Matthew 2

Haiden agena doc silecca dana age Jisas fecnu hoin

Maria uqa Jisas Betlehem jobon ono Judia hatuna baseceb Herod uqa king bilen.
(2.1)King Herod i uqa Judia hatuca, hatu eu Judia hatu cemenug nijen euca cofaden. Herod uqa king euqa uqa Rom agena king ben, eu Sisa ein, bisalu bilen.
Saen euna haiden agena doc silecca dana age cam tobi becnadec Jerusalem jobon cali humeig
dana sisiladi maadein, “Mel sim haun uqa Juda agena king cali hon eu ana bilia? Ege uqana malaqa ono cam tobi becna isec camas meceb fimeb ege amegna gob cehimeb uqanu cuha feqannu hoqa,” adein. Odocob King Herod je eu madecebil dah mimei geh cisdon, odocob Jerusalem dana cajaca cunugha eunu geh cisdoin. Odocobil Herod uqa ihanec dana benbenca loo je iwaladec danaca utaadeceb cegulecebil uqa sisiladi maaden, “Krais i Anut uqa suldocob uqa Anutna dana cajaca cahahaadecnu hugian eu cel jobon cali hugian?” aden. Odocob age madoin, “Uqa Betlehem jobon Judia hatuna cali hugian. Je hahun madec dana agena je odi jaqec wele nijia:

‘O Betlehem, Judia hatuna,
king uqa Isrel dana cajaca cofadigiannu eu Betlehem ono cali hugian.
Eunu Juda jobon benben age hina qee woolhegina,’ jaqec je taweia,” doin.
(Maika 5.2)

Odocobil Herod uqa doc silecca dana jahuni utaadeceb hocobil uqa malaqa cel saen cali hon eunu sisiladen. Age silditocobil dumei Betlehem jobon belecnu dado madimei maaden, “Ijaha nui mel eunu cuha figennu age uqanu megi cuhadoigale. Odocob age eu gulucdu fimeig hu sateigale,” aden.

Odocob age kingna je dumeig Betlehem jobon beloqagannu belein.
(2.9)Betlehem jobon eu Jerusalem cemenug nijen, eu odi kilomita 8-pela onoca nijen.
Odocob malaqa wele cam tobi becna isec fein eu aquniaadi, jo mel bilen eu ohis cehi qudu tawen.
10 Age malaqa fimeig age wawaga gehca ceelen.

11 Odocob age jona limeig melca uqa anag Maria ha fecialimeig age mel amegna gob cehi jogoimeig uqanu cuha fein. Odimeig agena bokis qosocdumeig goldca, gilic ja manecebil dedeman meca, gilic dedeman meca umeig age toinanaga osoosoca Jisas utein. 12 Odocob Anut uqa age bebelecna maadi maaden, “Herod cemenug haun ceseli cain belowain,” aden. Maadeceb dumeig age jic osona agena hatuna ceseli belein.

Josef Mariaca alena melca Isip hatuna busali belein

13 Doc silecca dana age wele belecebil Tibudna ensel Josef us ninijen bebelecna camas mimei madon, “Faga, Herod uqa mel wawali li qocnu madena. Eunu hina caji mel anagca cedalimeg busali Isip hatuna nui biliga. Ija mahecemin haun ceseli ene hogan,” don. 14 Odocob Josef uqa witic cajimei mel anagca cedalimei Isip hatuna nui bilein. 15 Odimeig age Isip hatuna bibilegin li Herod uqa cal men. Saen euna Tibudna je hahun madec dana uqana je ihoc ligiannu ceteh eu calen. Je hahun madec dana uqa wele odi maden:

“Ija melami Isip ono bibilen utadocomin Isipnadec cali hon,” en.
(Hosea 11.1)

Herod maadeceb age Betlehem jobonna mel mati aqecebil cal mein

16 Herod uqa doc silecca dana age ija uhultiti woolti belein imei gemag ben bahic ben. Odimei uqa han dana suladeceb age mel manahal age cabi gel lecis qee wooladec eundec cunug age Betlehem jobonca hatu cemenugca ono bilein eu aqi hedoin. Uqa doc silecca dana malaqa cel saen wasen sisiladeceb madocobil don eu toodu mel aqeceb cal mein. 17 Eu odocna je hahun madec dana Jeremaia uqana je ihoc len. Uqa wele odi jaqen:

18 “Rama jobonna qajec ben bahic dah mein.
Qada qajec ben bahic onodec hon.
Resel uqana melnu qada qajena.
Mel cal mein eunu qada qajena.
Age wahohog je madocobil dah mecnu culen,” en.
(Jeremaia 31.15)

Josef Mariaca alena melca ceseli Isipdec hu Nasaret bilein

19 Herod cal meceb Isip hatu ono Tibudna ensel bebelecna Josefca camas mimei 20 madon, “Dana age madi, mel qoqan, ein age wele cal mein. Eunu cajimeg mel anagca cedalecem ceseli Isrel hatuna beleiga,” don. 21 Odocob Josef cajimei mel anagca cedaleceb ceseli Isrel hatuna hoin.

22 Humeig Herod melah Akeleas memeg hehuldi king bibilen eu madocobil dumei uqa Judia hatuna bilecnu cucuien.
(2.22)King Herod cal meceb Rom age uqana hatu qatani uqa melahul cijed cesawiadein. Akeleas uqa Sameria hatuca Judia hatuca alena king calen. Odimei uqa cabi gel 10-pela king bilen.
Anut uqa Josef bebelecna dado mudeceb Galili hatuna nuimeig
23 Nasaret jobon ono bilein. Je hahun madec dana age wele odi madein, “Age uqa Nasaretdec doqagan,” ein. Eunu je hahun madec dana agena je oso ihoc ligiannu age Nasaret jobon ono bilein.

Copyright information for `AEY