John 18

Judas uqa Jisas uqana cad ebenegana muden

(Matju 26.47-56; Mak 14.43-50; Luk 22.47-53)

1Jisas uqa inondoc i madi hedumei uqa uqana malogom gami Kidron uqana wa sasac leti belein. Cudun euna cabi oso nijen. Odocob Jisas uqana malogom gami dunuh euna lein. 2Saen mati Jisas uqana malogom gami ono gulucdadanoloig. Eunu Judas uqa Jisas uqana cad ebenegana men eu cabi eu ana isec don. 3Eunu Judas uqa Rom agena han dana leih cedadi tempel cebec cofdoc dana leih eu ihanec dana benben Farisica age suladecebil uqa age cedadimei cabi euna ehadi len. Age cejal gowocca hannu cetetehca hewechewec lein. Age cabi duhuh lein. 4Jisas uqa ceteh cunug uqaca caligian eu dumei uqa cemenega limei sisiladen, “Age in wali cobogina?” aden.

5Odocob age jejeg hewi madoin, “Ege Jisas Nasaretdec waloqona,” doin. Odocob Jisas maaden, “Ija uqa,” aden. Judas uqa Jisas uqana cad ebenegana men uqa ono age gami tawein. 6Odocob Jisas maaden, “Ija uqa,” aden saen euna age bicbic limeig mahana toni aqen.

7Odocobil Jisas uqa haun sisiladen, “Age in wali cobogina?” aden. Odocob age madoin, “Ege Jisas Nasaretdec waloqona,” doin. 8Odocobil Jisas maaden, “Ija wele maadi ija uqa adiga. Age ija waliteginafi dana i age ijaca tawoqa age culadecebil beleiga,” aden. 9Jisas uqa je oso wele maden:

“O Mei, age hina item eundec oso qee fadalel,” en
(Jon 6.39)

je eu ihoc ligiannu uqa je odi maden.

10Odocob Saimon Pita uqa han siginca uqa uqana cudunnadec umei uqa ihanec dana ilo uqana cabi dana qelimei dahig meula isec qeli caguton. Cabi dana eu ijan Malkas. 11Odocob Jisas uqa Pita madon, “Hina han sigin uqana cudunna tacaga! Hina wa gab i Memige Anut ija iten eu qee jigaun ec cisdogonafo?” don.

Age Jisas Anasca ehudi lein

12Odocob Rom agena han danaca, agena iloca, Juda agena jic cebec cofdoc danaca age Jisas hewi eben libein. 13Odimeig age casac Anasna gunna ehudi li mudein. Ge, Anas uqa Kaiafas tanaig. Kaiafas uqa cabi gel euna ihanec dana agena ilo bilen. 14Kaiafas uqa wele Juda dana maaden, “Dana osol uqa dana cajaca cunug uqa age hehuladi cal migian eu cois,” aden.

Pita uqa Jisasnu qee sasac qon

(Matju 26.69-70; Mak 14.66-68; Luk 22.55-57)

15Odocob Saimon Pita uqa malogom osoca ale Jisas toodu cobosin. Malogom oso eu uqa ihanec dana agena ilo eu uqanu du cuhadon. Eunu uqa Jisasca ihanec dana agena ilo uqana gel duhuh lesin. 16Ale lelesin Pita uqa jic cebec maha gumu isec tawen. Eunu malogom oso ihanec dana agena ilo uqa uqanu du cuhadon eu uqa ceseli calimei jic cebec cofdoc caja Pitanu madon. Odocob uqa Pita ehudi dunuh len. 17Ale lelesin jic cebec cofdoc caja eu uqa Pita madon, “Hinaha dana eu uqana malogom osofa?” don. Odocob Pita uqa jejeg hewi madon, “Qeeo, ija uqana malogom oso qee,” don. 18Eu duan saenna. Eunu cabi dana jic cebec cofdoc danaca age ja hudein. Age dewenega ja walac aaden talildu tawein. Pita uqaha euna limei age gami uqa deweg ja walac dodon tawein.

Ihanec dana agena ben uqa Jisas gesildon

(Matju 26.59-66; Mak 14.55-64; Luk 22.66-71)

19Odocob ihanec dana agena ilo uqa Jisas uqana malogomnuca, uqana je uqa dana iwaladennuca eunu sisildon. 20Odocob Jisas madon, “Ija dana cunug amagana je maadolig. Ija cuha jonanaca tempelnaca Juda dana cunug cegulegina euna iwaladolig. Ija jahunecna je oso qee madelem. 21Hina eetanu sisiltagana? Dana ija maadecemin doin eundec sisiladi fagale. Eeta ademnu sisiladaga, age dogina,” don.

22Jisas uqa odi madocob jic cebec cofdoc dana eu agenadec oso cemenug tatawei uqa siho qahimei madon, “Se, hina eetanu ihanec dana ilo je eu odi madoga?” don. 23Odocob Jisas madon, “Ija maduga eu me qeefi qasali madaga duga. Euqa ija tutuc madugafi eetanu qitiga?” don.

24Odocob Anas uqa Jisas libein eu odi tatawen suldocob ihanec dana agena ilo Kaiafasca len.

Pita uqa haun Jisasnu qee sasac qon

(Matju 26.71-75; Mak 14.69-72; Luk 22.58-62)

25Pita uqa ono ja walac dodon tawen. Odocob age madoin, “Hinaha dana eu uqana malogom osofa?” doin. Euqa Pita qee sasac qu maaden, “Qeeo, ija qee,” aden.

26Odocob ihanec dana agena ilo uqana cabi dana oso, dana Pita uqa dahig caguton eu uqa waliag oso, uqa Pita sisildu madon, “Ija hina uqaca cabina tatawesin qee fecihelemfo?” don. 27Odocob Pita haun qee sasac qu madon, “Qeeo,” don. Odocob saen euna dih mala qon.

Jisas uqa Pailat amegna tawen

28Odocob qasil bahic age Jisas ehudimeig Kaiafasna gunnadec jo gabman dana ben bilia euna lein. Juda age ege gabman jo locomun Juda dana qee agena gegehin dewenige qageceb Pasowa sab jecwe qee imeig age jona qee telein.
(18.28)Gabman ilo dana Pailatca, uqana eundecca age Rom dana. Age Juda age Anut amegna cataniec bilecnu kobol qee toodu odoloin. Eunu Juda age Rom dana gami bilimeig age Anut amegna gegehinca calowainnu age gabman agena jona qee telein.
29Eunu Pailat uqadodoc maha gumu cali numei sisiladi maaden, “Age dana i dewegnu adi um qogina eu madeiga duga,” aden. 30Odocob age jejeg hewi madoin, “Uqa qisol mec kobol qee odoubmiqa ege hina ebenna qee moum,” doin.

31Odocobil Pailat maaden, “Cois, age dana eu ehudi belimeig agedodoc agena loo jena gesildu feiga,” aden. Odocob Juda age madoin, “Dana oso qocnu eu ege ebenigena qee nijel,” doin.
(18.31-32)Rom age Juda agena hatu cofdoin. Odocob Juda age agena gesilec jona je tutuc mudecnu eu cois nijen. Euqa Rom age Juda agena gesilec jona dana oso qocobil cal migiannu je madecnu eu cahacadein. Na babalecna tuitu qocobil cal mecnu kobol eu Rom agena kobol himec.
(Jisas wele uqa adi cal migiannu je maden eu ihoc ligian odon.)

33Odocob Pailat ceseli uqana jona timei Jisas utadocob ten. Uqa sisildon, “Hina Juda agena Kingfo?” don. 34Odocob Jisas jejeg hewi madon, “Sisilec je i hinana cisdocfo, qee leih age ijanu maheinfo?” don. 35Odocob Pailat madon, “Hina ija Juda ec cisdogonafo? Agena sihulca ihanec dana benbenca age ija ebenina miheiga. Hina cel kobol oso odom?” don.

36Odocob Jisas jejeg hewi madon, “Ijana cul eu maha inadec qee. Ijana cul maha ina nijoubmiqa ijana tootec age ija Juda ebenegana qee mituwainnu han cadoub. Ijana culqa maha inadec qee!” don. 37Odocob Pailat uqa sisildon, “Eu odifiqa hina king osofo?” don. Odocob Jisas jejeg hewi madon, “Hina ija king ec madagana. Gug inu ija basiten, gug inu ija maha ina nem. Ija mele je eu himec qasali maadigennu hom. Mele je madec dana abesabes ija dah mitegina,” don. 38Odocob Pailat madon, “Mele je eu eeta?” don.

Pailat uqa age Jisas na babalecna tuitu qoqagan ec maaden

(Matju 27.15-31; Mak 15.6-20; Luk 23.13-25)

Pailat uqa odi madi hedumei Juda dana age maha gumu tatawegin ageca cali limei maaden, “Ija uqa cahuldoc oso qee felem.
39Euqa agena kobol oso nijia eu ija Pasowa sab jec saenna gihacdoc dana oso gaid besituadiginanu. Ija Juda agena King besituadigenfo?” aden. 40Odocob age utai madoin, “Qee, dana i qee! Hina Barabas besitugaga!” doin. (Barabas uqa heje dana eu uqa dana leih aqeceb cal mein.)
(18.40)Doc dana mati age Barabas eu dana age Rom Judia hatunadec ititacadecnu gale aden eundec oso ec cisdogina.


Copyright information for `AEY