Romans 10

Pol Isrelnu inondon

O wawaga meleec cotiel, Anut Isrel dana cajaca cahahaadecnu wawi ben nijia, odocob saen cunugna ija Anut agenu inondugina! Ija eu agenu du cuhadugina eunu qasali madigina. Eu age Anutna kobol toodocnu gagadic bahic megina. Euqa age odi odogina eu fogo adecca qee. Age Anutna kobolna ege dana cajaca ititom gena eunu age qee dogina. Odocob agedodoc agena ititom kobol camasac mudec cabi ogina. Age Kraisnu wawaga qee meleel. Eunu age Anutna kobol ege dana cajaca ititom ec madena eunu qee jogoegina. Ege doqona, Krais uqa loo je eu ihoc toodu li hedon. Eunu dana cajaca cunug Kraisnu wawaga meleena age ijanaga dana cajaca ititom eu ogina.

Cunug age Anutnu wawaga meleena Anut cahahaadigian

Moses uqa Anut age dana cajaca ititom ecnu loo je toodoc kobol eu dana cajaca age odi odocnu je jaqen. Uqa odi maden:

“Dana oso uqa loo je eu toodu odona eu uqa loo jena jic cobona,” en.
(Wok Pris 18.5)

Euqa dana waug meleeceb Anut dana cajaca ititom ec madec kobol eunu je odi madena:

“Hina wawin odi cain madagaun, ‘In uqa sao jobon tigian?’ agaun.
(Loo 30.12)

Hina Krais ehudi ehi nigiannu odogona.
Odocob hina odi cain madagaun:

‘In uqa maha heel ben eu dunuh bahic non gugca qee euna toni nugian?’ agaun.
(Loo 30.13)

Hina Krais ehudi ehi nu cal mec cudunnadec bigiannu odogona,” ena.
Euqa hina conna Jisas uqa Tibud ec qasali madaganafi hina wawinna Anut uqa cal mecnadec tulidocob ceseli cajen ec wawin meleenafi Anut hina cahahaheigian. Eunu je eu uqana gug eu odi madena:

“Je eu hina cemein bahic bilina.
Eu hina connaca wawinnaca bilina,” ena.
(Loo 30.14)

Je eu ege wawige meleec je ege qasali madoqona.
10 Eu odi je hahun jaqec madena:

“Dana cunug age Tibud ijan uutaegina eu Anut uqa cahahaadigian,” ena.
(Joel 2.32)

Odocob Juda danaca Juda dana qee eundecca eu age caca himec. Tibud osol himec uqa ege cunug egena Tibud. Uqa uqana eeldoc me bahic dana cunug uqa cesuladecnu utadogina eu age adena. Odocob Anutna jaqec je odi madena:

“Dana cunug age uqanu wawaga meleena
eu age majanaga qee adeiaun,” ena.
(Aisaia 28.16)

Eunu ege wawige meleeceb Anut egenu dana cajaca ititom ec madena. Odimeb ege conigena wawige meleec qasali madocomun Anut cahahagigian.

14 Euqa age uqanu wawaga qee meleecebfi adi uqa ijan utadoqagan? Odocob age uqana je qee dufeig eu adi uqanu wawaga meleigian? Odocob oso uqa me je qee qasali maadecebfi eu adi doqagan? 15 Odocob Anut uqa je qasali madec dana qee suladecebfi eu adi je qasali maadoqagan? Eu odi Anutna jaqec je madena:

“Dana age me je ahogina saen euna dana cajaca age me bahic celeboegina!” ena.
(Aisaia 52.7)

Isrel dana cajaca cunug age me je qee oloin

16 Euqa cunug age me je eu qee oloin. Aisaia uqa odi maden:

“O Tibud, in uqa egena je eu dah meceb waug meleen?” en.
(Aisaia 53.1)

17 Eunu oso Kraisnu qasali maadeceb age me je dah megina. Odocob dana cajaca age me je dah mimeig wawaga meleena.

18 Euqa ija sisiligina, age me je eu qee dah meleinfo? Qee bahic! Age wele dah mein. Anutna je odi madena:

“Age jejenega eu maha cunugna ihoc len.
Odocob agena je eu wele jobon cunugna ihoc len,” ena.
(Buk Song 19.4)

19 Euqa ija haun sisiligina, Isrel dana cajaca age me je eunu qee fogo adenafo? Qee bahic! Age wele fogo aden. Moses uqa casac maden:

“Ija dana cajaca sihul oso cedigen.
Eu age ijanagaca qee, age ceteh gauc, age docca qee.
Ija kobol eu odigen, odocob age eunu amaga qocob gemanaga bigian,” en.
(Loo 32.21)

20 Odocob Aisaia uqaha Anutna je gagadic odi maden:

“Dana cajaca ija qee walitelein eu age ija wele guluctein.
Dana cajaca age ijanu leih qee sisiladelein eu ija age amagana camasac calem,” en.
(Aisaia 65.1)

Euqa Aisaia uqa Isrelnu odi maden:

“Cahineg cunug ija dana cajaca feeii je me qee wadacdu mamadi coboc eundec agenu age cahahaadecnu ebeni mem,” en.
21 (Aisaia 65.2)

Copyright information for `AEY