Romans 16

Pol dana cajaca feele ec maaden

Age Fibi, ege cebinamige, lalafan oqagannu wawi nijia. Uqa Senkria tamanec cesuladec cabi caja. Age Anutna dana cajaca qagoc Tibud ijannu cisdodoig Fibi ehudecebil age gemo biligiannu wawi taweia. Ege Anutna dana cajaca kobol odi odoum eu me. Odocob uqa dana cajaca geh cesuladen, odimei ijaha cesulten. Eunu uqa ceteh osonu culumencafi age cesuldoiga.

Priska Akwilaca ale Krais Jisasna cabi hijiel eunu age ijana feele ec aleiga. Eu ale cal mec dodolaalen cesultesin. Eunu ija himec hetesin qee alelem qa Juda dana qee agena tamanec cunugha hegein alesina.
Odocob ijana feele ec tamanec eu alena jona cegulegina eu ageha adeiga.
Age ijana feele ec Epinitas uteiga, ijana danah bahic. Uqa Asia hatu gadac nagnadec dana eu casac Kraisnu waug meleecca calen.
Age ijana feele ec Maria uteiga. Uqa age cesuladecnu cabi gagadic on.
Age ijana feele ec Andronaikas Juniasca aleiga, eu ale ijana sihulnadec, eu ale ijaca gihacdoc jona bilom. Ale aposel gemona ijanalaca, odocob ija Kraisca qee lec eu ale Kraisca casac lesin.
Age ijana feele ec Amplietas uteiga, uqa Tibudna kobolna eu ijana danah bahic bilia.
Age ijana feele ec Eben uteiga, uqa Kraisna cabinu cabi hi. Odimeig Stekisha ijana feele ec uteiga, uqa ijana danah bahic bilia.
10 Age ijana feele ec Apelis uteiga, uqa Krais toodocnu ijanca.
Age ijana feele ec Aristobjulas uqana jo osol eu age adeiga.
11 Age ijana feele ec Herodion uteiga, uqa ijana sihulnadec.
Age ijana feele ec Nasisasna jo osol eu age adeiga, eu age Tibudna bilegina.
12 Age ijana feele ec Traifina Traifosaca aleiga, eu ale Tibudna cabinu cabi gagadic esina.
Age ijana feele ec Pesis uteiga, uqa ijana caja danah bahic. Uqa Tibudnu cabi gagadic bahic on.
13 Age ijana feele ec Rufas uteiga, uqa Tibud toodocnu dana me bahic. Odocob uqa anag euha feele ec uteiga, uqa ija au odi bilina.
14 Age ijana feele ec Asinkritasca Fligonca Hemisca Patrobasca Hemasca, odocob cotiel eu ageca bilegina eu age cunugca odi adeiga.
15 Age ijana feele ec Filologas Juliaca aleiga, odocob Nerias cebinagca Olimpiasca Anutna dana cajaca qagoc eu age gami bilegina eu cunugca feele ec adeiga.
16 Anutna dana cajaca egena kobol age osolosol cunug cotogail cotec gunna cotdocobdocobeigale.
Kraisna tamanec cunug age feele ec adegina.

Dana leih age tamanec qatanegina

17 O wawaga meleec cotiel, ija cesusadigina. Dana leih age tamanec qatanegina. Age wawaga meleec dana cajaca je iwaladein eu hibemdocnu sigaladein. Age agena wawaga meleec wagalegina. Eunu age dana eundec hibemadeiga. 18 Dana eundec egena Tibud Krais qee cewel utogina. Age agedodoc agena gale adec dewenega eu himec toodogina. Odimeig je tincana dana diadec jenaca dana wawaga meleec eu gagadicca qee eundec wawaga meleec temdocwe megina. 19 Rom tamanec, age Anutna me je toodu odogina ec eu dana cunug wele dah mein. Eunu ija agenu ceeligina. Euqa age kobol me bahic eu doqagannu wawi taweia, odocob kobol me qeenu qee cisdowain. 20 Odocob Anut uqa malol bilec eu saen nag odi Seten lahacdocob jaimaga bisalu nugian.

Egena Tibud Jisas Krais uqana eelgec uum igec eu ageca biliale.

Dana leih age Rom dana cajaca feele ec maadecnu suladein

21 Ija cabi hi Timoti uqa uqana feele ec ageca suldona. Odocob Lusiasca Jesonca Sasipataca eu age ijana sihulnadec ageha agena feele ec ageca suldogina.

22 Ija Tetias, ija Pol cogulna je uganu je i jaqigina, ija Tibud ijanna feele ec ageca suldugina.

23 Gaias uqa feele ec ageca suldona. Uqa uqana jona me bahic coftena, odimei uqa tamanec cunugha odi cofadena.

Erastas uqa taun ben ene uqana kuskus uqaca ege cotige Kwotasca eu ale feele ec ageca suldosina. [Krais Jisas uqana eelgec uum igec ageca biliale. Mele.]

Ege Anut binan sulec bahic suleqan

25 Me je ija qasali madigina eu Jisas Kraisnu me je. Me je eu wele bahic jahunec bilen eu qilaqa Anut uqa camasac muden. Anut uqa me je euna agena wawaga meleec gagadic tawigiannu ihoc odona. 26 Qilaqa Anut odocob je hahun madec dana agena jaqec jena me je eu camasac caligian. Anut uqa bileceb catanena uqa madeceb dana cajaca mahana cunug bilegina eu age me je eu dah mein. Eunu dana cajaca cunug age wawaga meleeceb me je eu toodoin. 27 Anut eu uqa osol himec uqa docca bahic. Uqa ceteh cunug Jisas Krais umna odon eunu ege binan sulocomun cataneiale! Mele!

Copyright information for `AEY