Mark 15

Age Jisas ehudi Pailat amegna mudein

(Matju 27.1-2, 11-14; Luk 23.1-5; Jon 18.28-38)

Walag daneceb ihanec dana benbenca, Juda agena matuca, loo je iwaladecca age gabandumeig je togodoin. Togodu hedumeig age Jisas eben libimeig ehudi limeig Pailat, Rom gabman dana matu, ebenna mudein.
(15.1)Age je Matju 27.2na nijia eu feiga.
Odocobil Pailat uqa Jisas sisildon, “Juda agena king eu hinafo?” don. Odocob Jisas jejeg hewi madon, “Hina madagana odi himec,” don. Odocob ihanec dana benben age dewegnu je geh um qu madein. Odocobil Pailat haun sisildon, “Faga, age dewennu je geh um qu madegina. Hina jejenega qee hewagaunfo?” don. Euqa Jisas jejeg qee hewel. Eunu Pailat geh cisdon.

Pailat age Jisas na babalecna tuitu qoqagannu maden

(Matju 27.15-26; Luk 23.13-25; Jon 18.39-19.16)

Pailat uqa Juda agena Sab Jec Deel Ben ina gaid gihacdoc dana oso Juda dana age agedodoc dana eu besitugaga ecebil eu besituadoloi. Saen euna age dana Rom gabmanca cadein eu gihacdoc jona madecebil bilein. Dana eundec oso, ijan Barabas, gihacdoc jona bilen uqa Rom gabmanca cadein saen euna dana qocob cal men. Juda dana cajaca age ceguli bibileig Pailat uqana kobol gaid Juda dana odadoloi eu toodu odigiannu sisildudu madoin. Odocobil Pailat sisiladen, “Ija Juda agena king besi uadecnu wawaga nijiafo?” aden. 10 Ge, Pailat uqa ihanec dana benben age Jisasnu macumac mimi uqa ebenna mudein eu don. 11 Euqa ihanec dana benben age dana cajaca ceguli bilein eu sigaladecebil age Pailat Jisas besi uadecnu qee madein. Age Barabas besitugagale ec madein. 12 Odocobil Pailat haun sisiladi maaden, “Ija dana age Juda agena king egina eu eeta odudigen?” aden. 13 Odocob age haun utai madoin, “Na babalecna tuitu qoga!” doin. 14 Odocobil Pailat maaden, “Eetanu? Uqa cel qisol mec odon?” aden. 15 Eunu Pailat uqa dana cajaca wawaga me nijigia bili imei Barabas besiaden. Odimei uqa han dana maadeceb age Jisas ehudimeig qisadoin. Qisadu hedocobil uqa Jisas na babalecna tuitu qumeig caqusecebil caculimei cal mecnu han dana ebenegana muden.

Han dana age Jisas lelandoin

(Matju 27.27-31; Jon 19.2-3)

16 Han dana age Jisas ehudimeig jo gabman dana ben bilia euna lein. Age Rom gabman dana ben uqana cudun mudein. Odimeig age han dana am cunug utaadecebil humeig osobenca cegulein. 17 Age lotoc golca oso tacitoin. Odimeig age halu dud lalic qumeig king katakat mudimeig gulodutoin. 18 Odimeig age binan susuli lelandudu madoin, “O Juda agena king, feele!” doin.
(15.18)Age je Matju 27.29na nijia eu feiga.
19 Odimeig age sih u ilo qagimeig cin qumeig amegna gob cehi uqanu cuha fein. 20 Age lelandu hedumeig lotoc golca hulitumeig uqana lotoc haun tacitoin. Odimeig age ehudi li na babalecna tuitu qocnu cali li belein.

Age Jisas na babalecna tuitu qoin

(Matju 27.32-44; Luk 23.26-43; Jon 19.17-27)

21 Age bebeleig han dana age Saimon Sairinidec uqa bahudec taun ben dunuh hohon madocobil Jisasna na babalec gahidon. Saimon Sairinidec uqa Aleksanda Rufasca memela.

22 Belimeig age cudun Golgota
(15.22)Golgota eu Aram je.
ein euna Jisas ehudi ehi tein. Golgota ijan gug eu “Ilo gatic cudun.”
23 Age wain ceteh gulihinca gabandoc eu jecnu utein. Euqa uqa qee jel. 24 Age Jisas na babalecna tuitu qumeig caqusecebil caculeceb uqana lotoc agedodoc siwiadein. Age uqana lotoc inni siwi cedecnu satu udoin.

25 Eu 9 kilok qasil age uqa na babalecna tuitu qoin. 26 Age dewegnu je madein eu jaqi qoin, “Uqa Juda agena King.” 27 Age Jisas cemenug heje oc dana lecis na babalecna tuitu aqalimeig caqusalecebil caculesin. Oso eben meulana isec tuitu qoin, oso eben ansena isec tuitu qoin.
(15.27-28)Grik jaqec je hilah leihna age je oso tubdu jaqein eu odi: Anutna jaqec je eu odi maden, “Age uqa loo je tefacdoc danaca osoben bibilegin meciadein,” en eu ihoc len.(Aisaia 53.12)


29 Odocob dana cajaca age hu li i bileig age lelandudu ilomoga culidudu je ilag madoin, “Se, hina tempel wagalimig deel cijedna haun cehigen em, 30 hinadodoc cahahadumeg na babalecnadec toni naga!” doin. 31 Ihanec dana benbenca, loo je iwaladecca ageha lelandudu madein, “Uqa leih cahahaaden euqa uqadodoc cahahadocnu ihoc qee. 32 Uqa Kraisfi, uqa Isrel egena kingfi uqa qila na babalecnadec toni neiale. Euna ege fimeb wawige meleigian,” ein. Odocob dana ale uqaca gami na babalecna tuitu aqalein eu aleha lelandosin.

Jisas cal men

(Matju 27.45-56; Luk 23.44-49; Jon 19.28-30)

33 Odocob cam gemo ceheceb cam tu qocob hatu cunug gagatuc menen, ninijen li 3 kilok wesu. 34 Odocob 3 kilok odi Jisas co suli u utai maden, “Eloi, Eloi, lama sabaktani?”
(15.34)Je madec i Aram je, eu Jisas uqana je madec gug bahic.
en. Je uqana gug eu odi:

“Ijana Anut, ijana Anut, eetanu qisactaga?” en.
(Buk Song 22.1)

35 Dana leih age ono talildu tawein je eu dah mimeig madein, “Feiga, dana eu uqa Ilaija utadona,” ein.
(15.35)Aram jena “Eloi, Eloi” uqana hutan eu “Ilaija, Ilaija” cinigwe.
36 Age oso guguli gege oso umei wain gulihinca tanumei balac oso euna gihacdumei sulecebil li cona mimei maden, “Sumudeiga. Culgeceb ege Ilaija uqa humei na babalecnadec casili toni mudigianfo, qeefo ec feqan,” en. 37 Odocob Jisas gehca utai kis umei cal men.

38 Odocob lotoc ben tempelna hamol gunna caqusec tawoloi eu ohisdec baladu ni mahana lecisdon. 39 Odocob Rom agena han dana 100 cofadec Jisas olana tawen uqa Jisas kis umei cal men eu odi fimei maden, “Mele bahic, dana i uqa Anut Melah!” en.

40 Caja leihha onoca tatawi fein. Age gemodec eu Maria Makdaladecca, Maria uqa Jems jomog Josefca analaca, Salomica. 41 Age Jisas Galili hatuna cobon saenna cesuldudu toodu coboin. Caja mati age Jisas gami Jerusalem bein eu ageha ono tawein.

Age Jisas deweg ganac qalqal hatinna mudein

(Matju 27.57-61; Luk 23.50-55; Jon 19.38-42)

42 Cam toni nonon Josef Arimatiadec hon. Uqa Juda agena cegulec eundec oso, uqana coboc hutan me. Uqaha uqadodoc Anutna culnu waliwali fen. Uqadec Juda agena cuha deel caligian. Odocob qila eu deel age ceteh sab jec bennu saciadoloig. Eunu uqa waug gagadic mudimei Pailat amegna limei Jisas deweg ganac ugiannu sisildon. 44 Odocob Pailat uqa Jisas wele cal meiafo, qeefo ec cisdon. Odimei uqa Rom agena han dana 100 cofadec utadocob hocob uqa Jisas cal meiafo, qeefo? ec sisildon. 45 Rom agena han dana 100 cofadec uqa Jisas cal meia ec Pailat madocob uqa age Josef Jisas deweg utecnu maaden. 46 Odocob Josef uqa deweg jeuldecnu lotoc senenec oso fajen. Odimei uqa Jisas deweg heweceb toneceb lotocna jeulden. Odimei uqa Jisas deweg qalqal hatin aluh qeihna hunein euna muden. Uqa meen koldoc oso olocdocob eu hatin biah cufa qon. 47 Maria Makdaladecca Maria Josef anagca ale Jisas deweg ana mudein eu fesin.

Copyright information for `AEY