Galatians 5

Judaroh nkifra boririfhut hik duha

Be nd nkifra boririfhutn tfit rim hikak mhikak yifahta hatoh duha. Kraisr bi nfri yihotar fak hta nuhasmornom. Tfit wom yimam niahato mtawas tiwonwomko tha pukneft wany marsisafohato toh bmtakfot. Riwany yakiowakrahkomm to be nd boririfhutn yak hta bohta hasorahtko.

Wawany marnyafo hanyswako na Pora kforuha mrokfom. Tfit mirahko Judam kanjo boririfhut hikhato tha apuk thunom. Inji narahko to be Bro Nkifrar nhai Kraisr nohmo yuhat mhtiyakhato yak marnyaruhatrko. Tfit wom mrokfot kfiwanko. Fitoh yimam kangm, “Nd nkifra boririfhut hikhato tha apuk thunom,” nd yimam to be mirahm wom kfo boririfhu mrokfefenm arim tohnim. Nhai. Nd kfo boririfhu mrokfom rim hikak mhikak bugakkfot. Niko kangko, “Ka boririfhut hikruhanomn Bro Nkifrar yak wus bowusrahrnom.” Nhai. Niko be tukomn boririfhut hikwakomn tfit Kraisr yekwakomr nndo riyak htefiwukomr. Inji newuko Bro Nkifrar nhai hti yuhuwafhato yak marnyaruhatrko. To nom nhai. Nom be Kraisr wany yakiohato rorhu mrokfom bi hikwanomn nmoh yima yuhum be rhu duka haso kangm, “Nmoh yima yuhum Bro Nkifrar yak wus bowusrahrm.” Bro Nkifrarhu Yafothatn nd dukefr kahukwotnom. Bro Nkifrar yimam yukatoh thoft nhai tha puket yimam o tha puk duhat yimamn htikahr. Nhai. Yimam Kraisrpno rim tohhato womm hti dukewam, tom ndhtet yimam Bro Nkifrar kukatohworm.

Barkofpam afo hifa Kraisrhu mrokfot fak hik marnya hnamokomt. Yak hik hnamokomtn to tfit tamohrn buha tanhehafomotrko manysifm kanjo yihom kke rmonmoko? Nhai nd niko nakuyakmo Bro Nkifrar tanhehaformorko. Nikmoh yima yuhum tom bi nndo yiyaknitm. Inji tefinitamn kto be nndo yirahm. Htitwokomt bretparoh hingrneft. Tefi yispenm yakhato plauapamn rihtafo-rahnm kto htirahnt nd bretpat tfit broraht. 10 Nanhu dukeft duka kanga, “Bror fitha yiruhatr rroh yima yuhum nndo yiruham?” Na duka kanga, “Nd rom yorh hasiwa yima yuhum be Kraisrn yak marnya bomarnya-ruhatrm tfit nanhu yima yuhurn mikmbrehato hikrahm.” Nd niko harhuwa yima yuhurparne kangane, “Tamohrn frmmo bomumiwatrko mduka happuktewako?” Nhai mrokfom. Nd niko frmumiwa yimar Bro Nkifrar afo htiwonrahrr.

11 Bar yinouroko, nanhu mrokfom kfo pthamom, be akfo mekahann, “Tha pukneft nhai mrokfom,” yimam nhai namburrfotma. To nhai, kfo memoyanm, “Tha pukneft bi bgre misn Kraisr mfha htahato fak nohmort. Nd neft wayafho thukomt.” Nd mrokfot kfomota namburwoma. 12 Nd yimam niko kfo mmo bomumiwam, tha pukneft kangm, “Ayakitoh hanynomt.” Nhai mrokfefm. Tumn nd neft yakitoh-hato be yuht nyisofetm puk tmbha thu hanykfot.

13 Niko, nanhu yimatko, afo nkifra boririfhu mrokfomn afo ufak afak-moumko. Tfit arihat bi Kraisrn nd niko yak nhirtamoa mtitoft puk thumortn rorn yakaknihato rorhu mkuko rim fak htamorko. To mirahko akfo amanyom, “Nkifra boririfhut bi be. Bi nhai wom yakitohkahtnom tfit tunom hatohnayuk fasoh yima yuhu bebmn ahiknom.” Mirahko ndhtet yima yuhum ayaknom. Niko Bro Nkifrar hikwako tuko rpatn nahti duka nahti dukakfot. 14 “Tunn yak marnyewa kanjo inji womm yak marnyakfot.” Nkifra boririfhuthu mnat tot inji. 15 Be nd foh yaum nahti srthuwa kanjo inji nahti srthu haso-rahko be nhai rpat tohruhatko. Inji rinahtakhato nathu mmbranirahko. Bro Nkifrarhu temperr be ndnatn tfit yoh nasohrahr.

16 Kfo hta mrokfot kfiwanko. Bro Nkifrarhu Yafothat yak htafo hanyuk yuharpat hik hakurahko, be nd fasoh yima yuhum yiho sinyaneft nd Yafothatn yak karhurahtm. 17 Nd fasoh yima yuhuri Bro Nkifrarhu Yafothathu dukefr nhai rpat nayak tkafkahf. Bro Nkifrarhu dukefr ror nndo. Fasoh yima yuhurhu dukefr ror nndo. Ndnetfn mano mano tohwafn tehwofm nikmoh yima yuhum. Dborioh nefm kangko ananom, to nhai nakahkomm. To tfit fasoh nefm niko hti hhrekwam tfit nd nefmn newuko. 18 Bro Nkifrarhu Yafotharpat yak hta bohtarahtko be htirahko boririfhut nhai tfit yak hta bohtaruhattko.

19 Nd fasoh yima yuhur rhuyuk nefm bi htiyeteko. Fasoh yima yuhur yorhwa nefm to,

  • Ijoh tonanyeft.
  • Ijoh tonehato yihof href to be nd dukefrn tohetoh hasokfot.
20 
  • Nkifra tahi yifonroh kfo tatoneft.
  • Yima tipneft, grwasneft, fortawon, nd nd yakitohneft.
  • Womm be hti srthuneft.
  • Kfo nambur kfo huttnefm.
  • Womroh hifa hingrneft o wuskam o tamohm hti yuhurhato kfo yuhuwehhato kfo wokneft.
  • Yima yuhum kaht kanjo wakur sinyaneft.
  • Nhai mfhat kasinyahato womm tamohm hti dukakfot.
  • Nayak mkuhato womm rom inji, womm rom inji, ndhtet tohneft.
  • 21  Womroh hifa hingrneft o wuskam o tamohm hti yuhurhato yakneft. Drin spak nefm. Drin spakhato yaum kanjo yihom nakuyak mnakuyakneft. Ndhtet ndhtet nefm. Mrokfot to bi kfomoyanko tfit wompam kfiwanko. Ndhtet ndhtet fasoh nefm na haset yimam to mirahko Bro Nkifrarpno ka muhrahm Kraisr yawihna thombat. Tu be nhai mif. 22 Yimar Bro Nkifrarhu Yafothat ruhetr htirahnr:

    • Wom yimam hti dukarahrm.
    • Yindhor rifhurpno rhurahr.
    • Wommpno hifa hifa nayak marnyahato rhu marnyarahr.
    • Tamoh mrokfom wanyneft nhai be bmbri kaht kanjo wakuryakhato huttakniruhatr.
    • Hifa hifa yima yuhur womm hmbrerahrm.
    • Wom yimam yak marnya bomar-nyarahrm.
    • Rorhu wiyauyau nmbuhat hifa yau marnyahato kmi thofroh dukefm rorrpar bro dukeft htarahm.
    23  Rorhu ruhefm, pthefm, ptha yima boyimarahrm. Fasoh fasoh nefm duka hikhato yak hhrifnirahrm. Tom ndhtet net yimam Bro Nkifrarhu Yafothat korhtm. Nhai wom boririfhut kfo mikaht, “Ndhtet nefm mirahko ananomm.” Nhai. 24 Kraisrpno bi rim tohet yimam rroh fasoh fasoh yima yuhum bi Krais Jisasrhu bgre misn bi frdbkafmomm.

    25 Bi Bro Nkifrarhu Yafothatn nfri yima yuhur thu hmbremornom. Ndnetnomn Bro Nkifrarhu Yafothat finji kfiwutnom be nd Yafothat kfoyuk yuhatn nom hikkfot. 26 Mirahko akfo hagrhakahtnom womm wanyhato yima yuhum atifranjimm. Mirahko womroh hifa hingrnefm o wuskam o tamohm htihato yima yuhum asinyamnom.

    Copyright information for `AMP