John 16

1“Je eu age agena wawaga meleec eu cain culuwainnu ija maadem. 2Juda dana age egena cuha jona qee biluwain imeig ititacadi agena gel hibilohu isec madoqagan. Mele, saen oso hugian, saen euna dana age aqegina eundec ege eu odocna Anutna cabi oqona ec cisdoqagan. 3Age Memige Anutnu wawaga qee fogo dol, ijanu ha age wawaga qee fogo dol eunu odi odadoqagan. 4Euqa age ceteh isi cali hocob ija wele maadem, eunu dahiniga cisdoqagannu ija ceteh eu qee hoc ninijen iina maadem,” aden.

Jisas uqa Kis Gunna cabinu maaden

Jisas je haun maaden, “Ija ageca bilomnu ija je eu age sanan mecna qee maadelem.
5Qilaqa ija sulten uqaca nuigina, euqa age oso ana nuuguna? ec qee sisiltena. 6Qee, ija je i maademnu age dumanaga culec bilegina. 7Ija maadigaqa ija mele je maadigina, ija qee nueceminfi Tutuanaga Oc ageca qee hoiaun. Ijaqa ono nuifig suldocomin ageca hugian. Eunu ija nuigina eu age me madecnu nijia. 8Odocob uqa humei uqa mahanadec eundec amaga hulelduadigian. Odocob age silailnuca ititom cobocnuca Anutna gesiladecnuca ulauladigian. 9Age ijanu wawaga qee meleena eunu silailnu ulauladigian. 10Ija Memige Anutca tigina, age ija haun qee mecituwain eunu ititom cobocnu ulauladigian.
(16.10)Dana mahanadec age Jisas geuldimeig age uqa ititom kobol qee odel eunu uqa cal migian ec madein. Euqa Anut uqa odudeceb uqa cal mecnadec ceseli cajeceb ehudeceb Jisas uqa Anutca bilen. Odon euna Anut uqa dana cajaca cunug Jisas ititom kobol himec odon eunu ihacadena.
11Maha i uqana dana ben eu dewegnu Anut wele gesildon eunu Anutna gesiladecnu ulauladigian,” aden.
(16.11)Dana mahanadec cunug age Jisas cal men eu fimeig age Anut uqa geulden ec cisdoin. Euqa Jisas uqa Anut amegna qee geuldec bilina. Anut uqa Jisas cal menna Seten geuldimei uqana gagadic odoc eu cilehdon.


12“Ija age je matica maadecnu nijia qa age qila gahidocwe qee. 13Euqa mele jenu meleecnu Kis eu humei uqadodocnadec je qee maadeiaun qa uqa dah mena eu maadigian. Odimei ceteh hibna caligian euha maadigian. Eunu uqa mele je cunug doqagannu dado madigian. 14Uqa je ijana nijia eu umei age maadigian. Eunu uqa ija binani suli ugian. 15Cunug eu Memige Anutna nijia eu ijana nijia. Eunu uqa je ijana nijia eu umei age maadigian ec maadiga,” aden.

Qila waloc saen caleceb isi waug ceelec saen caligian

16Jisas je haun maaden, “Saen nag odi gieceb age ija qee mecituwain. Odocob eu haun nag odi gieceb age ija haun mecituqagan,” aden. 17Odocob uqana malogom leih age togodudu madein, “Uqa madena, ‘Saen nag odi gieceb age ija qee mecituwain. Odocob eu haun nag odi gieceb age ija haun mecituqagan,’ ena, ‘Ija Memige Anutca tiginanu,’ ena eu cel je madena?” ein. 18Age madein, “Uqa madena, ‘Saen nag odi gieceb’ ena eu uqana gug ege qee doqona,” ein.

19Odocobil Jisas uqa age, age uqa sisildocnu cisdodogin feciadimei eunu uqa maaden, “Ija maadiga, ‘Saen nag odi gieceb age ija qee mecituwain. Odocob eu haun nag odi gieceb age ija haun mecituqagan,’ adiga. Age je eu cisdudu togodoginafo? 20Ija je mele maadigina, age qada u qajoqagan, mahanadec ageqa ceeli biluqagan. Age dumanaga culigian. Euqa age dumanaga culec eu ceeli bilec ibuldugian. 21Saen caja mel basigiannu deel cali hocob uqa culumen dodon bilina. Euqa mel basimei uqa mel on eunu waug ceelenanu uqa culumen doc eu dahig celena. 22Ageha odi qila culumen adec bilegina. Ijaqa haun ceseli meciadigen. Odocob age wawaga ceeligian. Agena ceeli bilec eu oso qee cawaladeiaun. 23Deel euna age sisiltec je oso qee matowain. Ija je mele maadigina, age Memige Anut ceteh osonu inondocobilfi uqa eu ija ijanina adigian. 24Age lili saen qila bilegina ija ijanina Memige ceteh osonu qee inondoloin. Age agena ceeli bilec ihoc ligiannu inondocobil eu adeceb oigale,” aden.

Jisas uqa mahanadec gagadic odoc wooldon

25Jisas je haun maaden, “Ija je i age galolo jena maadem. Saen oso hugian saen euna ija galolo jena qee maadigaun. Euqa saen euna ija age Memige Anutnu je camasacna maadigen. 26Deel euna age ija ijanina Memige Anut je inondoqagan. Age ija naluni meginanuca, age uqa ija Anutnadec hom eunu wawaga meleena euca eunu Memige Anut uqadodoc age nalunuga mena. Eunu ija agenu mimig Memige Anut je inondugen eu qee maadigina. 28Ija Memige Anutnadec humig mahana nem. Qila ija maha qisacdumig Memige Anutca ceseli tigina,” aden.

29Odocob malogom age Jisas madoin, “Faga, qila hina camasac madagana, hina galolo jena qee madelem! 30Ege qila hina ceteh cunug dogona, oso sisilhecnu hina age adi cisdogina docnu qee nijel eu ege doqona. Eunu hina Anutnadec hom eu ege wawige meleena,” doin.

31Odocobil Jisas uqa maaden, “Age qila wawaga meleenafo? 32Feiga, saen hugian, mele saen eu wele bilina, saen euna age cunug ija cuhanuc tawigennu qisacti agena gunna budu beladoqagan. Euqa Memige Anut uqa ijaca tawowona, eunu ija cuhanuc qee tawigina. 33Ija je i age ija dunuhna bibili malolca biluqagannu maadem. Age mahana bilecnana wawaga sogoecca biluqagan. Euqa ija maha wooldom eunu age wawaga toogdoiale,” aden.

Copyright information for `AEY