Revelation of John 19

Babironi Varu Ma Ira Khavin Inarufá Amusin Í Dein Baya Ino

Máan turá iniyaruna vá inaru fáké kokhon nanin banta ano oovararen temí,

“Bafan avisá daní ono.
Evaránen ma siviran má kákan bí bá minó ákona vá Tiyarafenu inan bákan béin pintéi afoká ukhen mino.
a Mai fara vara seyo, fura sen ma funtákein avúavá póké anan Tiyarafenu ano vanasii avúavá daimé iyan mino.
Ma varará ma kákan pamúku nanin báken ma vei namu avúavá póké banasi máden asuse uren Tiyarafenui yoran nanin banta ma aruan puriyá eipái anona yaíden uman amen mino.”
Máa siren evaránen oovarariyan temí,

“Tiyarafenui avisá daní ono.
Mai varu ma ira khen kauriyain pintena íkun mano fara ódiyan banten mino.”
Máa siyákan tuenti-fo (24) ánon enisori kayo vá inká tafúnaren daná ma kamí kamí báken kaya iyain kéká bá ano Tiyarafenu ma vei kin karáká kumantein avorá matimen oovararen temí,

“Pura ino. Bafan avisá daní ono.”
Máa siran mai ma kin kará bain pinté mana vaya ano máa semí,

“Beni yoran banta kéká ma aví bain má inká aví ída vain má ma vákeya
ven nan periyaona kéká ano vá
Tiyarafenun aví daní ono.”
b Máa sirá inékun kokhon nanin banta ano oovararen baya siyain mano non iya ma káusiyan avaya seiníen inká aafa ma kankaré teiníen iyan temí,

“Bafan avisá daní ono.
Mai fara vara seyo, setisi Bafan Tiyarafenu ma Minó Ákona vain manon kiníen mino.
c Erí tifé í diyá timusin é
béin kákan bí ameno.
Mai fara vara seyo, Sipisipi Arará ma anasi iman amin damú inka afoká ukhan
mai ma véin baran nain nanin mano veyan útaren ave ukhen mino.
Efanten davaráe ma kamaen panu sikhan ma ída mana fain dampakhein mi uren bano siren amikharen mino.”
(Efanten davaráe maen mai ma Tiyarafenui kantasí ukhein nanin banta ano ma funtákein avúavá bariyá ein mi aní ukhen mino.)

d Máa siran mairá enisori ano sisimemí, “Ma vaya vompompin uvarano. ‘Mai ma Sipisipi Ararái anasi varan omáká ma o kumamen dunan nano van ma arakhein kéká ano vá amusin ino.’” Máa siren evaránen temí, “Ma maen Tiyarafenui fura sikhein baya kayo ino.”

10  e Máa siká béin monó tiantano van arantampin o mátimékun mifo véi semí, “Ída vá máan tono. Éin má Yisasini vaya ma sian dákó iyain afá aváeyan má ayofiná bá an dakheruna vantan bá umpo Tiyarafenun mana vá monó tiantano. Mai fara vara seyo, Yisasi ma fura vaya sikhein manon banasi ákona amíkan sakhanampa vaya sé iyan mino.”

Efanten Osin Ané Ma Kumantein Bantai Vaya Ino

11  f Máa sirá mo onékun inaru ona yiviyain má mana efanten osin mantakhan mai ané mana vanta kumantaren mino. Mai vanta van mi Tiyarafenui Vaya Ánain Puntáden Dakhafiyan inká Pura Vaya Ana Sin Banta e sen aré iyan mino. Béi maen puntákein avúavápói vanasi yaíden bei namuro vá mo aruvé iyan mino. 12  g Mai vanta auu fenté ira anafun ma édaveiní iyákan ben ánontá kokhoná kin kamamó baren mino. Ben ayafentá mana ví uvantan maen ída ena ano afová ukhan beyaká anan afová ukharen mino. 13  h Narefin dakharé ein buí danái véi uren bákan ben aví ma vain mai Tiyarafenui Vaya ino. 14 Inaru fáke aruvin banta kayo ano efanten buí daná ana uriyan efanten osin kayo ané kumamen béin ánain bákuren oren mino. 15  i Mai ma esé oriyaré ein banta oo fenté barará nanin banta ma aruan purin nain baenati ano sefá tefá an ukhan e unen erakharen mino. Béi anon aeni ayonta fákaren banasirá ákona yafisirí iyáken Minó Ákona vain Tiyarafenui aran naná ma vaimpin dantin aravúbintin uvaini ma yasameiní inten mino. 16  j Ben arúkantá bá ayá davaráerá bá máa sen bompon uvantaren mino. Kin kayoi Kin má bafan kayoi Bafan má ino.

17  k Máa sikhá ma onékun mana enisori ano áaufin mantaven ayompin ma ámaren noin nun kayo oovararen tiamemí, “Tiyarafenui kákan dunan ma samádan bain tasá e átaru ono. 18 Átaru uveya kin kayo vá aruvin banta kayoi yafisin banta kéká bá ákona aruvin banta kayo vá inká osin kayo vá mai osin ané ma kumantá ein kayo vá miyan ída van doran banta vá para ma vain kéká bá inká tító bá kákan banta kayo vái au vukhafa nano.”

19 Máa sirá onékun mai ma efanten osin ané ma kumantein banta vá beni aruvin banta kayo vá aruvono siren afá tafúna vá bara ráke kin kayo vá ano vetíi aruvin banta kayo avían átaru en mino. 20  l Máan tiyaréin maen mai afá tafúna fákiyáken inká kampun sakhanampa vanta kéká ano ma ven aviká enará ukhein daná uvaren dararen iyaréin kayo vá dere fáken mino. Mai avúavá pókéi mákádan banasi ano veni aní daná mamaren béin aman manontá monó tiyaré íkan míkanan para ayun kaya iyan páken sarafa onámaná ano ma ira khiyaimpin mo kharúden mino. 21 Máan turen maen mai ma efanten osin ané kumantaré ein banta oo fenté ma e unen erikhá ein baenati anon afá tafúnai aruvin banta kéká aruan púdan tumpan kayo ano vetin au vukhafa nen mino.

Copyright information for `AGD