1 Corinthians 16

Yerusaremí Ma Vain Monó Nanin Banta Ayain Moní Ma Átaruin Baya Ino

(Romu 15:25-29; 2 Korin 8-9; Karesia 2:10)

a Yerusaremí ma monó nanin banta aya ono van átaru uáden nan bain moni san mi siamenté uno. Mai ma siaméku Karesiá nanin banta ayaeonaí eya vá betin aya ono. Ena ena Santesí ma intiya siretiyan ma yoriyaona aa fáké ma moní dosiyaona vá daídeya susu siantan monisá ákonafin kaono. Téin nan me sintí moní átaru ono van muno sire ída vá tive iya vano. Téi ma oronté maé mai ma Yerusaremí nanin banta aya ino van ma amusin baren orin kéká aní uresin baré in nain kayoi mo máan ná ono siré bompon uvaman amenté uno. Inká téi ma inékun kama ukhan nain nan mi siretin má manápá oró tifanté uno.

Pori Ma Mónó Doran Kéká Ayaino Van Ina Ein Baya Ino

b Masedoniá barafá orono van iyaruna ma onobé maé inaimpáké tiretin e onanté uno. c Téi ma inikheruna iyonin damú ma siretin má manáa o vákun iyonin ma kípavintí ma orono van éku mae sireti anon tivire mo sifa in nono. Taréa ma sireti vaonafá ma oronté maé ída ainé tiretin me ampiré orono van mumpo Bafan mano ma kana ino sin nain nan mi siretin má manáa ayáká o vanté uno. Máan tonté umpo saréa Efesasí barurá bákun maen Pentíkosi yamú afoká uvintíi vetin me ampenté uno. d Mai fara vara seyo, mará kákan doran baká dorano van iyákun kokhon nanin banta ano ineno van iyan mifo manáa kéká ano séin namuroí usintiyan mino.

10  e Timoti ma sireti vaonafá orintiya vá téi ma erunaíen Bafani yorarí iyain banta ifo véin kama uresin ná bano. 11  f Ída vá áesin manáa kéká ano véin oman aniana ino. Timusin iyáké béin má manáa mumunan kéká bá onano van iyá umpo véi ma avire me afa iyákeya ará kusin masá tiantan erino.

12  g Mumunan tifá tiváeyan mano ma siretin oman oniyain kéká bá teti sifá tiváe Aporosi ma san tiretin mo onano van ena ena sútúpiyákun mifo véi ída oriyan mino. Máan tiyain béi ma orono van inin nain damúi siretin o onanten mino.

13 Tiretiyan dafían ákona ukheya vá puntákein mumunantá mantaan ákona ukheya ída feran daná bantiya vá ákona ukhe vano. 14 Minó danasinta ma varanteya avábá in avúavá póké ana vá barano.

15  h Akaiá
16:15Akaiábara maen Kiriki akhempái van mino.
barafá onen nan maen Stefanasin má bei kéká bá naren monó baya iniren mumunan iyáken betiyantá ena mumunan kéká ayain dorarí ein mi vakái mumunan tiyofi sifá tiváeyan noe, siretin ákona é tiamiyá uno.
16 Máan avúaváká teya ma ma aví teruna kéká bá inká pura sen ma monó dorarí iyain kayo vá kama e yafiseno van mi siamiyá uno. 17 Tiretin má ída mará ere ompo Stefenasin má Fotunatusin má inká Akaikusin má ma sireti vaona fákena ma ayain danasinta varen erein nan mi kákan timusin iyákéi oné uno. 18 Mai ma siretíi mumunan ákona uantiyá einíen mi senti mumunan me ákona usinten mino. Máan ma en kama yorarí iyain kékasá amusin uantano.

Pori Ma Sipá Amusin Baya Sein Mino

19  j Esiá barafá ma vain mumunan kéká bá Akuiran má Prisiran má inká mai ma monó dorarí inton ma vetí amápín átaru uven baya siyain kéká bá anon betí aú kákéi Bafan avíká tireti vaonafá amusin baya yákan oren mino. 20 Mará ma vain monó nanin banta ano sireti vaonafá monó amusin baya yan oren mifo vá tiretiyan monó avúavá posá betin avábá in maran ná ono.
16.20Kiriki vaya fintéiTiyarafenurá ma monó tiyain nanin banta ano ma kantasí ukhein amónan maran iyainnan tikhen mino.


21 Téi Pori anon teyantá timusin baya uvaman amé uno.

22  l Bafan ma ída avábá in nain nanin banta ano vá uman barano. Tetisi Bafan noe, ereno.

23 Bafan Yisasini sarisari ano siretin masá bano. 24 Yisas Karaisin avikasá tenti avábá ano sireti vaonafá orino.
16:24Ínaimpá ma uvarein bompompin ena vaya mo asotú ukhen mino. Mai vayaMai fura ino sikhen mino.


Copyright information for `AGD