aSam 91:11,12
bAis 9:1,2

Matthew 4

Satan Sisasim yuhna

Mak 1:12-13, Luk 4:1-13

Godna Sungwabug Sisasim el fwainigam wanikina og ma Satan yuhnai. Afa 40 osuna Sisas mas fane nenamo, maia 40 osuna awaienaba ehem fwina bini lahana. Afa Satan blona ehem puguna afa sihina og, “Afa ne Godna leg fegba eba sane funim esoiba sama amba lofei.”

Afa Sisas esona og, “Godna moba enaig esog og, ‘Amba mungu mas elim nofkenagagba fai. Godna mo munguhe eba sa elimba nofkenagagba fai.’”

Maia Sisas enaig sihifenaba Satan Sisasim sulflanam Jerusalem gam wanikina. Wanikina Godna kwania lala wofugug sisia nemug la lasuwona. Afa Sisasim sihina og, “Afa ne Godna leg fegba eba sa ne puso pekai eba ati Godna mo sihig;

Eba heafna oflanai elim sihiniba oflanai el ambe nem ningana kehli apaiyeufufe eba mas nem fun sig mong yi pifi.” a 
Sisas sihina og, “Godna mo enaig esog, ‘Nofeka Ainiyagim nimbiafna Godim yuhna.’”

Satan Sisasim mungwanam mug gam fuko wanikinam afa sa mungwali bite i afa suialag gawig i ogfunagena. Afa Sisasim sihina og, “Ma ne kam mongkogini kwakwagenam kana unehlagim fingi feiba, ka sa nem bite i gawig i mungwali faife.” 10 Afa Sisas sihina og, “Satan, esimika Godna mo enaig esog, ‘Godim ahnai skaufenam afa sa heafna unehlagim mungu fingife.’”

11 Afa sa Satan Sisasim fwahanamba. Afa oflanai el ambe Sisasim kwefuni.

Sisas Galili yi gafugafena

Mak 1:14-15, Luk 4:14-15

12 Sisas enaig higina og ati Jonimba kalabusig asa Galili provins gam pese ikana. 13 Afa ehe Nasaret mo fwahanam ika Kaperneam la mo gafena. Kaperneam Galili bu megim gifni muhla Sebulun Naptali elni bite la. 14 Enamba Godna mo fla sihiule el Aisaia ati sihi fwahana. Enaig esona og;

15 Sebulun i Naptali i nengelni bite gifni bu wagieg mina ikagla gwesim Jordan gohfba eba Galili kaksag afwambanai el auguia. 16 Enag elbi sikuleg la auguia, ati kwania ombusug pugunig asa nangug. Afa amban el sikuleg pigieg la afohiafiba asa ombusenife. b 
17 Enanam Sisas mo sihiagena og, “Godna bog meg ati blog sa ne olug waikefinim saiye afu.”

Sisas sambaga sambaga patalfuiag elim uneni

Mak 1:16-20, Luk 5:1-11

18 Sisas Galili bu blugmini ikan sambaganigi etesuminegim nangwagna Saimon Pita mi Andru mi. Sambaganigi fufwalana sawagim kigiag hofefna. Sambaganigiba sawag gafuga ahfegofna. 19 Sisas sihini og, “Au, kam ahpatal blu ka nem elim ahlambigim ogfunige.” 20 Sambaganigi ikagna fufwala ahfwahnam ahkana Sisasim ahpatalkuna.

21 Sisas wankan afa ming etesuminegim nangwagna Sebedini legnigim Jems mi Jon mi afa heafningina alag bot la auguiafenaba fufwala kokohiag kwelwagia flafna. Sisas uneni. 22 Sambaganigi heafningina bot na afa alag na ahfwatinam ahkana Sisasim ahpatalkuna.

Sisas mo sihifnam afa elim suiala feitifeakafna

Luk 6:17-19

23 Sisas mungwali Galili yi wagiakana ikafnam laskuhlag lala seifofnam saglag angwafigim ogfunigiafna afa Godna bog meg mom sihinigiafna afa mungwali haig haig gihna elim suiala feiti feafna. 24 Afa mungwali el ena mo higwaginim sihiagenim asa Sirianai el haig haig gihna elim lambifini. Elig susuna, mwaifig simbigahlagulem, nilagini, afa mong lihlina Sisas suiala fetifeafna. 25 Afa kaksag Galilinai afa Dekapolisinai Jerusalem lanai afa Judianai afa Jordan bu magigi nai el enag mungwali Sisasim patalfuia gohna.

Copyright information for `AMNAMANAB