1 Thessalonians 3

Pori Ma Tesaroniká Orino Van Timotin Tiantein Baya Ino

a Máan tukhái siretin nan ma ída oniyaruna van ma ineine é oriyaruna ano inin tiriyaimpin mi Atensí barurá bano van iné uno. b Máan tukhéi setin tifá tiváe Timoti ma Tiyarafenui yoran banta váken ma Karaisini Kama Vaya siamiyain banta anan tianteruna mai setisi varu varen tiretin o oniyáken ayainti mumunampin ákona ukhe van nono. c Béi anon ayainti mai ma afoká in nain uman kayofin mantaan ákona in nono. Máan uman kayo anon monó nanin banta simaniná afoká inté iya afová ukha rono. Tiretí ankan má ma o váké maé mai uman mano setin timaniná dákó inten ne sé tiamikharé ékun mi mai uman mano fura sen dákó íkaya siretí ankan afováe ono.

Mai fara vara seyo, mai van inékun tufá ída kama iyaimpin mi siretí ankan inté eyá mumunan ukhe fono siré afová ono van Timotin tiantékun oren mino. Mákasin banta ano akhenóka intiya siretíi mumunan me ampesin tetisi yoran mano fa savifá o afeyoran nain nan mi sikhokho van iyá uno.

Timoti Ma Seti Nan Amusin Baya Sein Baya Ino

d Orikharen taréa uron mi Timoti ovaránen me sisimen tiretíi mumunan nan para ákona ukhan ena ma avábá in avúavá moéken bariyan mino síká iné uno. Tetí ankan ma fefá tiretin o ontaréeruna van ma ovare me iniyákeya setin nan moéke amusin pinté tonano van iya ono. Máan tiyan nái setin má dere simusin pinté tiretin o onano van ineine iyá uno. e Máan tukhái mumunan tiyofi sifá tiváeyan noe, siretí ankan ma ákona mumunan iyaona vaya ma iné tiferuna anon kákan uman ma variyaré eruna maman mumunan ákona usinten mino. Tiretí ankan ma Bafantá ákona mumunan para ukheona vaya ma inékun mai anon tetin evaránen ákona usinten mino.

Tiretí ankan ma mumunan iyaona van mi Tiyarafenu avorá kákan timusin iyá umpo mai inté uresá tiretin nan béin tusu siantante rafuno. 10 Tiyarafenu ano aaí usintantí tiretí ankan baonafá orivé manáa yaná ma mumunan iyáke me áuntanona aya ono siré ena ena inuran má bayan má timúkiyá tiféuno.

Pori Ma Tesaroniká Orin Aa Van Dosein Baya Ino

11  f Máan tiyá tifé umpo setin Tifóe Tiyarafenu vá Bafan Yisasin má ano vá aaí usintantí tiretí ankan baonafá ainé orono. 12 Tetí ankan ma siretin avábá iyarunaíen Bafan mano siretin avu inti vá ben moéken avábá in maran iyáke ena nanin banta yere avábá ono. 13 Máan tesin ná Karaisi ano siretí ankan ará ákona uantantiya ída fain má aau vá baré inti funtákein nanin bantaí ukhare Bafan Yisasi ma vei kantasí ukhein kéká bá erin nain damusá teti Sifóe Tiyarafenun avorasá o mantano.

Copyright information for `AGD