Romans 2

Anutna gesilec eu tutuc bahic

Eunu dana cunug age dana gesiladegina, age agena cahuldoc jajahuni madi, ija Anut qee hibemdolom ecebilfi agena je eu cesuladecnu ihoc qee. O dana, ija age osolosol maadigina. Dah maga, hina dana oso gesildogona eu uqana kobol hina himec kobol eu odi odogona. Eunu hina gesildoc dana eu odi odogona eu hinadodoc dewen jeca muduguna. Ege doqona, Anut uqa ameg me qeena dana kobol odi odogina eundec wadacadena. Odocob Anut dana eundec ameg me qee wadacadena eu gesilec tutuc bahic. Odocob hina dana leih kobol odi odogina eu gesiladagana qa hinadodocha odi odogona hina adi cisdogona? Hina Anut ameg me qee wadacdoc qee gulucdogaun ec cisdogonafo? Qee bahic! Hina Anut ameg me qee wadacdoc gulucdogan. Anut uqa hina me bahic odihina odimei saen cecelac sumihina, odocob ameg me qee mahuc qee ihina. Anutna kobol me bahic eu ceteh gauc himec ec cisdogonafo? Anutna kobol me bahic eu hina wawin tului falicdocnu acahna eu hina qee dogonafa? Euqa hina wawin eu gagadic bahic odocob hina wawin qee tului falicdogona. Kobol eu odina hinana wadachec ameg me qee haudocwe magana. Odocob Anutna gemag bec camasac migian deelna uqana gesilec tutuc deel euna hinana wadachec ameg me qee ogan. Anut uqa

“dana cunug agena odocnana gesiladimei ameg wadacadigian,” en.
(Buk Song 62.12; Sindaun 24.12)

Leih age kobol me eu gagadic hewegina oodoig kobolkobolca ijanaga benca biluqagannuca cebac bilec qee mecwe qee eu megegina. Dana eu agenu Anut uqa cebac bilec gaid bileceb catanigian eu adigian. Odocob leih age agedodocnu himec cisdogina, odimeig mele je eu hibemdogina, odimeig kobol me qeena jic eu toodogina Anut uqa dana eundecnu gemag beceb ameg me qee bahicna wadacadigian. Culumen ben sogoecca eu dana kobol me qee odogina eundec cilehadigian. Juda dana age casac ocobil Juda dana qee eundec ageha oqagan. 10 Euqa dana cunug age kobol me odogina eu Anut uqa kobolkobolca binan benca wawaga malol bilecca eu adigian. Juda dana eu age casac adeceb Juda dana qee eundec ageha adigian. 11 Ge, mele Anut uqa dana ijancanu cisdudu qee gesilina. Uqa dana cunug age ijanagacafo, qee ijanagaca qeefo ihocihoc cisdudu gesilina.

12 Eu odi. Dana cunug age Mosesna loo je qee dodoig silail megina eu age loo je qee dodoig fadaloqagan. Odocob dana cunug age loo je dodoig qa silail megina eu Anut uqa loo jena gesiladigian. 13 Dana age loo je gauc dah megina age Anut amegna ijanaga dana ititom qee. Dana loo je toodu odogina age dana ititom ijanaga eu oqagan. 14 Juda dana qee eundec age Mosesna loo jeca qee, sihul euqa age leih loo je toodu odogina. Dana eu age loo jeca qee age odi odocobil agena toodu odoc eu agedodocna loo je cinigwe. 15 Agena odocna loo jenu odoc Anut wawagana jaqen taweia eu camasac men. Odocob agena cisdoc silec ihulahal calena odocob saen leih kobol odogina eunu cois ec madeginafo, qee cois qee ec madeginafo. 16 Eunu ija me je madigina euna deel osona hibna Anut uqa Jisas Krais umna dana cunug agena cisdoc jahunec nijina eu gesiladigian.

Juda dana age loo je himec cesuladigiannu cisdogina

17 Euqa hina Juda danafi hina adi biliga? Hina loo jenu wawin meleecca eu hina gesilhec saenna ihoc cesulhigian eu odi cisdogona. Hinadodoc binain susuleg madagana, “Ija Anutna dana,” agana. 18 Hina Anutna cisdoc gale doc eu dogona. Hina loo je eu wele iwaldom eunu hina kobol me himec gale hena. 19 Hina gaid odi cisdogona, “Ija wele loo je iwaldom, odocob ija doc gug mele jeca ha om. Eunu ija ihoc dana amaga galuc mec jic iwaladigen. Ija dana tucana bileig agena fulacdoc. Ija dana docca qee eundec iwaladec dana. Ija mel simsim agena iwaladec,” dogona. 21 Mele hina dana leih iwaladagana qa hinadodoc ha qee iwaldogonafo? Hina oso heje cain ogaun ec madodog qa hina heje ogonafo? 22 Hina oso hina dana osona cajaca cain nijuwasin ec madodog qa hinadodoc dana osona cajaca nijesinafo? Hina uhulec kadan tibud qee gale hena qa hina kadan tibud agena cuha jonana ceteteh heje cedaganafo? 23 Hina hinadodoc binain susuli madagana, “Ija Anutna loo je dugina,” agana qa hinadodoc loo je tefacdogona, odocob kobol euna hina Anut ijan me qee mudugunafo? 24 Mele eu Anutna jaqec je odi madena:

“Juda dana age agena cahuldocna himec Juda dana qee am gemona Anut ijan qesaldogina,” ena.
(Aisaia 52.5; Esekiel 36.22)

Deweg ganac cagoc kobol tutuc eu odi

25 Hina Mosesna loo je toodu odifeg hinana dewen cagu qoc kobol eu kobol me bahic. Euqa hina loo je tefacdufeg dewen cagu qoin eu kobol dewen cagu qee qoc cinigwe. 26 Eunu dana deweg cagu qee qoc uqa loo je gadac uqana kobol ititom bahic toodufei dana eu uqana deweg cagu qee qoc eu deweg cagu qoc kobolwe caligianfo? 27 Odocob dana age dewenega cagu qee qoc qa loo je toodu odogina eu age hina dewen cagu qocca loo jeca qa loo je qee toodu odogona eu gesilhoqagan. 28 Dana oso uqa deweg himec uqa Judafi uqa eu Juda bahic qee. Odocob dewenega cagu qoc kobol eu dewenegana ceteh himec qee. 29 Dana uqa waugna uqa Juda ena eu uqa Juda bahic. Odocob dewenega cagu qoc kobol eu wawagana ceteh. Eu loo je jaqec gadac himec toodocnu ceteh qee. Eu Anutna Kis ceteh jaqunec. Dana uqa waugna uqa Juda ena eu uqa dana amagana binan sulec qee ona qa uqa Anut amegna binan sulec ona.

Copyright information for `AEY