Mark 3

Jisas Juda agena cuha deelna dana oso eben cogogec me muden

(Matju 12.9-14; Luk 6.6-11)

Jisas haun Juda agena cuha jo dunuh len. Ono dana oso uqa eben gatoc men bilen. Dana leih ono bilein eu age Jisas uqa cuha deelna dana eben gatoc men me mudigianfo eunu cofdudu mecidoin. Uqa odi odocobfi ege dewegnu je um qoqan ec cisdoin. Odocobil Jisas dana eben gatoc men eu madon, “Ene hogale,” don. Odimei dana sisiladi maaden, “Cuha deelna ege dana me odadecnu loo je cois ec madenafo, qee ege dana waadecnu cois ec madenafo? Cuha deelna ege dana cahahaadecnu loo je cois ec madenafo, qee ege dana aqocomun cal mecnu cois ec madenafo?” aden. Uqa odi maadeceb age conoga culec bilein. Odimei Jisas uqa talilaadi meciadimei gemag ben. Age wawaga tool ibuldon eunu waug me qee men. Odimei dana eu madon, “Hina eben heli huleldoga,” don. Odocob uqa eben heli huleldocob me men. Odocob Farisi age cuculdi nuimeig Herodna dana eundecca mahuc cegulecebil age Jisas qoqagannu jic wawali je togodoin.
(3.6)Age je Matju 12.14na nijia eu feiga.


Dana cajaca mati bahic age Galili wa gad cagocna cegulein

(Luk 6.17-19)

Jisas uqana malogom gami Galili wa gad cagocna ceseli belein. Dana cajaca am ben bahic Galili hatunadec tooadi belein. Leihha age Judia hatunadec, leih Jerusalemdec, leih Idumia hatunadec, leih Jodan Wa ono isecdecca, leih Taia Saidonca alildu bilein eunadecca, dana cajaca mati bahic age Jisas uqa odi odona ec dumeignu uqaca hoin. Dana cajaca mati bahicnu age Jisas gihacguhucdowainnu uqa uqana malogom maadeceb uqa wag osona tobigiannu gaid saciadu mudecebil tawen. 10 Ge, uqa mati bahic me maden. Eunu dana caja hagca eundec age Jisas deweg hewi feqan imeig uqa cemenug bahic lecnu gihacdodi gagadic bahic mein. 11 Buga me qee age dana cajaca deweneganadec cali hu bebeli Jisas fecebil dana cajaca age amegna toni mahulimeig utai madein, “Hina Anut Melah!” ein. 12 Euqa Jisas uqa buga me qee age uqana gug camas mowainnu cahacaden.

Jisas aposel 12-pela nesili ehaden

(Matju 10.1-4; Luk 6.12-16)

13 Odocob Jisas aluh guhidocna ti bilen. Odimei dana age uqaca biluqagannu gale don eundec utaadeceb uqa cemenug hoin. 14 Uqa dana 12-pela age uqaca biluqagannuca age suladeceb Anutna me je qasali maadecnuca nesili ehaden. Dana eu uqa aposel
(3.14)Age je eu Matju 10.2na nijia eu feiga.
ijan qon.
15 Uqa age buga me qee dana deweneganadec ititacadecnu cabi eu ebenegana men. 16 Aposel 12-pela ijanaga eu odi. Eu Saimon, Jisas uqa ijan oso Pita ijan qon. 17 Eu Jems Sebedi melah waliag Jonca, Jisas uqa ijanala oso Boanesis
(3.17)Boanesis eu Aram je.
ijanala qon. Ijanala gug eu qeli qocna mel.
18 Eu Andruca, Filipca, Batolomjuca, Matjuca, Tomasca, Jems uqa Alfias melahca, Tadiasca, Saimon uqa Selot
(3.18)Selot agena am age Juda dana eu Rom dana Judiadec ititacadecnu egina.
agena amdecca,
19 Judas Iskariotca. Judas Iskariot uqa hibna Jisasnu balijimei uqana cad ebenegana muden.

Age Jisas Bielsebulca cabi osina ec madein

(Matju 12.24-32; Luk 11.14-23; 12.10)

20 Odocob Jisas jobon nuen. Dana cajaca mati bahic age haun cegulecebil Jisas uqana malogomca sab jecnu saenca qee. 21 Odocob Jisas uqana eundec age uqa sab qee jec cabi onanu dah mimeig madein, “Uqa gad qoia,” ein. Eunu age uqa ehudoqagannu belein.

22 Odocobil loo je iwaladec dana age Jerusalemdec nein eu age Jisasnu madein, “Bielsebul, buga me qee agena ben, uqa dana eu hewudena. Uqa Bielsebul uqana gagadic odocna buga me qee dana deweneganadec ititacadena,” ein.
(3.22)Bielsebul eu Seten ijan oso.
23 Odocobil Jisas dana eu utaadeceb uqaca hocobil galolo je maaden, “Seten uqana eundec adi ititacdugian? 24 Hatu osona mam cadecebilfi cul eu gagadic tawecnu ihoc qee. 25 Sihul osona mam cadecebilfi sihul eu gagadic tawecnu ihoc qee. 26 Odocob Seten uqana eundec age mam cadecebil qatanec bilecebfi uqa gagadic tawecnu ihoc qee. Euqa uqa toni qocob qee migian,” aden.

27 “Oso uqa dana gagadicca uqana jona li uqana ud cawaldocwe qee, uqaqa casac li dana eu eben jaihca libimei uqana ud cawaldecnu ihoc,” aden.
(3.27)Dana gagadicca eu Seten. Dana uqa Setenna ceteteh cawaldena eu Jisas.


28 “Ija mele maadigina, silail oso cunug dana megina eu Anut uqa dana agena silail cagasiadigian. Dana age Anutnu lelan madegina euha Anut uqa dana agena silail cagasiadigian. 29 Euqa Kis Gunnu lelan madec eu dana silail cagasitocnu qee nijel. Oso Kis Gunnu je me qee madenafi silail eu saen qila inaca leceb saen bilec catanecnaca silail cagasec qee gulucdoiaun. Euqa uqana silail deweg fagdocob catanigian,” aden.
(3.28-29)Jisas uqa Kis Gunna gagadic odocna dana cajaca me maden. Euqa loo je iwaladec dana age uqa Setenna gagadic odocna me maden ec cisdoin. Eunu age cahulec bahic bilein. Age Kis Gun eu Seten ec cisdoin. Eunu Anut uqa agena silail cagasiadecnu ihoc qee nijel. Age je Matju 12.31-32na nijia euha feiga.
30 Ge, age Jisasnu madein, “Uqa buga me qeeca,” ein. Eunu uqa odi maden.

Jisas anag waliagulca eu in?

(Matju 12.46-50; Luk 8.19-21)

31 Jisas uqa dana cajaca je maadi bibilen uqa anagca waliagulca gami calein. Age jo maha gumu tataweig je suldocobil dunuh len. Uqa ageca hugiannu utadoin. 32 Dana cajaca amemeg Jisas taldoin bibilegin madoin, “Faga, hina anin walinelca gami maha gumu taweiga. Age hina ageca legannu madegina,” doin. 33 Odocobil Jisas jejenega hewi maaden, “Ija au in? Ija waliel an?” aden. 34 Odimei uqa dana cajaca age alildu bilegina eu uqa talilaadi meciadimei maaden, “Feiga! Ija au walielca ihen! 35 Oso uqa Anut co toodu odona eu uqa ija walica, ija cebinamica, ija auca,” aden.

Copyright information for `AEY