug falicdocnu jicca qee.

Ege wele Saion Aluh Me Bahicna calom

18 Age qila ceteh oso amaga fecnu ihoc, ebenega tebandocnu ihoc cemenug qee li bilelein, odiwe Isrel dana cajaca age wele Sainai Aluhna calein. Sainai Aluh euna ja ben cijein, odocob tu gagatuc qam qu nijen, odocob fufu gagadicca, 19 taul eu ecca jejeg oso je madecca, dana cajaca jejeg je mamaden dah mein. Odimeig cucuii Moses madoin, “Ege haun dah maga qee geldoin,” doin. 20 Eetanu odi madoin? Eu age Anut je aden eunu cucui bahic ein. Uqa maden:

“Dana oso uqa eben mimei aluh i heheweb fifeig meenna qoiga cal meia.
Odocob bulmakau sipsipca ha odi himec,” en.
(Kisim Bek 19.12-13)

21 Eu age ceteh fein eunu cucui bahic ein. Eunu Mosesha maden:

“Ija cucuiimig qeleli cahuldom,” en.
(Loo 9.19)

22 Age ceteh eundecna oso qee calelein. Age Saion Aluhna wele calein. Odocob Cebac Bilec Anut uqana taun benna calein. Eu Jerusalem sao jobon ono. Age ensel mati bahic amam ceguli ceeli bilecna wele calein. 23 Age Anut melahul matu agena cegulecna wele calein.
(12.23)Jisas uqa Anut melah matu bahic. (Age Hibru 1.6 feiga.) Euqa dana uqa Hibru jaqec je jaqen eu Anut uqa ceteteh me bahic uqa melahul ategulca adena eunu je geh madena. (Age 6.12ca, 9.15ca feiga.) Juda age agena kobolna mel matu himec uqa memegna ceteh cunug on. (Age 12.16 feiga.) Uqa ceteh me bahic cunug Anut uqa uqana dana cajaca adecnu gale dona eunu cisdumei uqa age “Anut melahul matu” en eu odi fena.
Anut uqa ijanaga wele jaqen, jaqec je eu sao jobon ono bilina. Odocob gesiligec dana uqa bilia uqa dana cajaca cunug agena Anut eu age hu cemenug taweiga. Dana cajaca agena kis wele Anut uqa dana cajaca ititom ec maaden eu ageha ono bileiga.
24 Odocob Jisas uqa bal cehec je haunna nawel tawec dana uqaca calein. Uqa golac wele age bilisadu joaden, bal cehec je haun eu gagadic mudecnu. Odocob golac eu je oso maden eu wele Ebel golac odon eu caca qee. Uqa Ebel golac wooldumei je me bahic eu geh bahic maden.

Ege cofdu cuhadoqale

25 Age fi cuhadoiga. Dana madena eu jejeg filedocnu dahiniga cain afa qoiaun. Wele bahic Anut uqa maha ina dana cajaca je gagadic maaden qa eu age jejeg qee toodoloin. Eunu wele saen euna age busalimeig agena silail ameg me qee wadac ocnu qee wooldoloig. Odocob qila Anut uqa sao jobon bibili je gagadic magena. Ege uqa hibemdufeb busalimeb silail ameg ihoc wooldocnufo? Qee bahic! 26 Wele Anut jejeg caleceb maha mim nen. Euqa qila ege wele magen:

“Maha i saen osol himec haun odocomin mim nigian.
Maha himecha qee.
Maha saoca osoben mim nigian,” gen.
(Hagai 2.6)

27 Je i “Saen osol himec haun,” eu odi ihacgena. Ceteteh wele Anut mudaden odimei gesac maden eu fadaladeceb qee moqagan. Odocob ceteteh qee gesac madel eu qee fadalowain. Age gaid biluqagan.

28 Anutna cul ege om i dana oso fadalecwe qee. Eunu ege eu odinu Anut hegaga docnu. Odimeb uqa binan susuli uqana cabi uqa gale dona odi cabi ocnu. Ege uqa binan susuli uqanu cucuiecnu. Ge, mele bahic:

“egena Anut eu ja ben ceteteh cunug cijinawe,” en.
29 (Loo 4.24)

Copyright information for `AEY