a15:3Eks 15:1; Íbo 139:14; 145:17
b15:4Íbo 86:9; Yer 10:6-7
c15:5Eks 38:21
d15:81Ki 8:10-11; 2Kr 5:13-14; Ais 6:4

Revelation of John 15

Mosesin Má Sipisipi Arará Bái Í Ino

Máan turá inarufá onékun maen kákantá enará ukhein daná afoká en mino. Mai yaná maen dan manápá ifo afápá kan un kádan enisori kayo ano yan manápá ifo afápá kan un kádan aí daná bá uman má pákakharen mino. Mai maen Tiyarafenui sipá kípan aran naná ma amin nain mino. Máan tukhá onékun mana kamu an dakhein un non má ira vá ano manafiní ukhan mino. Máan tukhan mai ma afá tafúna vá ben aman manon má ma aruvúden esantakhá ein kéká ano mai akhempá mantakhen Tiyarafenu ano ma amein kita kayo asiyaren mino. a Asiyáken Tiyarafenui yoran banta Mosesin má Sipisipi Arará bái í máa sen den mino.

“Minó Ákona Vá Baona Bafan Tiyarafenu oe,
kákantá enará ukhein danasinta éi maman dákó é iya ono.
Ara ara nanin bantai kin mi van nan
éin avúavá anon pura sen puntáken mino.
b Bafan noe, iye anó éin nan ída feranton kákan bí aminten nafino.
Para vara seyo, eyaká anan kantasí ukha ono.
Ara ara vara fáke nanin banta ano e átaru uven
éintá anan monó tiantanten mino.
Mai fara vara seyo, eni funtákein avúavá inka maman dákó en mino.”

Dan Manápá Ifo Afápá Kan Un Kádan Dókifin Ma Aí Daná Bá Uman Má Ma Vaí Pákena Vaya Ino

c Máan turá oniyaruna vá inarufá ma Tiyarafenui kákan monó namun bákan ma yavaráefó e auádan ma kantasí ukharé ein karafarani ona yiven mino. Mai ma yan manápá ifo afápá kan un kádan enisori kayo ma Tiyarafenui aran naná bain dóki kayo ma fákakhá ein kéká ano mai kákan monó namunté e khuven eren mino. Betí ankan ayá efanten buí dana en inká kori fóké ma uvantein daná ákorá kuven ukharen mino. Máan turen ma e khuven eriyain má mai ma kamí kamí tafúnaren daná ma aunan bain kayo finté mana ano mai ma yan manápá ifo afápá kan un kádan dóki ma korifó uvanteimpin ma ayun para van oriyan ban Tiyarafenui aran naná ma varé ein mamariyan mai enisori kéká mana amirú en mino. d Máan turákan Tiyarafenui kakhan má ákona vái íkun mano mai kákan monó namumpin bíken mino. Mana ano ída kanaíen mai namumpin ódikhantin ma yan manápá ifo afápá kan un kádan enisori ano ma uman má aí daná bá bain dóki kayo ma vanasi amaniná banaan kíparantin mi ínaimpáké un peranten mino.

Copyright information for `AGD