Luke 20

Age Jisas uqana cabi ocnu gadac eu in uten ec sisildoin

(Matju 21.23-27; Mak 11.27-33)

Odocob deel osona saen Jisas uqa tempelna iwalaadi me je maaaden ihanec dana benbenca, loo je iwaladecca, Juda agena matuca age uqaca humeig sisildoin, “Magaga, in ijanna hina eu odogona? In cabi eu ocnu maheceb odogona?” doin.

Odocob Jisas jejenega hewi maaden, “Ija age casac je oso sisiladigen. Mateiga, Jonna wa joadec eu sao jobondecfo, qee danadecfo?” aden.

Odocob age agedodoc togodudu madein, “Ege madoqaqa wa joadec eu sao jobondec doqaqa uqa ege eetanu uqanu wawaga mele qee el? gigian. Ege madoqaqa wa joadec eu dananadec doqaqa eu dana cajaca eu age cunug Jonnu uqa je hahun madec dana ec wawaga ben bahic meleena. Eunu age meen qeli qigecebil cal meqan,” ein. Eunu age jejeg hewi madoin, “Jonna wa joadec eu anadec ege qee doqona,” doin.

Odocob Jisas maaden, “Eunu ija ageha in ijanna ceteh i odigina eu qee maadigaun,” aden.

Cabi dana wain cabi cofdocnu galolo je

(Matju 21.33-46; Mak 12.1-12)

Odimei Jisas galolo je i dana cajaca maaden, “Dana oso wain cabi cehen. Dana leih age uqana wain cabi cofdocnu ebenegana meceb meen qaig mumudegin uqa jobon cuculi nui saen cecelacca bahic bilen. 10 Wain aig wal meceb cedec saen cali hocob wain cabi gug uqa cabi dana oso suldudu madon, ‘Hina nuimeg wain cabi oc eundec maadecem age wain aig leih eu ihecebil cedi ahutagale,’ don. Euqa dana age wain cabi cofdoin eu age cabi dana qumeig wain aig ameg oso qee utec suldocobil ceselen. 11 Odocob wain cabi gug uqa haun cabi dana oso suldocob nuen. Euqa wain cabi cofdoin age cabi dana euha qumeig me qee mudimeig suldocobil gauc ceselen. 12 Odocob wain cabi gug uqa cabi dana cijeddoc eu suldocob nuen qa dana eu age uqaha qetudein. Odimeig wain cabinadec heludecebil calen. 13 Odocob wain cabi gug maden, ‘Adi odigen? Ija melami nelugca i suldocomin nuigian. Acahna age uqa cumundoqagan,’ en. 14 Euqa saen dana eu age uqa lelen fimeig madocobmadocobein, ‘I cabi gug huqaneh, uqa isi wain cabi ugian. Cois, uqa muguh eu ege oqannu ege cajimeb qocomun cal mecnu!’ ein. 15 Eunu age wain cabinadec heludecebil cacalen qagadoin,” aden.

Odimei Jisas sisiladen, “Wain cabi gug uqa wain cabi cofdoc dana eu eeta odadigian?
16 Uqa humei dana eu age fadaladeceb cal moqagan. Odimei wain cabi eu dana filfil adigian,” aden.

Saen dana eu odi dah mimeig madein, “Eu odi calecwe qee!” ein.

17 Odocob Jisas meciadimei sisiladen, “Eu odi calecwe qeefi cel oso eu Anutna jaqec je i gug bahic sildina?

‘Meen oso meen gel cehec memei dana culein eu
qila meen jo big gug jo hehdocnu calen.’
(Buk Song 118.22)

18 Dana cunug meen euna toni qoin eu age qetadi susul faladigian. Odocob meen eu oso toni cilehdocobfi comis ibuldugian,” aden.

19 Odocob loo je iwaladecca, ihanec dana benbenca age Jisas uqa galolo je i agenu maden ec doin. Eunu age saen euna himec Jisas hewoqaga odoin qa eu age dana cajaca cucuiadeinnu qee hewudelein.

Age Jisas Sisa takis helecnu kobolnu sisildoin

(Matju 22.15-22; Mak 12.13-17)

20 Eunu loo je iwaladec dana, ihanec dana benbenca age saen euna Jisas mecidudu cofdoin. Eu age cijawi coboc dana leih age dana meme cinigwe suladecebil belein. Odimeig Jisas agena sisilecna uhuldumeig aisais hewoqagannu cabi adein. Odocob age ihoc uqa ehudi li gesilec jona mudimeig hatu cofdoc dana ebenna moqagannu cisdoin. 21 Odocob uhulec dana i age Jisas sisildoin, “Iwalgec, hina iwalgigi madagana eu mele, ege doqona. Hina dana ijan meca ec qee cisdogona qa hina Anutna kobol eunu je mele himec dana cajaca iwaladegana euha doqona. 22 Ege Sisanu takis helecnu eu tutucfo, qee tutuc qeefo?” doin.

23 Euqa Jisas agena uhulec je eu fimei maaden, 24 “Meen qaig oso eu ihacteiga. In hahun eu gaga qoc taweia? In ijanha jaqec taweia?” aden.

Odocob age jejeg hewi madoin, “Eu Sisa uqana,” doin.

25 Eunu Jisas maaden, “Eunu age Sisana ceteteh eu Sisa uteiga. Anut toinan eu Anut uteiga,” aden.

26 Odocob age je oso cahuldu madeceb euna ono dana cajaca amagana aisais hewi ocwe qee. Euqa age je eu maadeceb dumeig tumatumaimeig uqa jejeg hewecwe qee. Eunu age tiliec bahic bilein.

Age Jisas dana cal mimei ceseli cajigiannu sisildoin

(Matju 22.23-33; Mak 12.18-27)

27 Odocob Sadjusi dana leih Jisasca hoin. Sadjusi age cal mein eundec ceseli qee cajowain egina. Age Jisas je oso sisildu madoin, 28 “Iwalgec, Moses uqa loo je gadac i jaqigen, ‘Dana oso uqa waliag cal mimei aideg culdigian qa melca qeefi dana eu uqa waliag cal men euna mel basituwasannu aideg eu ugian,’ odi jaqigen. 29 Saen osona waliagul 7-pela biloloig. Matu eu caja on. Odocob waliag eu aideg mel qee basec uqa cal men. 30 Odocob waliag lecisdoc uqa caja eu on. [Uqaha aideg mel qee basec cal men.] 31 Odocob waliag cijeddoc eu waliagul 7-pela cunugca eu odi odoin. Caja euca mel oso qee basec cal mein. 32 Hibna bahic caja eu cal men. 33 Odocob waliagwaliag 7-pela cunug uqa age osolosol agena caja bilen. Eunu cal mec ceseli cajec saenna uqa in aideg biligian?” doin.

34 Odocob Jisas jejenega hewi maaden, “Dana cajaca cebac bilec maha ina ocobocobegina. 35 Euqa dana cajaca cal mecnadec ceseli cajimeig cebac bilec cul hibnanu Anut gesiladec bilia euna biluqagan eu age Anut talacul biluqagan, age ensel ihocihoc tawoqagan. Odocob age cal mecnadec ceseli cajoqagan. Age cal mecwe qee. Eunu age ocobocob qee owain. 37 Odocob Mosesna je jaqec cal mecnadec haun ceseli cajoqagan eunu camasac bahic ihacadena. Na nag ja cijec uqana je euna jaqec taweia eu Moses uqa Tibudnu odi jaqen:

‘Uqa Ebrahamna Anut, uqa Aisakna Anut, odocob uqa Jekobna Anut,’ en.
(Kisim Bek 3.6)

38 Eunu dana cunug age uqa amegna cebac bileginanu Tibud uqa cebac bilegina agena Anut, uqa cal mec agena qee,” aden.

39 Odocob loo je iwaladec dana leih madoin, “Iwalgec, hinana je jejenega hewec eu me bahic!” doin. 40 Odocob je oso haun sisildocnu cucuiein.

Jisas uqa Farisi Kraisnu sisiladen

(Matju 22.41-46; Mak 12.35-37)

41 Odocob Jisas sisiladen, “Age adi madegina, ‘Krais eu uqa Dewid Melah,’ egina? 42 Ge, Dewid uqadodoc buk Samna jaqen:

‘Anut Tibud uqa ijana Tibud odi madon,
“Ijaca hu ebeni meulana isec bibilem
43 ija odocomin hinana cad cunug hu ninijebil
hina jaimna lahacadegan,” don,’ en.
(Buk Song 110.1)

44 Eu feiga, Dewid uqa Kraisnu madi, uqa ijana Tibud, en, eunu adi uqa Dewid Melah bilina?” aden.

Loo je iwaladec dananu cofdoiga

(Matju 23.1-36; Mak 12.38-40; Luk 11.37-54)

45 Dana cajaca cunug dah mumudegin Jisas uqana malogom maaden, 46 “Age loo je iwaladec dananu cofdoiga. Loo je iwaladec age lotoc cecelac tacimeig cocobi nuecnu gale adena. Age ceteteh idadec cudunna age binanaga sulecnu gale adena. Age cuha jona cabal me cudunna bilecnu gale adena. Odimeig age sab ben jec saenna bilec binanca euna bilecnu gale adena. 47 Eu age caja wij agena jo heje cedegina. Odimeig age dana me bahic meciadecnu saen cecelac bahic inondogina! Dana eundec age agena cahuldocnu ameg ben bahic oqagan,” aden.

Copyright information for `AEY