Hebrews 8

Jisas uqa nawel tawec ihanec dana ilo sao jobon bilina

Aria, je ilo ina ege madoqona eu odi. Egena nawel tawec ihanec dana ilo eundec uqa Anut King Ben uqana bilec cabal meulana isec sao jobon bilina. Uqa nawel tawec ihanec dana ilona cabi tempelna hamol gun bahicna ono cabi eu ona. Talah jo eu sao jobon bilia, eu mele bahic. Dana oso uqa talah jo eu qee cehel. Eu Tibud uqadodoc cehen.

Anut uqa nawel tawec ihanec dana ilo cunug age Anut loo uuteig ihanec gug filfil mecnu nesili ehadena. Eunu egena nawel tawec ihanec dana ilo uqaha ihanecnu ceteh osoca bilia. Euqa nawel tawec ihanec cabi dana wele mahana cabi ogina, odimeig Mosesna loo je toododoig loo gug filfilna Anut ihandogina. Eunu egena nawel tawec ihanec dana uqa mahana bilecebfi uqa nawel tawec ihanec dana qee bilina. Age cuha jo gun euna nawel tawec ihanec cabi ogina eu sao jobon uqana cuha jo gun bahic eu uqana ihicon qoc. Ge, saen Moses uqa cuha talah jo cehigia oodon Anut uqa Moses odi madon:

“Hina cofdu cuhadoga.
Hina ceteteh cunug gaga aluhna ihachem eu odi bahic mudegan,” don.
(Kisim Bek 25.40)

Qilaqa Anut uqa Krais nawel tawec ihanec cabi uten. Odimei Anut uqa bal cehec je i mele je madeceb dana cajaca age ceteteh me bahic cedoqagan. Eunu Kraisna cabi eu nawel tawec ihanec dana cunug wooladec. Eu odiwe bal cehec je uqa Anutca uqana dana cajaca gemo muden eu bal cehec je weledec wooldona.

Bal cehec je haun eu bal cehec je weledec wooldon

Bal cehec je weledec eu cahuldocca qeemi Anut uqa bal cehec je haun qee madoub. Euqa Anut uqa dana cajaca agena cahuldoc eu camasac mudimei maden:

“Tibud maden, ‘Hibna deel oso dodoldona saen euna ija bal cehec je haun ijaca Isrel Juda dana cajaca ageca gemo mudigen.
Bal cehec je haun eu ija wele ijaca jajanagailca gemo mudem eu odi qee, saen wele ija age ebenega hewimig Isip hatu culdi ehadi nuem euna.
Euqa age ijana bal cehec je qee hewelein, odimeig qee toodoloin.
Eunu ija hibemadem,’ Tibud odi maden.
10 Odocob Tibud tubdu maden, ‘Saen i hedocob ija bal cehec je haun ijaca Isrel sihul ageca gemo eu odi mudigen.
Ijana loo je eu cunug agena cisdocna miadigen.
Odocob wawaganaha loo je jaqiadigen.
Odimig ija agena Anut biligen, odocob age ijana dana cajaca odi biluqagan.
11 Odocob dana osolosol cunug ageca jobon osol cotogailca odi iwaladecnu cabica qee.
Age cotogail oso qee madowain, “Hina Tibudnu doga,” qee dowain.
Saen euna dana cajaca cunug age ijanu doqagan,
dana cajaca mecaca sim calcalca cunug ijanu du cuhadoqagan.
12 Ija agenu wawi lal qocca eunu agena cahuldoc eu cagasiadigen.
Odocob agena silailha eunu ija haun qee cisdugaun,’ Tibud eu odi maden,” en.
(Jeremaia 31.31-34)

13 Anut uqa bal cehec je haunnu madeceb uqa bal cehec je weledec eu hilah ibuldon. Ceteh hilah ibuldona eu uqa cabi ocnu qee mena, saen nag odi himec gieceb qee migian.

Copyright information for `AEY