aJeremaia 31.31-34

Hebrews 8

Jisasr hefenrhu bro tohak priser

Nd Bro Nkifrar htamo nfri prisrhu hingrnefthu hingrneft kanga afrhikkahtant wawanyswakomt. Nd prisrhu hingrneft na kfo hnamot tu kfo mif kfoyet. Jisasr bi tu yura myorhekwa Nkifrarpnonko bro mtohakm yekwa gajis, ror bi nd gajis yakhato korhwor. Bi yura hefenrn Bro Nkifrarhu rmontn pris hingrneft hingrnewur. Ndt tu Bro Nkifrarhu kunyet nhai yima mifmn kasinyarmomt. Tu Brornko kasinyamort.

Nd asha bbinysoft tohwa rmonthu hingrnayuk bro tohak prism rom nhai rhu furakahm. Rom yeshrim yakhato Bro Nkifrarko tarioh mthewumr. Ndnettn nd ror yakitohwa rmontko nhai be sfno rhu furakfot. Nd rmonr yemror kur mthakfot. Nd rmont kur mthamo yemror nhai wom tamoh yemror yakhato kur mtharmotr yimaroh fasoh nefm mong trohrmorm. Nhai. Jisasrhu kkutn yohnemot. Nd kkut yohnemott Bro Nkifrar htimort. Nd prism hingrnamoa yemro tarioh mthaneft, nkifra tarioh mtha yuhat afo hikmoum. Jisasr yura hefenrn tohetrn nhai nd Bro Nkifrar htamo prisroh hingrneft hikrmor. Ror tur tohwa kmi hefenrhu nfri hingrneft hikmor. Rom nd prism hingrnamoa hingrneft, ndar tuha bbinysofthu rmonthu hingrneft hingrnamoum. Nd rom hingrnamoa hingrneft yura hefenr tohyuk rmonthu toh ruhefti hingrneft hingrna nhombramoum. Bingot Mosesri Bro Nkifrar ndar bbinysofthu rmonthu kasinya yuham, rmonthu yuke rifm, bro rifm nnakfo nuhasmohat kfo memorr, “You! Mirahn tunhu duka fijo ahingrnayant. Yura kmi Sainait kfo nuhasmo yuharpat wahingrna hiktwa.” Tu yura hefenrhu rmonthu ruhefthu hingrna yuhat kfo nuhas bonuhasmorr hingrna hikneft. Prism hingrnamoa hingrneft, rom be nndo bbinysoft tohwa rmonthu hingrnef yuhat hingrna hikmoum. Jisasr ror tu hefenko yiyuk yihotathu pris hingrneft hingrnamor. Rorn tu yafothet hingrneft hingrnamor. Bingotrhof prism hingrnamoa hingrneft nhai yimaroh fasoh nefm yak thurmoamm. Nhai. Prism tarioh mthamoahat Bro Nkifrar nd tarioh skurn gbefr mthatihato nd yimaroh fasoh nefm be kak wunafmourm. Bro Nkifrar bro mrokfot kfo memor, “Nhai mrokfom. Nikmoh fasoh nefm yak thuhirhoyanko, tu dborioh yimakomn nanpno brbo nierahko.”

Jisasr htamo nfri yihotathu hingrnef yuhatn tu dboriohet

Nd yatk tarioh mtha yuhat yimam tarioh mthahato fasoh nefm yak wunamoahat Bro Nkifrar nhai kfo marimor, “Tarioh mthakahtko fasoh nefm yak thu hiruhanko,” nhai. Ror be kfo memor, “Fasoh nefroh yak thuyuk nfri yuhat yak hambrak hiruhanko.” Nkifram yemroye tarioh mthamohat Bro Nkifrar nhai hti yindhorrmort. Yimam tarioh mthamoahat nhai Bro Nkifrarpno brbo yirmoam. Ndnettn Bro Nkifrar htihato kfo memor,

“Na Bro Nkifraya kfiwa, afo wawanyko.
Wom yihar wom nfri yihotar tfit htakruha.
Nd yihotar na tukanpno wukio-ruharn
Tfit mano Isrert rhuyuk kmifpno wakiorahr.
Mano Isrerm tohwamn yo mano Judam,
nd Isrerroh hus kmifpno wakiorahr.
Nd nfri yihotar nhai ndwom yatk yihotar kanjo rhuruhatr.
Nd yatk yihotarn Isrerm Ijift tohhato na yaknamohat
Isrerm nhai na kfoyuk tng yuhat yak hikrmom.
Nd rroh nefm htihato mong trohmoyanm.
10 Tfit kto Isrermpno kndhakruha nfri yihotarhu hingrneft tfit nndo rhuraht.
Nanhu boririfhut yimaroh yima yuhumn rhuraht.
Yimaroh yima yuhum rhuruhatt
nd boririfhutn yak hta bohtarahtm na Bro Nkifraya hikneft.
Nhai wom tahi furam o wom tahi nasungwarm kfo tatoruhatm.
Nanpraya rroh Nkifraya rhuruha.
Tukann hti yukatoh hasoruhanm nd nanhu yon kunyshu tamoh tamoh nefm.
11 Rom toh thoft nhai tfit womr sinyahato
turhu kmi thofm o turhu tangiyemrom kfo ttiwon miruhatrm,
‘Bro Nkifrar nikmoh tamo-hemer?’
Nhai womr sinyahato tfit womr inji kfo ttiwonruhatrr. Nhai.
Yufet yimami yufa duha yimam rom tum hti mirahm,
‘Bro Nkifrar nmoh Nkifrayer.’ Nhai womm hti mmo-ruhatma.
12 Rom wommpno nayuk tamoh tamoh nefm
nann yuhuwafhato yak thuhi-ruhanm.
Rom nayuk fasoh nefm nhai tfit dukarhotanm.” a 
13 Nd Bro Nkifrar kfomo wom nfri yihotarhu htaneft, ndt duka hanykfot. Bi nd nkifram hik hnamo yatk yihotar be yau trohaf bugarahnomr. Bufutn rinatuhakrahtr. Nhai tfit wom yihota yimbuyefett rhuruhatt.

Copyright information for `AMP