1 Timothy 3

Siosna misog el haig el asa fefe

Afa el membeg siosna misog el ofefiba afa enag gafugagba ehe membeg eba suialag. Hwa mo eba nufunam.

Afa siosna misog el masa haig haig amtakwalig esefe. Ehe sa ma mungu angwafigni fei, afa heafna onigig masa ese fapusofefe, sa ma aflahlanam fei, afa saglagna onigifei, afa afwambanai elim lala gam wankai afa Godna mo mingnagim ogfunigim eba ma sefei.

Afa ehe bu gina negim foiyug mas fei afa mas ikagna ninimui afa aflahlagna gagim afa nengigim sihiageg afa kig flagim mas fwina onigi.

Afa siosna misog el sa heafna luwal angwafigim suialalafi afa heafna luwalig sa ma ehem ahnai skaufinim afa ningmagini.

Afa enag el heafna luwal angwafigim suialalafig fwainigba eba ehe mas anwenafeg mo Godna elim numwehenugegim.

El asa Sisasim glaunu olug oniginig ese enag el siosna misog el go fe. Masa heafna unehlagim fingi fefe eba God ehem susug faife asa Satan enaig esenaba asa God ehem susug faina.

Afa el Sisasim olug onigi fwainig sa enag elim sihini og, “Eba suialag el.” Masa enag elim amtakwalig mo sihinifi asa ehem Satanna bume la pefe.

Siosna kwefwag el haig el asa fefe

Afa siosna kwefwag el ehe gafa sa ma saglagna onigig lofug fi ese eba mango sambaga mengigna el fefe afa mo ehe sa sihi eba nufunam month Afa ehe bu gina negim foiyui afa kig flagim mas fwina onigi.

Afa nufunam mo God ehe upuguna enag el sa kehlanam og ka Godna nof la heafna mom patalku.

10 Afa ilawana mo sa ne ehengelni gafugag i nihe i fahigenugenam asa ihlafeba sa ma ehengel siosna kwefwag elni gafugag esei.

11 Afa ehengelni angwafigni nihe gafa sa ma suialafi afa esi elim mo sumifinife afa esi mina la wahgi gofife afa enaig angwafig sa sihig eba naho nufunam mo sihig.

12 Afa siosna kwefwag el sa mungu angwafigni fei afa heafna luwal angwafigim suialalafi.

13 Afa enag kwefwag el asa suialag gafugafeg eba suialag unehlag flag. Afa ehe wasneigni enaig esog ka Krais Sisasim olug onigina.

14 Afa ka onigig ka mwakwalig fenam sa nem blo nangufe afa ka ikagna blo fwainigba hwa mo ka nem ginofenag sa ne anwenafe afa big Godna lala laskuihlanam afa big haig esifi. Afa big Godna el afa God nofkenafeg bigel heafna sios. Afa enag sios sama ofenaiba wasneig sumul lofug sa Godna nufunam mo gofeg.

16 Afa big anwenafig nufunam mo God ehe upuguna afa enag fwina kwania feg. Afa enag nufunam mo enaig esog;

Ehe hwaig el lofug gohna
asa bitenai el heafna mom higinim
ehem olug onigini.
Afa Godna Sungwabug ogfuna ehe suialag
afa oflanai el ehem nanguni
afa ehe heven gam kukagim God i hawag.
Copyright information for `AMNAMANAB