Revelation of John 5

Hwa moba pepa moanmoanig fakig i afa sipsip i

Afa ka nangugba el misog elni pegag sime la gafenaba afa nihiginai ningana pepa moanmoanig kehla uguiafna. Enaba ginof enanai yi ohogam gohna afa ehegam gohna enaig elegeg la gohug ugwanina pakopako fenagini.

Afa ka higinaba Godna of lanai el wasneig el enaig lagfegofena og, “Amban el sa unehlana feg asa ena ugwaniniba hugfo taitinam asa pepaba pigife?”

Afa heven lanai yi, bite nai yi, afa bite menai yi amban el mas ihlafeg mo pepaba pigigim afa enam nangug mo.

Afa ka fwina enam ufwena afa mas amban ihlafeg mo pepaba pigig nangwagba.

Afa ena saglag el blog kam sihina og, “Nofeka ufwe, sa nangu, ena elbi eba Juda nai Laion afa ehe Devitna simbianinga ehe ati fagim filafeg fatig. Eba ehe ihlafefe ugwaninim hugfo taitinam asa pepaba pigife.”

Afa ka nanguba Sipsip Luwalig pegag sime olyi goh. Afa ena simem sambaga sambaga sis blistanafeg afa saglag el enam wakig fakag. Sona sipsip ofenaiba ati lahag afa mas lahag mo. Afa ehe elegeg la gohug aninguog nafeg afa elegeg la gohug nofug feg enaba Godna sungwabug elegeg la gohug God mungwali bitem ningitigi.

Afa ehe blogim el pegag sime naina ena pepa nihiginai ninganai flag.

Afa maia ena pepa flanaba afa sa sambaga sambaga sis blistanig i afa 24 saglag el i Sipsip Luwalig nai yi apaiyena asa ehena unehlag la fingi fig. Afa mungu mungu moag lagwagig lambwagini afa sanda gol disni flini eba suialag fungugni feg enaba Godna elni beten.

Afa ehengel mulug mwanifi enaig fatifini og;

Eba ne pepa flanam ihlafefe ugwanin hugfo aitife, haisegba eba ati nem tigigbi ne lahagim afa taf sugfogim enana elim mungwali mungwa usumuna, afa haig haig mona, afa haig haig lofugna, afa haig haig kembig afa sa lambigim God nangum lambig lamblug pugug.
10 Afa ne ehengelim esinigbi asa pris figim afa sa bigelni Godim gafugafinig asa ehengel mungwali bite nangwaghiagife.
11 Afa ka nangunam higinaba of lanai el fwina kaksag fiagena afa haig suwigih mo. Enag pegag simem, afa sis blistanig mi, afa saglag el mi enam waki fakana.

12 Afa sa mwanifi fwina fatini og;

Ena Sipsip Luwaligim tigifatigbi lahag ehe ati ihlafeg eba ehe kwania kigmog feg, afa mungwali gawig feg, afa mungwali anwenafig, afa wasneig feg, afa mungwali ehem ahnai skaufinigbi asa ehe sisi feba afa sa bigel ehena unehlagim fingi fifie.
13 Afa ka higinaba heven lanai yi, afa bite nai yi, afa bite menai yi, afa bu menai yi enag mungwali God sa gafugafena enag ehengel mwanifi fatini og;

Afa el sa pegag sime la gag mi afa Sipsip Luwalig mi afa sa bigel wahkig eheningina unehlagim fingi fiawag gwese ufufim eba enaig eseg sama mungwali eheningim ahnai skaufegonibi asa eheningi sisi ahfefe afa eheningina wasneig gwenaig wahkig gwese ahgofufe.
14 Afa sambaga sambaga sis blistanig esog, “Eba esefe” afa saglag el apaiyenam eheningina unehlagim fingi fiawagig.

Copyright information for `AMNAMANAB