Matthew 18

Sao cul jobon ono in oso cunug wooladi ben biligian?

(Mak 9.33-37; Luk 9.46-48)

Saen euna malogom age Jisasca limeig sisildu madoin, “Sao cul jobon euna in oso cunug wooladi ben bilina?” doin.
(18.1)Je i je cecelac 5-pela Jisas maaden buk Matjuna nijen eundec 4-peladoc. Je cecelac i 18.3-35na nijen. Eu dana cajaca age Jisas toodoin eu age cel kobol agena gemona odoqagan eunu madena.


Odocobil Jisas uqa mel sim oso utadocob uqaca hocob uqa ehudi malogom gemona mudimei maaden, “Ija mele maadigina, age tului qee falicdu mel i cinigwe ha qee ibuldufeig age sao cul jobon ono qee lowain. Oso uqadodoc jogoimei ija cotiel agena ben ec qee madigiaqa mel eu cinigwe eu cotugul cunug wooladi sao cul jobonna ben bilina,” aden.

“Oso uqa mel sim eundec oso ija ijanina ehudimei eu eeldona eu uqa ija oitimei eeltena,” aden.

Silail mec kobol eu cain hewowain

(Mak 9.42-48; Luk 17.1-2)

Jisas odi maadi maaden, “Euqa oso uqa mel sim i eundec oso uqa ijanu waug meleena eu odudeceb silail migiaqa eu meen culumenca bena qagi macas ameg nijia euna age helecebil wa jimei cal moubmi eu me odoub,” aden.

“Faninadec mahana nijina, odocob faninadec eu gaid dana cajaca ageca hona, eu cunug qee mudecnu qee nijel. Euqa dana cajaca age maha ina bilegina age leih faninadecebil silail megina eu age walocca! Odocob hina eben lecisca jaim lecisca ja cijeceb catanecna helihecebil euna bilecnu eu me qee bahic. Euqa hina ebenca qee jaimca qee cebac bilec catanec ogaqa eu me. Eunu hina ebenfo, jaimfo silail mecnu mana tawecebfi hina qeti helagale. Odocob hina amen lecisca oloqanih jana helihecebil euna bilecnu eu me qee bahic. Euqa hina amenca qee euqa cebac bilec catanec ogaqa eu me. Eunu hina amen faninheceb silail mifeg amen seli helagale,” aden.

10 “Ija maadigina, sim agena ensel age gaid Mei sao jobon bilia uqa ola mecidogina. Eunu batut feigale, age mel sim i age oso cain cewudowain,” aden.
(18.10-11)Je i, “mel sim i age,” but inaca, but 6naca, but 14naca nijia eu je Matju 10.42 cinigwe, eu odi “mel sim eundec oso uqa ijana malogom bilina.” Jisas uqa mel sim dihnu qee madelwe fena. Uqa uqana malogomnuha maden. Odocob Grik jaqec je hilah leihna age je oso tubdu jaqein eu odi: “Ge, Dana Melah uqa fadaloqagannu odogina eundec cahahaadecnu mahana toni nen,” aden.


Sipsip fadalecnu odona eunu galolo je

(Luk 15.3-7)

12 Jisas je haun maaden, “Age je i maadigennu adi cisdogina? Dana oso uqana sipsip 100 cobogina eundec osol jahunen. Odocob dana eu dumei uqa 99 eu aluhna cuculadi jahunen eu wawali qee cobonafo? 13 Uqa eu gulucdufei, ija mele maadigina, uqa 99 aluhna me bilegina eu cunug woolaadi osol cahahadu on eunu waug ceelena. 14 Eu odi Mei
(18.14)Grik jaqec je hilah leihna age je fil oso jaqein eu odi: Memega.
sao jobon bilia uqaha mel sim oso fadaleiaunnu qee gale dona,” aden.

Tutuc mudec kobolna cotin silail mihen eu tutuc mudoga

15 Jisas je haun maaden, “Hina cotin [dewenna] silail mecebfi hina uqaca limeg hina uqaca himec mecidodecna madogale. Madogona eu cotin dah mecebfi hina cotin haun ceseli ogona. 16 Euqa uqa hinana je dah mecnu culecebfi

‘je eu tutuc mudec dana lecisfo, cijedfo amagana cabi ocnu’
(Loo 19.15)

hina dana osolfo, lecisfo cedalecem age osoben li cotin madoigale.
17 Hina cotin dana eu agena je dah mecnu culecebfi hina je eu tamanec amegna camasac magale. Cotin uqa tamanecna je toodu odoc culecebfi hina uqa Juda dana qee eundecfo, takis cedec eundecfo hibemadeginawe hibemdogale,” aden.

18 “Ija mele maadigina, age ceteh mahana jelegina eu sao jobon jelec biligian. Ceteh age mahana cufalegina eu sao jobonha cufalec biligian,” aden.

19 “Je osoha maadigina, lecisfo cijedfo ija ijaninu ceguli bilegina euna ija age gemona biligen. Eunu age eundec lecis mahana ceteh osonu Mei madocnu wawala osol meceb inondocobilfi ceteh eu Mei sao jobon bilina eu adigian,” aden.

Cabi dana uqa cabi hijagna cub qee cagasitol eunu galolo je

21 Pita uqa Jisas cemenug limei sisildu madon, “O Tibud, coti uqa ija silail mecna culini gaid tudocob cagasitoc sanijec ganic ihoc leceb cagasitugen? Cagasitoc 7-pela ihoc lec eu ihocfo?” don.

22 Jisas uqa Pita jejeg hewi madon, “Ija mahigina, 7-pela ihoc lec eu ihoc qee, euqa hina cotin 70doc sanijec 7-pela ihoc leceb cagasitoga,” don.

23 Odi madumei maaden, “Sao cul jobon eu odi king oso uqa uqana cabi dana agena cub oc tutuc mudecnu utaaden. 24 Eu age hocobil age gemona cabi dana oso camas men eu uqa kingna 10 milion kina wele on. Uqana cub oc eu ben bahic. 25 King uqa ameg itiga don qeenu king maaden, ‘Age uqaca uqa aidegca uqana melca uqana ceteteh cunugca idadumeig meen qaig iteiga,’ aden. 26 Odocob cabi dana eu uqa je eu king madeceb dumei uqa king amegna gob cecehi kingnu cuha fimei ninidudu madon, ‘O ijana Ben, hina susumitem ija isi meen qaig ameg cunug ihigen,’ don. 27 Odi odocob king uqa dana inu walol docob besitumei uqana cub oc cunug cagasiton,” aden.

28 “Euqa cabi dana eu nuimei uqa cabi hijag oso gulucdon. Eu uqa wele 100 kina uten. Uqa eu gulucdumei be doodool hewimei madon, ‘Meen qaig ihem eu qila ameg itiga,’ don,” aden.

29 “Odi odudeceb cabi hijag eu uqa amegna gob cehimei ninidudu madon, ‘Sumitigale. Ija meen qaig ameg cunug isi ihigen,’ don. 30 Odocob uqa eu cuculi gihacdoc jona tacen meen qaig ameg itecem besihigen don,” aden.

31 “Uqa odi odocob uqa cabi hijagul je eu cunug dumeig wawaga me qee meceb age li king je eu cunug sadoin. 32 King je eu dumei uqa dana i utadocob hocob madon, ‘Hina cabi dana me qee bahic. Hinana cub oc ben bahic ninijen ninitecemnu cagasihem. 33 Hina cabi cotin niniheceb hina eetanu uqanu qee walol hel ija hinanu walol ten odi?’ don. 34 Odimei gemag madudu deweg tudocnu gihacdoc jo cofdoc culiaden, meen qaig ameg cunug iteceb besitoiga,” aden.

35 “Eunu age cotogail agena cahuldoc qee cagasi bahic adecebilfi Mei sao jobon bilia eu uqaha king uqa cabi dana me qee odudenwe odadigian,” aden.

Copyright information for `AEY