1 Corinthians 9

Pol kanog fwatig elni nihe ehe esegna mom sihig

Afa ka mas nihe mo ahnai skaufei. Afa ka kanog fwatig el feg afa ka bigelni Ainiyag Sisasim ati nangug. Afa ka Ainiyagna gafugagim esegba asa nengel olug waikefig.

Afa mingnag el enaig onigig kam fini fi eba mas kanog fwatig el feg mo. Eba ne ati anwenafig kaba enaig el feg. Afa ne Ainiyagna el figbi asa enag ati ogfug kaba kanog fwatig el feg.

Afa maia el kam sehigbi asa ka pese enaig esonug.

Afa kagel enaig gafugag esigbi asa sios la nai el kam fane i bu i kwaganig. Atiasi enaba amtakwalig me? Amo eba awai.

Afa Pita afa ming kanog fwatig el afa Ainiyagna suminieg mo sihiagiafugum eba heafgelni kristen angwafig nangum afuna. Afa kagel enaig nihe esigbi eba amtakwalig ka esig me?

Afa sios el mingnag kanog fwatieg elim kwaganig. Haisegba kaningi Barnabas i mungu sa ningana gafuga ahfenam asa kig flagim eligim kwefwagim? Haisegba ne mas kangelim kwaganig mo?

Afa ami el mas heafna kigna lofugna fanenaba lambig mo. Afa asona alag eba heafna ena asonai fane fla neg. Afa bulmakauni yuwigig el eba bulmakauni tutna ehefum kweagfug.

Afa enag lasug mo mango ka elni onigig la nai mungu fla sihi mo amo eba Mosesna nihe mo gafa gwenaig esog.

Afa Mosesna nihe mo enaig esog, “Maia bulmakau neana gafugag enaig esegba ehe sa wit sisigim papaugufiag ofefiba asa fug lambigim. Nofeka ehena mengigim kagfo sa fwahaiba ma ehe gafa mingnag wit fugim ne.” Afa God enag bulmakaum oniginig eso mo.

10 Afa God kagel gafugag elim oniginigim asa enag mo esog. Afa Mosesna ginof eba kagelim ogfunig asa el aso leg nuhmwagefug afa el nog yihwag fe gohug eheningi gafuga ahfegim afa honigig og eba ka ena aso nai fane ogug ahflafe.

11 Afa kagel Godna mom nengelni olug yi kumu fwahig. Atiaba kagel nengelni mingnag gawig lambi gonugbi ofenai enag el aso nai lambig eba enag nihe amtakwalig me?

12 Afa atiaba mingnag gafugag el sahtiginim nengel nai yi kwefwag fligbi eba suialag nemug feg atiaba ka nem sahtigigbi.

Afa kagel mas mangwalim nengelim sahtigi goni mo. Amo kagel haig haig kinig kahlig asa ka oksig mangwal nihe esigim eba Kraisna suialag mona minam kagfog.

13 Afa ne ati anwenafig Godna kwania lala gafugag el heafna fane ena lala nai flag. Afa el enaig gafugafeg sis simesko la tuhlugum asa Godim faig ehe hefum enana koflag flag.

14 Afa Ainiyag gwenaig nihe feg el sa Godna suialag mo sihiagiafu asa ehengel enag gafugag la nai kwefwag lambi.

15 Afa atiaba ka nem sahnig sa ne kam kweagfug eba na ka esete afa ka mas enaig eseg mo. Afa ka mas enag ginof ningihianig mo asa glau ne kam kweagfu. Afa atiaba kam lahagim muhla fegba ka fwina oksig nem sahnagim sa ne kam kweagfu. Afa enaig ka eseba sa ka kefim fingi feg asa ka mas membeg mo mo behig fegim.

16 Afa ka Godna suialag mo sihiagiaka asa ka mas enag la kefim fingi fei. Afa God kam wasneig mo sihinag asa ka enam eseg. Kasabam afa ka Godna suialag mo sihiakag fwainigba.

17 Afa kiafna onigig la enag gafugag esegba asa enanam suialag sa ka fla fe afa mango kiafna onigig mo eba God ehe kam enag gafugag fai asa ka eseg.

18 Afa mangwal sa ka enag gafugag enanam flag eba enaig eseg ka Godna suialag mo sihiagiaka afa ka sifakale ka mas elim sahna enanam kam mungwag kwefwagim. Afa enag sifakale eba naho kana mungwag kwefwag.

19 Afa ka mas elni esug gafugag el feg mo, amo eba awai. Afa ka kikefim eseg asa ka mungwali elni esug gafugag el fenig asa ka membeg kaksag elim kwaganiba sa ma Godna el apukefi.

20 Afa maia ka Ju el nanam gafugafegba ka Ju elni auguiag lofug feg asa ka membeg Ju el sa ma Godna el apukefi. Afa ka mas nihe mo ahnai skaufena mo afa el nihe mo ahnai skaufig sa ka ehengel nanam gwenaig augufegim asa ka membeg ehengel sa ma Godna el apukefi.

21 Afwambanai el eba Mosesna nihe mo fwainig. Afa maia ka afwambanai el nanam gafugafegba sa ka gwenaig augufeg asa ka membeg ehengel sa ma Godna el apukefi. Afa ka mas Godna nihe mo fwahag mo amo eba ka Kraisna nihe mom ahnai skaufeg.

22 Afa el sa olug onigig mas wasneig mo maia ka ehengel nanam gagba sa ka gwenaig augufeg asa kog ehengel sa ma Godna el apukefi. Afa mungwali haig haig el nanam sa ka gwenaig augufeg asa haig haig mina gam mingnag sa ma Godna el apukefi.

23 Afa ka enaig mungwali eseagegba asa kog Godna suialag mo sa ma kwaniafe. Afa ka gafa asa ena mo menai suialag flai.

24 Afa kaksag el sa kikini kwefwa goseagig afa enanai eba mungu el goseg asa ehe ikag kikini gofseg elni gawigba flag. Afa sa ne gafa kikini gwenaig ikafe ofenai el membeg gofseg gawig ika flagim.

25 Afa el kwania goses laba afu afehba ati heafim tagia fuhu fwahagim asa afug. Afa ehe enaig esigbi asa afug gofseg gawigba faflifi afa enag gofseg gawig eba mwakwalig gohug. Afa bigelbi ehenge pusiafuhba eba wahkig gohug gawigim fligim sa ne neagafa fwina ese.

26 Afa ka enam onigigim asa ka mas kiapeskafe afa malula eba mas ka ninga munum klaitufe.

27 Asa ka kiafna eligim tigeg wasneigim sa ka ikag. Afa ka Godna suialag mom mingnagim sihinugenam masa kikef mo amtakwalig nihe eseba asa ka mas enag goseg gawig flai.

Copyright information for `AMNAMANAB