Romans 9

Pol Isrelnu waug qon

Ija Kraisna dana eunu je mele madigina. Ija qee uhuligina. Odocob Kis Gun uqa ijana cisdoc silec cofdona eunu ija qee uhuligina ec ha madena. Eu mele, ijana dana cajacanu ija waloc teten saen cunug ija wawi dain tena. Eu age ijaca golanige osol bahic. Eunu ija cotiel agenu eu mele ija odoc jiccami Krais inondocomin ititacteceb agena cudun umig fadaloum. Age Isrel sihul, Anut uqa uqana mel maden, uqa uqana fulacdoc ben aden. Anut uqa ageca bal je cehaden, uqa uqana loo je aden. Odocob age Anutnu cuha fec kobolca Anutna je hahun madecca oin. Isrel dana weledec ijanagaca matu eu age jajanagail himec. Odocob agena sihulnadec himec Krais uqa dana ibuldon. [Krais uqa cunug agena ilo, uqa Anut.]
(9.5)Grik je eu gadac ina [ ] nijia eu falicdoc je fil osoha nijia, eu odi: Anut uqa cunug agena ilo.
Ege binan sulocomun cataneiale! Mele!

Pol uqa Anut Isrel dana cajaca adi cofadennu maden

Ija Isrel dana cajacanu saen cunugna waloc tena qa dana cajaca Isrel sihulnadec calein eu age cunug eu age Isrel bahic qee. Eunu ija Anutna je hahun madec qee aig qolnu qee cisadegina. Eu odiha Ebrahamna sihulnadec calein eu age cunug eu age Ebraham melahul ategul asagul bahic qee. Wele Anut uqa Ebraham madon:

“Hina sihulel toohi caloqagan age Aisak sihulna himec caloqagan,” don.
(Jenesis 21.12)

Eu uqana gug eu odi. Mel mel aid age golanaga madec kobolna himec calegina eu age Anutna mel mel aidca bahic qee. Euqa mel mel aidca age Anutna je hahun madecna kobolna calegina eu age himec Ebraham melahul, ategul, asagul caloqagan. Ge, Anut uqa je hahun madecna eu odi madena:

“Ija saen euna ceseli hugen ec wele madem,
odocob saen euna Sera uqa mel manahal basigian,” ena.
(Jenesis 18.10, 14)

10 Eu odi himec qee. Rebekaha uqana mel lecis ale memela osol, eu Aisak ege jajanige. 11 Euqa Anut uqa uqana cisdoc himec toodona. Eunu uqa uqana dana cajaca biluqagannu uqana cisdocna himec uqadodoc dana cajaca gesiladi ehaden. Uqa danana cabinu qee cisdona. Uqadodoc dana utaadena. Eunu wele mel lecis eu ale qee cali hocna kobol meca me qeeca eu qee odolosin, 12 saen euna uqa Rebeka madumei madon:

“Matu eu milum bisalu biligian,” don.
(Jenesis 25.23)

13 Eu odiwe Anutna jaqec je odi madena:

“Ija Jekobnu nalug mem qa ija Iso sagagdom,” ena.
(Malakai 1.2-3)

14 Eunu ege eeta ec madecnu? Anut uqa Jekob nesili ehuden qa Iso qee nesili ehudelnu, “Anut uqa kobol ititom qee odi odon ecnu,” odi madecnufo? Qee bahic! 15 Ge, uqa Moses madon:

“Ija dana osonu wawi nijecebfi
eu uqanu wawi qugian.
Ija dana osonu wawi qocobfi
eu uqanu waloc tigian,” don.
(Kisim Bek 33.19)

16 Eunu Anut uqa dana osoosofo gesildon eu danana cisdocnaca danana cabi ocnaca eu odi qee odona. Euqa Anut uqa uqana waug qocna himec dana gesildon. 17 Eu mele, Anutna jaqec jena Anut uqa Fero madon:

“Ija hina dewenna eu ijana gagadic odoc dana cunug foqagannuca, odocob dana cajaca mahamaha cunugna bilegina eu age ija ijani doqagannuca odihecemin king calem,” don.
(Kisim Bek 9.16)

18 Eunu Anut uqa osonu waug nijina eu uqanu waug qona. Odocob uqa oso waug menecnu cisdona eu waug menena.

Anutna gemag becca uqana waug qocca

19 Euqa age eundec oso odi matigian, “Eu odifi eetanu Anut uqa danana odoc me qeenu wadacadigen ec madena? In oso uqa Anutna cisdoc toodocnu ihoc qee?” tigian. 20 Euqa hina cel dana hina Anutna je wadacdu madogona? Hal eu dana muden uqa madona:

“Hina eetanu ija edi muditem?” dona
(Aisaia 29.16; 45.9)

eu odi qee nijel.
21 Hal mudec dana uqa maha cudun osolnadec umei hal lecis mudina, oso eu hal me bahic odocob cabi me ocnu deel benna, oso eu hal gauc cabi ocnu deel cunugna. Eu odi eu cois qee aganafo?

22 Anut uqa uqana kobolkobol gagadicca egenu uqa waug qoc camasac mudecnu gale don. Ege uqana kobolkobol ceteh me bahic amca ocnu uqa wele hanoigen. Egeha uqa utagen, ege Juda sihulnadec himec qee utagel qa ege Juda dana qee eundec sihulnadec euha utagen. Eunu Anutna odoc eu odiodi odon. Uqa uqana gemag bec camasac mudecnuca, uqana gagadic odoc dana cunug fecnuca eu gale don. Eunu agenu gemag bena uqa fadaladecnu mudaden eu camuhulaadi saen cecelac fadaladecnu sumaden. 25 Uqaha Hoseana je hahun jaqecna odi maden:

“Dana cajaca ijana qee eu age ijana dana cajaca adigen.
Odocob sihul eu agenu ija nalunuga qee melem eu ija agenu nalunuga mec adigen.
(Hosea 2.23)

26 Odocob cudun ono euna age maaden, ‘Age ijana dana cajaca qee,’ aden
cudun euna bahic age Cebac Bilec Anut melahul adoqagan!” en.
(Hosea 1.10)

27 Odocob Aisaia Isrelnu utai maden:

“Isrel sihul eu lanna esic nijina odi fulusdocobfi cois Anut am nag odi himec cahahaadigian.
28 Eu mele, Tibud uqa uqana je gesilec eu qee mudimei mahuc bahic dana cajaca mahanadec agena ameg wadacadigian,” en.
(Aisaia 10.22-23)

29 Odocob Aisaia uqa eunu wele je hahun maden eu odi:

“Tibud Gagadicca uqa egena mel mel aidca am nag odi qee culadeceb biloubmi ege fadalgoub eu odiwe uqa Sodom Gomoraca fadaladoub,” en.
(Aisaia 1.9)

Isrel age me jenu wawaga qee meleel

30 Eunu ege eeta ec madecnu? Ege odi madecnu. Juda dana qee eundec age Anutna ititom kobol ocnu cabi qee melein eu age Anutna ititom kobol wele oin. Anutna ititom kobol eu wawaga meleecna oin. 31 Euqa Isrel age Anutna ititom kobol ocnu loo je euna toodoin eu age Anutna ititom kobol qee gulucdoloin. 32 Eu eetanu? Age wawaga qee meleecebnu Anutna ititom kobol qee oloin. Eu age cabi ocna odocnudih wawaga nijen. Eunu age jaimaga meenna qeti aqeceb toni mahulein. Anutna jaqec je oso eu odi madena:

“Feiga! Ija Saion ono meen oso migina.
Meen eu dana qeti aqeceb toni mahuluqagan.
Dana age uqanu wawaga meleigian eu ija agenu majani qee teiaun,” ena.
33 (Aisaia 8.14; 28.16)

Copyright information for `AEY