Revelation of John 7

Godna of lanai el Godna elim ginof faka fwahanig

Maia enaig awaienaba, afa ka nangunaba sambaga sambaga Godna of lanai el sambaga sambaga bite ehbegam afohiafna. Ehengel sambaga sambaga efefim kwenagim lambug afo asa efef mas bite mi, bu mi, afa li ni sahini.

Afa mingba of lanai el osu puguiag lanai blogim nana Godna ginof fakag flauguhba. Afa ehe sambaga sambaga of lanai elim fwina unenig. Ehengelim God wasneig faig sa ma bite mi afa bu mi afa li mi amtakwale fati. Ehe enaig esonig og,

“Nofeka ahmona esi. Kagel ma Godna gafugag elim mingig la ginof skonibi asa ne sumi yi enaig mo esi.”

Afa ka higigba hanansi el Godna ginof lambig. Enaig pugufeg 144,000 feg afa Israelna 12 pela simbianinga mungwali el feg.

  • Afa enaig eseg, Judana 12,000 simbianinga puguiageg
  • afa Rubenna 12,000 simbianinga puguiageg
  • afa Gatna 12,000 simbianinga puguiageg
  • afa Aserna 12,000 simbianinga puguiageg
  • afa Naptalina 12,000 simbianinga puguiageg
  • afa Manasena 12,000 simbianinga puguiageg
  • afa Simeonna 12,000 simbianinga puguiageg
  • afa Livaina 12,000 simbianinga puguiageg
  • afa Isakarna 12,000 simbianinga puguiageg
  • afa Sebulunna 12,000 simbianinga puguiageg afa Josepna 12,000 simbianinga puguiageg afa Benjaminna 12,000 simbianinga puguiageg.

    Kaksag el busug lofugna feasaina

    Maia enaig awaienaba afa ka nangugba afa el fwina kaksag feageg afa el haiseg suwigih mo. Eba mungwali mungwa usumuna, afa haig haig kembig, afa haig haig lofugna, afa haig haig mona enag ehengel busug lofug laitiagigim afa li fegeg lambug afo. Sonag el, el pegag sime la gag mi afa Sipsip Luwalig mi eheningina nofbusug la afohieba.

    10 Afa ehe fwina enaig esogog og;

    Kagel eheningim sifakal fegonug. Afa kagelni God pegag sime la ga afa Sipsip Luwalig i ehe kam ahlambig.
    11 Afa mungwali of lanai el pegag sime mi afa saglag el mi afa sambaga sambaga blistanig sis la mi enanai yi ambe muhla afohiakanam asa heafgelni nofbusug bite gam apaiyenam Godna unehlagim fingi finim,

    12 enaig esogona og;

    Eba nufunam, biafgelni God sisi feba, asa big ehena unehlagim fingi fifie, afa ehe mungwali anwenafeg, sa big ehem suialag oni, sa ma mungwali ehem ahnai skaufini afa ehe wasneig fegim afa kigmog feg. Sa ma enaigna gwese wahkig gofi. Eba nufunam.
    13 Afa saglag el mungu kam sahana og, “Sonag el busug lofugna figbi atiaho ne anwenafeg eba ambangel afa hanai ambeg?”

    14 Afa ka wahigi sihina og, “Saglagluwal, ka mas anwenafeg mo. Sa kam sihina.” Afa ehe enaig sihifena og, “Sonag suialag elbi kwania kinig menai apukeg ambegim afa heafgelni lofug Sipsip Luwaligna taf la gigiafiagigbi asa ehengelni lofug busug feasaieg.

    15 Afa enaig esigbi;

    asa Godna pegag sime muhla afohiegim osuna i sinaini i Godna lala gafugagfiafu. Afa sa God ehe nangwagihiagego afa el mas ehengelim pese amtanafehiagi.
    16 Afa bini mas pese pigi afa bu hef mas pese feskofe afa osu i afa haig haig i mas aftukuhlaskofe.
    17 Afa sonag Sipsip Luwalig pegag sime nai gohugim ehengelim nangwagihiagego, ofenaiba el sipsipim nangwagihiagego. Ehe gose ika sulfu wanblogim nofkikenagag bu faig ofenaiba fun bu. Afa God ehengelni nombim titenigefe asa ehengel mas pese ming kinig flinim wewatigoi.”
    Copyright information for `AMNAMANAB