Matthew 27

Age Jisas ehudi li Pailat amegna mudein

(Mak 15.1; Luk 23.1-2; Jon 18.28-32)

1Walag daneceb ihanec dana benbenca Juda agena matuca cunug gabandumeig age Jisas qocobil cal migiannu je togodoin. 2Togodu hedumeig age Jisas eben libimeig ehudi limeig Rom gabman dana matu, Pailat, ebenna mudein.
(27.2)Pailat uqa Rom dana. Rom age uqa Juda agena cofadec dana ben mudein. Juda age Jisas qocobil cal mecnu ihoc qee nijel. Eu Rom himec age dana oso qocobil cal migiannu eu madecnu ihoc. Eunu Juda age Jisas ehudi limeig Pailat ebenna mudein.


Judas fadalen

(Aposel 1.18-19)

3Judas uqa Jisas dewegnu ob men eu uqa age Jisas qoqagannu geldocobil dumei uqa Jisasnu ob mennu deweg cijeceb waug tucien. Uqa meen qaig silwana mudec 30 ahu ihanec dana benbenca Juda agena matuca eundec ceseli adimei 4maaden, “Ija silail migan. Ija dana deweg jeca qee uqanu ob migan,” aden. Odocob age uqa jejeg hewi madoin, “Eu egena je qee. Eu hinana,” doin. 5Odocobil Judas uqa tempelna meen qaig silwana mudec 30 eu heleceb nocob tempel cuculi nuimei uqa be qagi caculimei cal men.

6Euqa ihanec dana benben age meen qaig silwana mudec 30 eu cedimeig togodudu madein, “Meen qaig silwana mudec 30 eu golacca, eu dana qonnu fajec eunu ege tempel cabinu meen qaig gabandocnu eu cois qee,” ein. 7Age togodu wawaga osol meceb nuimeig meen qaig silwana mudec 30 euna hal qagec dana uqana maha fajein. Maha eu dana ono jag bibili cal mein age heel cisadecnu qalqal biligiannu eu fajein. 8Eunu maha eu ijan Golac Maha qoin. Eu qila ageha odi madegina.
(27.8)Je i “qila” eu ege qila buk i sanijuquna eunu qee madena. Eu Matju uqana buk jaqen saen eunu madena.
9Eu odocna, je hahun madec dana Jeremaia, je maden eu ihoc len. Jaqec je eu wele odi madena:

“Age meen qaig silwana mudec 30 oin.
Eu Isrel dana caja age dana eu fajudecnu ameg odi gadac mein.
10Meen qaig euna age hal qagec dana uqana maha oso fajein.
Tibud maten odi odoin,” ena.
(Sekaraia 11.12-13; Jeremaia 19.1-13, 32.6-9)

“Hina Juda agena kingfo?”

(Mak 15.2-5; Luk 23.3-5; Jon 18.33-38)

11Jisas uqa gabman dana matu amegna tatawen gabman dana matu sisildu madon, “Juda agena king eu hinafo?” don. Odocob Jisas jejeg hewi madon, “Hina madagana eu odi himec,” don. 12Euqa ihanec dana benbenca Juda agena matuca age dewegnu je um qu mamadegin jejenega qee hewel. 13Odocob Pailat uqa Jisas madon, “Age dewennu je mati madegina eu qee dah melemfo?” don. 14Euqa Jisas jejeg qee hewel. Uqa dewegnu je madec osol dihnu ha je qee wadacdu madel. Eunu gabman dana matu eu geh cisdon.

Pailat uqa age Jisas na babalecna tuitu qoqagannu maaden

(Mak 15.6-15; Luk 23.13-25; Jon 18.39-19.16)

15Pailat uqa Juda agena Pasowa Sab Jec Benna gaid gihacdoc dana oso Juda dana age ceguli togodudu ijan madecebil uqa besituadoloi. 16Saen euna dana oso gihacdoc jona bilen eu uqa me qee odocnu binanca eu ijan Barabas. 17Pailat uqa Juda dana ben age Jisasnu macumac mimi uqa ebenna mudein eu don. Eunu Juda dana age ceguli bibilegin Pailat sisiladi maaden, “Qila in besituadigennu madegina, Barabasfo, qee Jisasfo age uqanu Krais egina?” aden. 19Pailat uqa odi gesiladec cabalna bibilen uqa aideg je odi suldocob hu madoin, “Ija witic i bebelecna uqa ola codigannu culumen ben tena. Eunu hina dana ititom i ceteh oso cain odudugaun,” doin.

20Ihanec dana benbenca Juda agena matuca age Juda dana cajaca wawaga hunecebil age Pailat Barabas besitugagale, Jisas na babalecna qogale doqagannu jajahiladi hedoin. 21Odocobil gabman dana matu haun hu maaden, “Dana lecis bilesina eu in besituadigen?” aden. Odocob age madoin, “Barabas,” doin. 22Pailat sisiladen, “Ija Jisas age uqanu Krais egina eu eeta odudigen?” aden. Odocob age madoin, “Na babalecna tuitu qoga!” doin. 23Odocobil uqa maaden, “Eetanu? Uqa cel qisol mec odon?” aden. Euqa age haun utai madoin, “Na babalecna tuitu qoga!” doin.

24Pailat uqa ija cilehadecwe qee age hihibanaga teceb figina imei uqa boh oso umei wa o danimei uqa age amagana eben cucusi maaden, “Ija dana i deweg jeca qee eu uqa golac ebenina qee fagdoiaun. Eu agena himec,” aden. 25Odocob dana cajaca cunug age jejeg hewi madoin, “Uqa golac ege dewenigena ege begawigeil dewenegana ha gad hoiale,” doin. 26Odocob Pailat uqa Barabas besiaden. Odimei uqa han dana maadeceb age Jisas ehudimeig qisadoin. Qisadu hedocobil uqa Jisas na babalecna tuitu qumeig caqusecebil caculimei cal mecnu han dana ebenegana muden.

Han dana age Jisas lelandoin

(Mak 15.16-20; Jon 19.2-3)

27Gabman dana matu uqana han dana age Jisas ehudimeig jo gabman dana ben bilia euna lein. Age gabman dana ben uqana cudunna mudein. Odimeig age han dana am cunug utaadecebil humeig osoben cegulein. 28Age lotoc hulitumeig lotoc golca oso eu king agena bala cinigwe tacitoin. 29Odimeig age halu dud lalic qumeig king katakat mudimeig gulodutoin. Odimeig age sih oso ebenna mimeig amegna gob cehimeig lelandudu madoin, “O Juda agena king, feele!” doin.
(27.29)Han dana age Jisas lelandocnu gale aden, eunu age kingwe tacudein. Saen euna king age lotoc golca, king katakatca bala hewoloig. Odimeig age king cabalna bibileig age kom hewoloig.
30Odimeig age cin qudimeig sih u ilo qisadoin. 31Age lelandu hedumeig lotoc golca hulitumeig uqana lotoc haun tacitoin. Odimeig age ehudi li na babalecna tuitu qocnu belein.

Age Jisas na babalecna tuitu qoin

(Mak 15.21-32; Luk 23.26-43; Jon 19.17-27)

32Age cali hohoig han dana age Sairinidec dana oso fein, uqa ijan Saimon. Age madocobil Jisasna na babalec gahidon. 33Belimeig age cudun, ijan “Golgota,”
(27.33)“Golgota” eu Aram je.
ono calein. Golgota ijan gug eu “Ilo gatic cudun.”
34Age wain ceteh gulihinca gabandoc eu jecnu Jisas utein. Euqa uqa ji fimei eu culen. 35Age Jisas na babalecna tuitu qumeig caqusecebil caculeceb uqana lotoc agedodoc satu udodoig siwi cedein.
(27.35)Grik jaqec je hilah leihna je oso fil nijia, eu odi: Age Jisas na babalecna tuitu qumeig caqusecebil caculen. Odocob je hahun madec dana maden “Age ijana lotoc agedodoc satu udodoig siwi cedein,” en(Buk Song 22.18) eu ihoc ligiannu uqana lotoc agedodoc satu udodoig siwi cedein.
36Odimeig age bilimeig ono mecidudu cofdoin. 37Age dewegnu je ob mein uqa ilo ohisna jaqi qoin, “Dana i Jisas, uqa Juda agena King,” ec jaqein.

38Age Jisas cemenug heje oc dana lecis na babalecna tuitu aqalimeig caqusalecebil caculesin. Oso eben meulana isec caculen, oso eben ansena isec caculen. 39Odocob dana cajaca age hu li i bileig age lelandudu ilomoga culidudu 40madein, “Hina tempel wagalimig deel cijed hedocob haun cehigen em, hinadodoc cahahadoga! Hina Anut Melahfi na babalecnadec toni naga,” ein. 41Ihanec dana benbenca, loo je iwaladecca, Juda agena matuca ageha lelandudu madein, 42“Uqa leih cahahaaden euqa uqadodoc cahahadocnu ihoc qee. Uqa Isrel agena King. Eunu uqa qila na babalecnadec toni neiale. Uqa odi odocobfi ege uqanu wawige meleigian. 43Uqa Anutnu waug meleena. Uqa maden, ‘Ija Anut Melah,’ en. Eunu Anut uqanu gale docobfi Anut qila besitoiale,” ein. 44Odocob heje dana ale uqa gami na babalecna tuitu aqalein eu aleha odi lelandosin.

Jisas cal men

(Mak 15.33-41; Luk 23.44-49; Jon 19.28-30)

45Odocob cam gemo ceheceb cam tu qocob hatu cunug gagatuc menen, ninijen li 3 kilok wesu. 46Odocob 3 kilok odi Jisas co suli u utai maden, “Eli, Eli, lama sabaktani?”
(27.46)Je madec i Aram je, age Galili hatuna madoloig, eu Jisas uqana je madec gug bahic. Grik jaqec je hilah leihna age nag fil jaqein eu odi: “Eloi, Eloi, lama sabaktani?” en.
en. Je uqana gug eu odi:

“Ijana Anut, ijana Anut, eetanu qisactaga?” en.
(Buk Song 22.1)

47Dana leih age ono talildu tawein je eu dah mimeig madein, “Dana eu uqa Ilaija
(27.47)“Eli, Eli” uqana hutan Aram jena eu “Ilaija” cinigwe.
utadona,” ein.
48Age oso mahuc guguli gege oso umei wain gulihinca tanumei balac oso euna gihacdumei suladu ehi li jecnu cona men. 49Euqa leih madein, “Sumuduga. Culecem ege uqa Ilaija humei cahahadugianfo, qeefo ec feqan,” ein.
(27.49)Grik jaqec je hilah leihna age je oso tubdu jaqein eu odi: Oso uqa sawal umei Jisas qeihna qon. Odocob golac waca cali hu busalen.
50Odocobil Jisas haun co suli u utaimei kis umei cal men.

51Odocob lotoc ben tempel hamol gunna caqusec tawoloi eu ohisdec baladu ni mahana cali lecisdon. Odocob mim neceb meen ulugedon. 52Qalqal meen hatin eu hudeceb Anutna dana cajaca mati bahic wele cal mein qila i age cajein. 53Age qalqal culimeig hibna Jisas ceseli cajeceb age Anutna jobon gun dunuh lein. Dana mati bahic age meciadein. 54Odocob Rom agena han ilo dana 100 cofadecca age uqaca tatawi Jisas cofdoin eu age mim neceb ceteh caleceb eu fimeig cumuni madein, “Mele bahic, dana i uqa Anut Melah!” ein.

55Caja matiha onoca tatawi fein. Age Jisas cesuldudu Galilidec toodu cocobi hoin. 56Age gemodec eu Maria Makdaladecca, Maria uqa Jems Josefca analaca, Sebedi melahul lecis analaca.

Age Jisas deweg ganac hatin aluh qeihna hunein euna mudein

(Mak 15.42-47; Luk 23.50-55; Jon 19.38-42)

57Cam toni nonon dana cehewanca oso, ijan Josef, uqa Juda agena jobon nag Arimatiadec, uqa hon. Uqa Jisasna malogom oso. 58Uqa Pailat amegna limei Jisas deweg ganac ugiannu sisildon. Odocob uqa maadeceb age Jisas deweg utein. 59Odocob Josef uqa Jisas deweg ganac umei lotoc senenec soidoc jeulden. 60Odimei uqa uqana meen hatin aluh qeih hunein euna mudein. Heel eu dana oso qee mudec Jisas casac mudein. Uqa meen koldoc ben oso olocdocob eu hatin jic cebec cufa qon. Odimei nuen. 61Maria Makdaladecca Maria osoca ale hatin amegna onoca bilesin.

Han dana age qalqal hatin cofdoin

62Deel ceteh saciadoc hedocob deel osona ihanec dana benbenca Farisica age li Pailat fein.
(27.62)Deel osona eu Juda agena cuha deel, eu egena cuha deel nag.
63Age odi madoin, “Dana Ben, ege je oso odi cisdoqona, uhulec dana i saen uqa cebac bilec je oso maden. Uqa odi maden, ‘Hibna deel cijed hedocob ceseli cajigen,’ en. 64Eunu hina gad madecem age cois limeig deel cijed ihoc ligiannu qalqal hatin eu cufa qu cuhadoqagan. Qee dodomun uqana malogom age humeig deweg ganac heje u belimeig age dana cajaca uhulec je odi maadowain, ‘Uqa cal mecnadec ceseli cajeian,’ adowain. Eu agena uhulec je haun eu, eu uhulec je wele maden eu wooldocdain,” doin. 65Odocobil Pailat odi maaden, “Age han dana cedi hewi belimeig maadecebil qalqal hatin eu cofdu tawoqagan. Age belimeig ceteh cunug age odocnu madegina eu qalqal hatin eu gagadic cufa qoiga,” aden. 66Odocob age beli qalqal hatin cufa qu cuhadoin. Age gun mudecnu sisi mec oso meen heel cufa qocna tawen eu tatacan mein. Odimeig age han dana qalqal hatin cofdocnu madein.

Copyright information for `AEY