Matthew 23

Jisas uqa Farisinu je maden

(Mak 12.38-39; Luk 11.43, 46; 20.45-46)

Odocob Jisas uqa dana cajaca uqana malogomca Farisinu je odi maaden, “Loo je iwaladecca Farisica age Mosesna cabi cudun wele oin. Eunu Moses loo je iwaladenwe age odi loo je iwaladegina. Eunu age odocnu je maadegina eu cunug toodu odoigale. Euqa agena odoc toodu cain odowain. Ge, age dana cajaca je maadegina euqa age madeginawe agedodoc qee toodu odogina. Age ceteh culumen bahic sogimeig dana gahidoqagannu qatomogana megina. Euqa sogec eu agedodoc nag bahic hewi fecnu culegina. Age ceteh odogina eu cunug egena odoc eu dana foqagan imeig odogina. Ge, agena sai euna Anutna je jaqein age ilomoga domonnaca ebeneganaca taqegina eu bagalan mudegina. Agena lotoc sucunna gos cecelacca mudegina.
(23.5)Eu Juda agena inondocnu kobol. Age Anutna jaqec je leih pepana jaqimeig pepa eu bokis nagna mimeig ilomoga domonnaca ebeneganaca taqoloig. Anutna jaqec je jaqaloig eu 4-pela eu odi: Kisim Bek 13.1-10; 13.11-16; Loo 6.4-9; 11.13-21. Juda ageha Anutna jaqec je eu Namba 15.37-41 euna nijia eu toodoloig. Age halu gohic cadibca agena lotoc sucunna jeloloig. Halu gohic eu Anutna loo je cunug toodoc bahic toodocnu cisdocnu cesuladena.
Age sab ben jecnu age dana ijanagaca agena bilecna bilecnu gawegina. Agena cuha jona cuha cegulecnu cofadec agena bilecna bilecnu gawegina. Dana age fajec cegulec cudunna age lalan mamadi tabacunadecebil gale adena. Dana age Farisi maadi madegina, ‘Meca,’ adecebil gale adena,” aden.

“Ageqa dana ege ‘Meca,’ goqagan ec cain owain. Agena Iwaladec osol bilina, ageha cotigcotig bilegina. Age Memega osol bilina, eu uqa sao jobon bilina. Eunu age dana oso mahana bilina ‘Memige,’ cain dowain. 10 Agena Ben osol bilina, eu Anutna Krais. Eunu dana age, age ‘Ben,’ geiga ec euha cain owain. 11 Oso age gemona ben bilina eu uqa age cunug cewel uadec biligian. 12 Oso uqa culai ijanel lalan mumudi bilina euqa Anut uqa dana eu cilehdugian. Oso uqadodoc jogoi waug lal qocca bilina eu Anut uqa dana eu culaug u lalan mumudeb biligian,” aden.

Jisas uqa loo je iwaladecca Farisica age kobol me qee odogina eunu maden

(Mak 12.40; Luk 11.39-52; 20.47)

13 Jisas je haun maaden, “O loo je iwaladecca Farisica, age dana cajaca sao cul jobon lecnu jic cebec meniadegina. Euqa agedodoc lecnu culegina, odimeig leih sao cul jobon lecnu wawaga nijia euqa age cahacadegina. Eunu age me hihili coboc dana! Age walocca!” aden.
(23.13-14)Grik jaqec je hilah leihna age je oso tubdu jaqein eu odi: “O loo je iwaladec Farisica, age caja wij faninaadi agena jo heje cedegina. Age odi oodoig age dana amagana qauaadi inondoc cecelacca madegina. Eunu age me hihili coboc dana! Age Anut dana geladec saenna age ameg me qee bahic oqagan. Eunu age batut feigale!” aden. Age Mak 12.40 feiga.


15 “O loo je iwaladecca Farisica, age dana osol Juda kobolnu falicdugia iwaldocnu mahana jic cecelacca cobogina wagna ha cobogina. Dana eu Juda kobol ocob age uqa oloqanih jana bilec dana bahic mudegina. Uqa oloqanih jana bilecnu age wooladena. Eunu age me hihili coboc dana! Age walocca!” aden.

16 “Age dado madec qa amaga galuc mecca, age walocca! Age odi madegina, ‘Dana oso uqa tempelna mele ohis ena eu ceteh gauc. Euqa dana oso uqa tempelna gold bibilenna madena eu uqa mele ohis ena, cois uqa maden odi odigian,’ egina. 17 Age gad amaga galuc mec, cel ceteh eu Anut amegna matu? Age madegina, gold eu matufo, qee tempel eu matufo? Age dogina, gold eu tempelna bilina eunu tempel eu gold odudeceb gold eu Anutnu qagu bilina. Eunu tempel eu gold wooldona. 18 Odocob age je madegina, ‘Dana oso uqa ihanec cabal ijanna mele ohis ena eu ceteh gauc. Euqa uqa ihanec ceteh cabalna bibilen euna mele ohis ena, cois uqa maden odi odigian,’ egina. 19 Age amaga galuc mec, cel ceteh eu Anut amegna matu? Age madegina, ihanec ceteh cabalna bilina eu matufo, qee ihanec cabal eu matufo? Age dogina, ihanec ceteh eu ihanec cabalna bilina eunu ihanec cabal eu ihanec ceteh odudeceb ihanec ceteh eu Anutnu qagu bilina. Eunu ihanec cabal eu ihanec ceteh wooldona. 20 Eunu dana uqa ihanec cabalna mele ohis ena eu uqa ihanec cabalnaca ihanec ceteh cunug cabalna bilina eunaca mele ohis ena. 21 Odocob dana uqa tempelna mele ohis ena eu uqa tempelnaca Anut uqa tempelna bilina eunaca mele ohis ena. 22 Odocob dana uqa sao jobonna mele ohis ena eu uqa Anutna cabal bilecnaca Anut uqa uqana cabal bilecna bilina eunaca mele ohis ena,” aden.

23 “O loo je iwaladec Farisica, age agena ceelum filfil cabinadec am 10-pela qatanadimeig am osol eu Anut utegina. Age Anutna loo je ceteh nagnu geh cisdogina euqa Anutna loo je ceteh caunca eunu qee cisdogina. Age dana gesiladecnu kobol tutucca, waug qocca, wawaga meleecca eunu qee cisdogina. Age ceteh caunca ceteh nagca osoben odoubqa age qee odoloin. Age dado madec qa amaga galuc mecca! Age agena sabna galalec nag cedi helegina euqa kamel belucdocobil nona. Eunu age me hihili coboc dana! Age walocca!” aden.

25 “O loo je iwaladec Farisica, age agena gabinca bohca hibo eu gaid wasacudegina euqa age wawaga dunuhna heje oc kobolca ija didih ecca nijia. Eunu age me hihili coboc dana! Age walocca! 26 Hina Farisi, amen galuc mecca. Casac hina gabinca bohca waug dunuh wasacudagale. Odocom hibo nijia euha soidoc migian,” aden.

27 “O loo je iwaladec Farisica, age odi qalqalna meen hatin uqana gelgel age camasac waia senenecna baial joidein cinigwe. Qalqal meen hatin eu gelgel camasac fecnu galeca qa dunuhna cal mec dana tob tefulunuga ceteh gegehinca nijia. Eu odiwe ageha dana amagana meciadec eu tutuc odoc fegina qa wawaga dunuhna eu qauecca loo je tefacdocca nijia. Eunu age me hihili coboc dana! Age walocca!” aden.

29 “O loo je iwaladec Farisica, age je hahun madec dana agena qalqal meen hatin cehegina, age dana cajaca ititom agena amegu bala me bahic megina. Age odi oodoig madegina, ‘Jajanigeil bilein saen euna ege biloummiqa ege jajanigeil odoin eu ege qee odoum, ege je hahun madec dana aqocomun qee cal moub,’ egina. Eu madecnana age ege dana ebenega je hahun madec dana agena golanagaca eundec agena mel biluquna ec eu camasac megina. Eunu age me hihili coboc dana! Age walocca! 32 Eunu jajanagail age silail gumna o danecebil gemona tawen eu age o danecebil am bena. 33 Age man sononec me qee, age man sononec nag! Anut gesiladeceb eu adi oloqanih jana nuecnu cagasoqagan?” aden.

34 “Eunu feiga. Dana cajaca ititom cunug mahana bilein eu age golanaga basecdocob age dewenegana hugian. Age wele dana cajaca ititom aqecebil cal mein eu Ebelna golac basecdoc sanijec euna sanan mimei ehi lili Sekaraiana golac basecdoc ihoc len. Sekaraia, uqa Berekaia melah, age tempel hamol gunna ihanec cabalca gemona qocobil cal men. Wadacdoc eu cunug ititom sihul i dewenegana hugiannu ija je hahun madec danaca, Anutnu doc silecca danaca, Anutna je iwaladecca suladecemin ageca loqagan. Eundec age leih aqecebil cal moqagan. Leih na babalecna tuitu aqimeig caqusadecebil caculimeig cal moqagan. Leih age agena cuha jonana qisaadimeig aqati tootooadoqagan. Jobon osona bibilebil ititacadecebil busali jobon osona li bibilebil tooadi li ititacadoqagan. 36 Ija mele maadigina, aqecebil cal mein eu uqana ameg me qee oc cunug dana caja qila bilegina i dewenegana hugian,” aden.

Jisas uqa Jerusalemnu waloc don

(Luk 13.34-35; 19.41-44)

37 Jisas je haun maden, “O Jerusalem, Jerusalem, Anut uqa uqana je hahun madec dana ageca suladeceb lein. Euqa age meenna aqecebil cal mein. Ija saen mati bahic mala anag uqana nag hojonna jahuladigen imei utaadenawe agena dana cajaca gabanadimig ahutecnu gale tena, euqa age ijaca hocnu culein. 38 Ija maadigina, age ija qila haun qee mecituwain leceb age madoqagan:

‘Dana eu uqa Tibud ijanna hona Anut uqa eeldoiale,’
(Buk Song 118.26)

odi madimeig mecituqagan,” en. Eunu Anut uqa agena jobon culdina, odocob agena jo moti heleceb tawigian, dana euna qee biluwain.
(23.38-39)Grik jaqec je hilah leihna age je i qee nijel eu odi: “Anut uqa agena jobon culdina,” en.


Copyright information for `AEY