Mark 9

Odocob Jisas maaden, “Ija mele maadigina, leih age ene tawegina eu age qee cal mec ninijeb Anutna cul gagadic odocca hohob mecidoqagan,” aden.

Jisas deweg fil ibuldon

(Matju 17.1-13; Luk 9.28-36)

Deel 6-pela hedocob Jisas uqa Pitaca, Jemsca, Jonca cedadimei ehadi aluh ohis osona dana oso qee bilec euna ti cuhanuc bilein. Ono bibilegin Jisas uqa age amagana ibuldon. Uqana lotoc senenec bahic faleen, uqana senenec eu dana mahanadec age lotoc cuseginawe qee. Odocob uqana malogom age Moses Ilaijaca ale hocobil Jisasca je togododogin feciadein. Odi bibileig Pita uqa fimei Jisas madon, “O Meca, ege ene odi bilecnu eu me bahic. Ege ene talah jo cijed ceheqan, oso hinana, oso Mosesna, odocob oso Ilaijana,” don. Ge, uqa malogomca age geh bahic cucuiein eunu uqa cel je madena eu qee dol. Uqa je eu madudu bibilen taen oso ni jahuladen. Odocob taennadec jejeg oso camas mimei maden, “Ija melami nelugca ihen. Age uqa jejeg toodu odoiga,” en. Odocob mahuc age talildu meciimeig oso ageca tatawen qee felein, euqa Jisas himec age cemenega tatawen fein.

Age aluhnadec totoni Jisas malogom cijed je gatiti maaden, “Dana Melah cal mecnadec qee cajec ninijeb je i oso cain doiaunnu qila feiga eu oso cain saadowain,” aden. 10 Age uqa co toodoin qa age gemona agedodoc ceteh eunu togodudu madein, “Cal mecnadec ceseli cajec eu eeta?” ein.

11 Odimeig age Jisas sisildoin, “Eetanu loo je iwaladec age Ilaija uqa aquni hugian egina?” doin.
(9.11)Loo je iwaladec dana age cit qoc saennu je oso iwaladein. Je uqana gug eu Malakai 4.5-6. Age Ilaija uqa Krais aqunitu cali hugian ec madein.
12 Odocobil Jisas jejenega hewi maaden, “Ilaija uqa mele aquni hugian, humei ceteh cogogen eu cunug tutuc mudigian. Euqa eetanu Anutna je age Dana Melahnu jaqein, uqa deweg sogoec mati bahic gahidocob dana cajaca cunug age cewudoqagan ec odi jaqein? 13 Euqa ija maadigina, Ilaija uqa wele hon. Hocob dana agedodoc wawaga maden eu age uqa odudein. Eu oduduqagan ec wele uqanu jaqeinwe odi odudein,” aden.

Jisas mel oso buga me qeeca me muden

(Matju 17.14-21; Luk 9.37-43)

14 Jisas malogom cijedca age malogom leih gami gabandumeig age dana cajaca mati bahic ceguli talilaadegin fein. Ono loo je iwaladec age malogom gami jena file dadaneegin fein. 15 Odocobil dana cajaca age Jisas caleceb fimeig age geh bahic filicitein. Odimeig mahuc age uqaca guguli limeig feele dudu madoin.

16 Odocobil Jisas uqa sisiladen, “Age, age gami eeta togodoiga?” aden.

17 Odocob dana oso dana cajaca amnadec Jisas madon, “Iwalgec, ija melami uqa buga me qeeca, uqa je madecwe qee. Eunu ija ehudi hinaca ahuga. 18 Buga me qee hu hewena saen euna qu ihu qocob mahana tonimei sahalic magmagdodoi maig kicodudu deweg kieceb gagadic mena. Ija hinana malogom ititacdoqagannu maadigaqa age ititacdocnu odoiga ihoc qee,” don.

19 Odocob Jisas uqa je eu dah mimei maaden, “O dana cajaca qila bilegina, age wawaga meleecca qee! Saen ganic ija ageca haun biligen? Saen ganic ija camuhulaadi cobigen? Mel eu cemeni ehudi ahoigale,” aden.

20 Odocob age mel eu Jisas amegna ehudi ahoin. Odocobil buga me qee eu Jisas fimei mahuc mel eu qu ihu qocob mahana tonimei coliwcoliwi niniji sahalic magmagdon.

21 Odocob Jisas mel memeg sisildon, “Cel saen bahic hag eu mel dewegna sanan men?” don.

Odocob memeg madon, “Mel nagna bahic saen euna sanan muden.
22 Saen mati mel eu deweg tudugiannu odudeceb jana lena, odimei wana nuina. Euqa hina ceteh oso odocnu ihocfi hina egenu wawin qocob cesulgagale,” don.

23 Odocob Jisas madon, “Eetanu hina mataga, ‘Hina odocnu ihocfi,’ taga? Oso waug meleeccafi eeta cunug uqa odocnu ihoc,” don.

24 Odocob mahuc memeg utai bilei madon, “Ija wawi meleenaqa ijana wawi meleec eu gohic. Eunu ijana wawi meleec cesuldogale,” don.

25 Odocob Jisas uqa dana cajaca mati bahic hu gabandu alilaadegin fimei uqa buga gegehinca cahacdudu madon, “Hina buga con dahinca cufa qoc, ija je gagadic mahigina, hina melnadec cali hu nuuga. Hina mel deweg dunuh eu haun cain lagaun,” don.

26 Odocob buga me qee qajimei mel eu hewi qu me qee mudi ihu qocob tonimei mahana ninijen cali hu nuen. Mel eu cal mec cinigwe nijen. Odocob dana cajaca cunug madein, “Mel cal meia,” ein. 27 Euqa Jisas mel eu eben umei cesuldocob caji tawen.

28 Odocob Jisas uqana malogomca age jo oso dunuh limeig uqana malogom jahuni sisildoin, “Eetanu ege buga me qee eu ititacdocwe qee?” doin.

29 Odocobil Jisas jejenega hewi maaden, “Inondocna
(9.29)Grik jaqec je hilah leihna age je oso tubdu jaqein eu odi: “sabnu qagu bilecnaca”
himec buga me qee eundec ititacdocob cali hu nuina, ceteh osona ihoc qee,” aden.

Jisas uqa cal mimei ceseli cajigian ec madi lecisdon

(Matju 17.22-23; Luk 9.43-45)

30 Odocob Jisas uqana malogom gami jobon eu culdi Galili hatu gemogemo coboin. Uqa uqana malogom iwalaadi bilei maaden, “Dana Melah eu dana ebenegana mudecebil age uqa qocobil cal migian. Cal mimei uqa deel cijed hedocob haun ceseli cajigian,” aden. Eunu uqa dana age ono bilina ec docnu culen. 32 Euqa age je eu uqana gugnu wawaga qee fogo dol. Odimeig age je gugnu sildiadecnu sisildocnu cucuiein.

In oso cunug wooladi ben biligian?

(Matju 18.1-5; Luk 9.46-48)

33 Age Kapaneam jobon ono calimeig jo oso dunuh li bibileig Jisas uqa uqana malogom sisiladen, “Age cel je jicna togododogin duga?” aden. 34 Euqa age jicna agedodoc gemona in oso cunug wooladi ben bilinanu togodoin. Eunu age je madecnu culein. 35 Odocobil Jisas uqa bilimei uqana malogom 12-pela utaadimei maaden, “Oso uqa matu bilecnu waug nijinafi uqadodoc hib bahic mudigian. Odimei uqa cunugnu cewel dana migian,” aden. 36 Odimei uqa mel sim oso u uqa age gemona mudeceb tatawen uqa eben u colowandumei maaden, 37 “Oso uqa mel sim eundec oso ija ijanina ehudimei eu eeldona eu uqa ija oitimei eeltena. Odocob oso uqa oitimei eeltena eu uqa ija dih qee oitinaqa ija sulten euha ehudimei eeldona,” aden.

Oso egena cad qee bilina eu uqa egena danah bilina

(Luk 9.49-50)

38 Odocob Jon uqa Jisas madon, “Iwalgec, ege dana oso hina ijainna buga me qee eundec dana deweneganadec ititacaaden fom. Uqa egena amnadec qee bilel. Eunu ege uqa cahacdom,” don. 39 Euqa Jisas maaden, “Oso uqa ijanina kobolkobol odimei uqa saen nag gieceb ijanu je me qee madecnu ihoc qee. Oso uqa ege qee me qee migina eu egenu tawena. Ija mele maadigina, oso age Kraisna eundecnu cesuladimei wa gab oso adena eu uqa hibna ameg me bahic ugian. Eunu age cain cahacdowain,” aden.

Kobol me qee dana uqana waug meleec odocob qee migian

(Matju 18.6-9; Luk 17.1-2)

42 Jisas odi maadi maaden, “Oso uqa mel sim i eundec oso uqa ijanu waug meleena eu odudeceb silail migiaqa eu meen ben culumenca bena qagi macas ameg nijia euna age heloubmi eu me odoub. 43 Odocob hina eben lecisca oloqanih jana ja cijeceb catanena euna helihecebil bilecnu eu me qee bahic.
(9.43-44)Grik jaqec je hilah leihna age je oso tubdu jaqein eu odi: “Cudun euna gumac dewenega gaid qu jegina, odocob ja dewenega gaid cijina,” aden.
Euqa hina eben osolca qee cebac bilec catanec ogaqa eu me. Eunu hina eben silail mecnu mana tawecebfi hina eben qeti helagale.
45 Odocob hina jaim lecisca oloqanih jana helihecebil bilecnu eu me qee bahic.
(9.45-46)Grik jaqec je hilah leihna age je oso tubdu jaqein eu odi: “Cudun euna gumac dewenega gaid qu jegina, odocob ja dewenega gaid cijina,” aden.
Euqa hina jaim osolca qee cebac bilec catanec ogaqa eu me. Eunu hina jaim silail mecnu mana tawecebfi hina jaim qeti helagale.
47 Odocob hina amen lecisca oloqanih jana helihecebil bilecnu eu me qee bahic. Euqa hina amen osolca himec Anutna cul lagaqa eu me. Eunu hina amen faninheceb silail mifeg amen seli helagale. 48 Cudun euna

‘gumac dewenega gaid qu jegina,
odocob ja dewenega gaid cijina,’ en,” aden.
(Aisaia 66.24)

49 “Ge, [age ceteh Anutnu ihanegina euna macas mecebil Anut amegna cataniec nijina eu odiwe] ja euha Anut uqa dana dewenega cunugna migian,” aden.
(9.49)Grik je i uqana gug bahic eu camasac qee. Age Wok Pris 2.13 feiga.


50 “Macas eu me bahic qa uqana tin tebandoc eu qee mecebfi age adi uqana tin tebandoc weledec eu haun muduqagan? Age dool cuhunugana macas mecebil gaid me bilina eu odiwe age agedodoc wawagana macas mecebil cotogailca malol bileigale,” aden.

Copyright information for `AEY