2 Corinthians 1

Bro Nkifrar aposerm hemo hingrnefthu mrokfot Porr kfo pthamor

(Sapta 1-7)

Na Pora, na Krais Jisasrhu aposera. Bro Nkifrarhu duka fijo aposer hingrneft fak htamora. Nani nanhu yinouwem Timotirpno ndar gontwat no wandfewunonko niko taun Korinthu Kristenko, yo Akaia profinshu Kristen bugako. Nmoh Yifem Bro Nkifrarkoni nmoh Bro Nungothet Jisas Kraisr ayak marnya-kahtfko yima yuhum amirhutwamko.

Porr hatohmo krhopam Bro Nkifra yak thuhemotrr Porr ndt htihato Bro Nkifrar kfo yindhormorr

Bro Nkifrarhu yufat akfo yindhor-nomt. Turn nmoh Bro Nungothet Jisas Kraisrhu Yifemer. Ndr yima yuhuwafet Bro Nkifrayer. Tamoh tamoh krho yima yuhumpno rhu hasoneft nd Bro Nkifrarn hifa yima yuhum hnewatrm yima yuhum thu jubtwanitm. Tamoh tamoh krhopam nom yakneft rorn nmoh yima yuhum kak marnyewurm. Ndnettn tfit womm tamoh krhopam-pno rhuneft, nomn yihato nd yimam-pno rhuhato kfo yima boyima marnya-hato nd rom haruh hasoyuk krho yima yuhum thu jubtwarahmm. Nom Kraisr krhopam yakmo kanjo nom inji kanjo krhopam kekwonom. To inji kanjo Kraisrhu hifa dborioh yima yuhur nmoh yima yuhum htewurnom. Nom krhopam yekwohat Kraisrn tfit hifa yima yuhur hnewarrn yima yuhum yak marnyewatrm yima yuhum miyorhwomnom. Ndnettn niko krhopam yakneft, nom nd yuhat hikhato nikompno yi rhuhato nikmoh yima yuhum yak marnya bomarnyahato yima yuhum mirhurahmko. Yima yuhum mirhuruhatmko Bro Nkifrar tfit yak miyakrahrko. Nom yihato nikmoh yima yuhum yak marnya bomarnyaneft, tamoh krhopam tfit nianeft, nhai tfit wom finji wohsis-ruhatko. Nom krhopam titahnamo kanjo be inji tita hanyrahkom. Nmoh dukefti htiyeft hti kangnom nhai suhruhatko. Htitnom nom yak htfaswa krhopam kanjo niko inji kekwoko. Nom nd krhopam yekwohat, to tfit Bro Nkifrar finji finji niahato nmoh yima yuhum kak marnya bomarnyewurm, nd yuhat Bro Nkifrar hikhato niko inji narahrko.

Bar yinouroko, nom Esia profins yakmo krhopam tndh nuhasrhotanko wawanyko. Nom Esia profins tohmohat mirahko be tu kuken krhopam tita-monom. Be tu bro krhopam titamonom. Nhai marimonom rhurahnom. Bi memonom ndar krhopampno nohrah-nom. Bi memonom bi nohyuk tkitt bi tohwonom. Ndt to nhai be sfno inji rhurmot. Ndt nmoh yak dukayuk neftn rhumotnom. Ndhtet krhopam yakneft nhai tfit tunmoh bbukeft yukatohkfot. Nhai. Bro Nkifrarpar nom tfit yukatohkfot. Rorrpar bi nohet yimam tfit kasinyewurm. 10 Nom bi nohyuk tkitt tohyuknom Bro Nkifrar toh rafomotrnom nom rhumonom. Ndt inji htihato nmoh dukefti htiyeft duka kangnom kto to inji toh rafo hanyruhatrnom nhai nohruhatnom. 11 To niko wakfo bruttnakahtkmnom Bro Nkifrar tamoh nefm toh rafo hanyrahrnom. Bok yimaroh kfo bruttna tngm wanyruharn toh raforahrnom. Rirhu arhuyuk yimam ndt htiruhamn, Bro Nkifrarko kfo yindhorrahmr.

Porr Korinko yi juha yimo nmbuhathu kfo duka mrokfom

12 Nanhu toh nmbuhat yo nanhu nefm nikompno tohhato niwam ridukak thombat, nanhu yima yuhur nhai finji duka yimtnakahr o duka krhokahr. Nhai. Bro Nkifrar yak hta bohtamotra nanhu toh nmbuhat be yi marnya mifmot. Nhai wom beb nmbuhat nikompno htarmoyant. Bro Nkifrar yuhuwafhato hemora ndhtet ruhefthu rhuyuk rhu dukeft. Nhai ndar bbinysofthu yimaroh rhu dukeft hikrmoya. Nd Bro Nkifrar heyuk nefmpno nikompno yo ndar bbinysofthu yimampno toh hnamoya. Ndnetann nanhu yima yuhur nhai finji duka yimtnakahr o duka krhokahr. Nhai. Nanhu yima yuhur be yindhorwor. 13 Na nikompno gontwam wandfa hnamohat, na nhai wom mrokfom mkfo rhti tany o yura be yafuna hnarmoyanm. Nhai. Tamoh mrokfom wandfafmoahat, wandfa nuhas marnyamoanko. Rot wom yiham wandfamoa mrokfomn mfak mmota-moukomm. To nanhu dukeft memoa nanhu mrokfom htiruhakommn nanhu dukefr yakrahkomr. Htiruhakomrn, kto Jisasr, nmoh Bro Nungothetr, bro kotkfot yakitoh thoft tfit tunom wusha nahtihato nnakfo yindhorrahnom. Niko na htiruhakomn tfit kfo yindhor-rahkma. Na tfit niko htirhoyann kfo yindhor mrokfot kforuhant.

15 Ka bi fakmokomm na kfoyuk mrokfom. Nd dukeftpno duka hta memoya Korin yuhat niko mhtinihato kto tfit Masedonia profinsko yiruha. Masedonia profins mtoh tanyhato tfit wompam Korin yuhat nierhota tfit wom htit htiyaforuhakomn yindhorrahko. Tfit nanhu Judia profinshu yi yuhat nikomn hingrnafhirahkma. 17 To nhai, na nhai Korinko niarmoya. Tone finji dukewako? Ka duka kangko ka be nomn frnhehmor? Kangko ka na nda bbinysoft tohwa yimam kanjo hus yima yuhetann mrokfom kfonihato tfit kto kfo kekutwanm? Nhai mif. 18 Bro Nkifrar nhai mikfota mkfotakahr. Tur bi kfoyuk tngrpat hikwor. Na to inji kanjo bi barkof kfoyuk tngrpat hikwa. Bi kfo yakio tngt kfiyant, to be nd bi kfo yakio tngt hikwa. 19 Na, Sailas, Timoti, nom husfirpa yimat nikompno tohhato mrokfom hemoam, Bro Nkifrarhu yon Jisas Kraisrhu mrokfom hemounomko. Kraisr nhai mikfota mkfotarmor. Bro Nkifrar kfoyuk mrokfom hikmorn Bro Nkifrar kfo htayuk mrokfom Jisasrpno mfrfnahnamom. 20 Bok mrokfom nmoh yufatpno Bro Nkifrar yak dbkaf htatamom, Kraisrpno mfrfnahna bugamom. Ndmn nom mhtiyakhato duka mekfot Bro Nkifrar nhai mikfota mkfotakahr. Tamoh mrokfom ror bi kfo htayukm hingrna hikworm. Ndnettn Bro Nkifrar nom kfo yuta hagrha yindhorkfot. 21 Tu Bro Nkifrarn nikomi nmoh toh nmbuhat Kraisrpno tohyukt thu bmtewurt. Yo yakhato bi kfo hbhamornom. 22 Barkof nia kfo hbhamohat inji namor, turhu Yafothat hnamortn nmoh toh rawofmn htamort. Rotn hta tehakmotm tamoh tamohroh niayuk yihotat. Ndnettn nmoh yufam-pno yorhwa tamoh tamohm Bro Nkifrar be yafho hasorahrm.

Porr tfit Korinko yi juha yimo nmbuhathu kfo duka mrokfot

23 Bro Nkifrar nanhu yima yuhur hti mifworr na nhai kfo nhehrmoyanko Korinkorhof nianeft. Nhai. Duka kanga bmbri yihato wom mrokfom kforuhanko, tfit niko wanyruhakomn tfit wom krhopam yakrahko. 24 Na nhai tatkrur mikahanko, “Nikome be inji korhko. Inji inji wanakon o mrokfom inji inji wahikkomm.” Nhai. To nikmoh Bro Nkifrarhu tohhato hik yuham faso yitatm btn inji tatkrurfo-yanko? Nhai. Niko hifa toh bmtahato bi Bro Nkifrarhu mrokfot wanyhato hikwokomt. Nom, nom be kangnom Bro Nkifrarhu hik yindhorefrpat abronitko. Nom ndrpat kukatohwonom.

Copyright information for `AMP