John 16

“Afa ka nengelim enag mo sihinig asa nengelni olug onigig nofeka amosna pese afu.

Afa ehengel nengelim laskuhlag lala afwambala lambaitife. Afa sumi yi enag osuna puguiba el asa nengelim kwagihig ehengel enaig onigififi og ka Godim kweagfug.

Afa ehengel Alag mi ka mi mas anwenafegonig mo asa ehengel enaig esifi.

Afa ka nengelim enaig mo sihinig asa enaig kinig osuna opugufiba sa ne pese onigifi asa ka nem numwehiawagig mo sihinig. Afa lasflam yi ka ne i ahgofena asa ka mas nengelim enag mo sihini mo.”

Godna Sungwabugna gafugag

“Afa glawo ka Alag nangum ako afa ne mas kam sahnag mo, ‘Ne asim ako?’

Afa glawo ka nem hwa mo sihinig asa enag nengelni olug kinig feskofeg.

Afa ka nem nufunam mo sihinig afa ka nengelim fwaha ikaiba enagba nengelim suialafenig. Afa ka ika fwainigba Godna Sungwabug nengelim mas bloni. Afa ka ikagba eba ka ehem ningihiafe nengel nangum.

Afa maia ehe bloiba ehe bitenai elim amtakwalig nihe afa suialag nihe afa kwefihiag nihe enag sihinugefe.

Afa el kam mas olug onigini asa ehe ehengelni amtakwalig nihem ogfunife.

10 Afa ka Alag nangum ikafe afa nengel mas kam nangui asa ehe suialag nihe sihinugefe.

11 Afa God bitenai elni misog elim, Satanim, ati kwefihiageg asa Godna Sungwabug elim kwefihiag nihe sihinuge fwahag.

12 “Afa ka membeg kaksag mo nem fai afa ne mas enam ihlafig mo.

13 Afa Sungwabug ehe Godna nufunam mo kehlag afa maia ehe bloiba ehe nengelim mungwali nufunam mo ogfunugefe. Afa ehe mas heafna onigig la nengelim sihini amo, afa mangwal ehe higig eba enam sihife. Afa mangwal sumi yi sa pugufe ehe enam nengelim sihinife.

14 Afa ehe kana mo flanam afa nem sihinife asa ehe kana unehlagim fingi fefe.

15 Afa mungwali gawig Alagna feg eba kana. Asa ka ati sihig Sungwabug kana mo flanam nem sihinife.”

Glawo ne olug kinig afa autunai la ne sifakalifi

16 Afa Sisas enaig esog, “Mwakwalig afa ne kam mas nangui asa manigeg fwainig ne kam pese nangufi.”

17 Afa mingnag patalfuiag el hefim sihiageni og, “Mangigim bigim enaig esonug, ‘Mwakwalig afa ne kam mas nangui asa manigeg fwainig ne kam pese nangufi’ afa mingam ehe enaig esog ‘Ka Alag nangum ako asa enaig pugufe.’

18 Enag mo ‘Mwakwalig’ eba mangwalim esog afa enag ehena mo bigel mas anwenafig mo.”

19 Afa Sisas anwenafeg ehengel enam mo onigiafufnaba ona ehem sahni asa ehe sihini og, “Ka esog ‘Mwakwalig afa ne kam mas nangui asa manigeg fwainig ne kam pese nangufi.’ Atiasi enam ne nimbefum sihiageafu?

20 Afa ka nem nufunam sihinig afa ne wewatinim nob mela auguiafiba afa bitenai el eheba sifakalifi. Afa ne olug kinig feskofeg afa nengelni kinig eba waikefe sifakaleg pugufe.

21 Sa hig, maia luwal gohugum ofeba eba angwafig susug mu gof flagim. Afa maia luwal mo gohugba asa angwafig mas pese susugum onigi eba ehe sifakaleg luwal ati gohug.

22 Nengel gafa gwenaig esifi, glawana mo ne olug kinig flinim afa ka nem nangwagiba eba ne sifakalifi. Enag sifakal mas amban nengelni nihinai huguflaiti.”

Ne sahiba eba ne flafe

23 “Afa enag osuna puguiba eba ne mas kam mangwalim sahini. Ka nem nufunam sihinig mangwalim ne kana unehlag la sahiba asa kana Alag nem faife.

24 Afa glawa gafa nengel kana unehlag la mas mangwalim sahig mo. Sese ne sahiba ne flafe asa nengelni sifakaleg ihlafefe.”

Sisas bitenai nihem filafefe

25 Afa Sisas enaig esog, “Ka nem ati lasug mo sihini afa enag osuna puguiba ka mas nem lasug mo sihini asa ka ambala kiafna Alagna mom nem sihinifi.

26 Afa maia enag osuna puguiba ne Alagim kana unehlag la sahnaiba, ka mas enaig esog enanam ka nem kwefunam ehem sahani, amo,

27 Ka mas nengelim enaig esini eba kiafna Alag ehe nengelim fwina membenig. Afa ne kam fwina membeni afa ne onigig God kam ningihiag naka blog asa ehe nengelim membenig.

28 Eba nufunam feg ka kiafna Alagim fwahagim naka hwa bite la blog afa glawo ka hwa bite fwahanam asa ka pese Alag nangum ikafe.”

29 Afa patalfuiag el enaig esogona og, “Ei, glawo ne ambala sihig afa ne mas lasug mo sihig mo.

30 Afa glawo kagel anwenafig ne mungwali ati anwenafeg mangofi kagel yiskosig nem ming sahnigim asa kagel ati olug onigig ne Godna blog.”

31 Afa Sisas esoni, “Atiaho ne enam olug onigig?

32 Higim, enag osu ati muhla ofe amo eba ati pugug asa ne mungwali kam fwahinim afuiaminefefe nimbiafgelni mungu mungu kembig gam asa ka kefwaimu gofufe. Afa ka mas kefwaimu nemug gofi eba kiafna Alag i ka ahgofufe.

33 Afa ka nem enag sihinig asa ka nai yi afofum eba sa ne olug enesiegna afofufe. Afa hwa bitelaba kinig nengelim pugunife asa nofeka embefi eba kati bitenai nihe filafatig.”

Copyright information for `AMNAMANAB