Matthew 4

Seten uqa Jisas temdu fen

(Mak 1.12-13; Luk 4.1-13)

Saen euna Seten uqa Jisas temdu figiannu Kis Gun uqa Jisas iwaldocob wadauna
(4.1)Age je Matju 3.1na nijia eu feiga.
nuen.
Uqa deel 40 cahineg witicca sab qee jec bilen. Saen hedocob wen don. Wen dodon temgec eu uqaca limei madon, “Hina Anut Melahfi meen i maadecem sab ibuldocob jaga,” don. Euqa Jisas uqa Seten jejeg hewi madon, “Anutna jaqec je eu odi madena:

‘Sab jec himec dana cebac bilec qee adena qa
je cunug Anut conadec cali hona eu
dana cebac bilec adena,’ ena,” don.
(Loo 8.3)

Odocob Seten uqa Jisas ehudimei jobon gunna ehi ti tempel qab tatacanna muden. Mudimei madon, “Anutna jaqec je eu odi madena:

‘Anut uqana ensel maadeceb
hina jaim meenna qee tudoiaunnu
age hina ebenegana hewihi ehi ni mihuqagan,’ ena.
(Buk Song 91.11-12)

Eunu hina Anut Melahfi busali tonoga,” don.

Jisas Seten jejeg hewi madon, “Anutna jaqec je osoha madena:

‘Tibud, hinana Anut, eu cain temdu fagaun,’ ena,” don.
(Loo 6.16)

Odocob Seten uqa haun Jisas ehudi aluh benna ehi ti muden. Mudimei mahamaha cul cunug agena tumutum cahulecca ihacdudu madon, “Faga, hina amina gob cehi ijanu cuha fecemfi fagana eu cunug culihigen,” don. 10 Odocob Jisas Seten jejeg hewi madon, “Anutna jaqec je odi madena:

‘Tibud uqa hinana Anut uqanu cuha faga,
uqa himec cewel utugale!’ ena,
(Loo 6.13)

Eunu Seten, cuculti nuuga,” don.

11 Odocob Seten uqa Jisas cuculdi nueceb ensel age hu Jisas cewel utoin.

Jisas uqana cabi Galili hatu ono sanan men

(Mak 1.14-15; Luk 4.14-15)

12 Aria, Jisas uqa age Jon hewimeig gihacdoc jona mudein ec dumei uqa Galili hatu ono nuen. 13 Odimei uqa Nasaret culimei Kapaneam jobon nui bilen. Kapaneam jobon eu Galili wa gad cagocna isec nijina, eu Sebjulan sihulca Naftali sihulca agena hatu gadac nijina.
(4.13)Wele Isrel sihul lecis, eu Sebjulan sihulca Naftali sihulca, age Galili wa gad cagoc cemenug biloloig. Euqa Jisas uqana saenna agena hatu eu Galili hatu naha oso calen.
14 Je hahun madec dana, Aisaia, je oso wele maden eu ihoc ligiannu odi odon. Uqa odi jaqen:

15 “Sebjulan sihulca, Naftali sihulca, alena hatu eu
Galili wa gad cagocna isec nijia,
Jodan Wa ono isec,
Galili hatu Juda dana qee eundec agena,
16 hatu euna dana cajaca age tuna biloloig
eu fulacdoc ben oso fein,
dana cajaca age cal mec hatuna tuna biloloig,
eu fulacdoc ben oso iletaden,” Aisaia odi jaqen.
(Aisaia 9.1-2)

Jisas uqa dana 4-pela utaadeceb toodoin

(Mak 1.16-20; Luk 5.1-11)

17 Saen ina Jisas uqa dana cajaca je qasali maadi sanan mimei maaden, “Sao cul jobon eu age cemenega hona. Eunu agena silailnu tului falicdoigale,” aden. 18 Jisas uqa Galili wa gad cagocna cocobi dana oso waliagca fecialen, eu Saimon, age Pita egina, uqa waliag Andruca. Ale cimec ben wana hehelesin fen. Ge, age cul dool cedec dana. 19 Odocob Jisas maalen, “Hu tootecebil ija odalecemin ale dana cajaca cedadowasan,” alen. 20 Maaleceb mahuc bahic alena cimec ben cuculesi uqa toodu belesin.

21 Uqa nag bahic onoca limei dana oso waliagca fil fecialen, eu Jems, uqa Sebedi melah, uqa waliag Jonca. Ale memela, Sebedica, agena wagna bibileig cimec ben tatalec eu haun wewegi bilein. Odocob Jisas utaalen. 22 Mahuc bahic ale wag memelaca cuculadi limesi Jisas toodu belesin.

Jisas me je maaadei dana cajaca mati me maden

(Luk 6.17-19)

23 Jisas uqa Galili hatu cunug cocobi nuen. Uqa Juda agena cuha jonana limei dana cajaca iwaladen. Odimei uqa sao cul jobonnu me je qasali maaden. Odimei uqa dana cajaca agena hag filfilca age dewenega laleg mein eundec filfilca me maden. 24 Age uqa hutannu je saec eu Siria hatu cunugna ihoc len.
(4.24)Rom age Juda dana cajaca cofadein saenna Isrel hatu eu hatu ben Rom age Siria ein euna nijen.
Odocob age dana cajaca hag gug filfil me qee maden eundecca, dain ben aden eundecca, buga me qee hewadein eundecca, dana caja titi hudec hagca age gaid dewenega qeleceb toni mahulegina eundecca, dana tefulunuga laleg mi cal mein eundecca cedadi Jisasca ahocobil Jisas uqa me maden.
25 Dana cajaca am ben age Galili hatunadecca, Dekapolis
(4.25)Dekapolis uqana gug eu jobon 10-pela.
hatunadecca, Jerusalemdecca, Judia hatunadecca, Jodan Wa ono isec hatunadecca age toodu belein.

Copyright information for `AEY