Revelation of John 22

Toh yifahtayuk miyukhami bupam yima yanyeft yimam toh yifahtakfot

Mounmotr nd nfri Jerusalemr yak nuhasnimora, ee tfit nd kmitpno tonita tekt fak nuhasmora. Nd tekthu bupam yimam yak yanyeft toh yifahtewum. Nd tekt memom nndo binasohtn kak dbratwot. Nd tek buktt myakmo tkitt, Bro Nkifrari Sifsif Yonr, rofhu sia kingtpno myakmotn, tu buha bro yihota danyuha yuhatn tone nanyormot. Nd tekthu mano mano tek thmbeffn mim tohmom. Womm mano mkuko womm manoh mkuko. Nd miroh yukham yima yanyeft yimam toh yifahtakfot. Nd mim, rpa gunyjimr 12-pela taim hirwom. Rpa rpa yamm rpa yiha hirwom. Nd miroh twam kmi kmiroh dbohnet yimam o thatip yayet yimaroh susfayuk miswayem.

Bro Nkifrar bi fitoh shrkam o fitoh yimam bi kfir yak thuneft, to be yak thurahrm. Nhai nd nfri kmir rhuruhatm. Bro Nkifrari Sifsif Yonr, rofhu sia kingrn nd kmir rhuruhatr Bro Nkifrar hikwa yimam nd sia kingrn yi loturahm. Lotuhato rorhu nyingatikt htiruhamtn rorhu yufat rroh nyimbikmn rhuraht. Nhai wom yifungt rhuruhatt. Yo nhai wom lamm htaruhatm o marr wom taruhatr. Bro Nkifrarn met yindarim nukeft hiruhatrm king hingrneftn hingrna nkifranirahm.

Jisasr yudbat nierahr

Nd mounmotr kfo memora, “Nda mrokfot tu kfo mifkfoyet. Yimam nda mrokfot wany yakiokfot. Bro Nun-gothetr, profetroh yima yuhum thu kasinyewa Bro Nkifrar, rorn moun-motr kfo tkrurafmorr. Mounmotr niahato Bro Nkifrarhu hingrna yimam kfo nuhas bonuhasmorm bi nd brbo rhuhnewa nefm.”

Jisasr kfo memor, “Wawanyko! Na bi brbohwa nianeft. Nda gonborngt yorhwa profet mrokfom wany yakiowa yimam ayindhortwam.”

Na Jona, nann nd mrokfom wany-moya yo nd rhumo nefm htimoyanm. Nd mrokfo kfo tngm yo nayuk nefm na htihato nd yak nuhasyuk moun-motrhu wurampno msuhhato memoya alotuyanr, tfit nd mounmotr kfo memora, “Ni nann mlotu duha! Na to nini ni ninpno hingrniwa profetmpno hingrnanuhiwa hingrnanho yimaya. Yo na, na nda gonborngthu mrokfom hikwa yimaroh hingrnanhoyuk hingr-nanho yimaya. Ndnettn nann lotu duha. Bro Nkifrarpar lotukfot!” 10 Yo tfit wom kfot kfo memora, “Yihar bi brbohhnewur, ndnettn mirahn nda mrokfot be inji kon kafrohett arhut. 11 Fitoh met yindarim fasoh fasoh nefm nahasiwum, rom to be nd fasoh fasoh nefmn nahasokfot. Fitoh met yindarim nd fasoh fasoh hnomha hnomha nefm kakitohwom, rom to be nd fasoh fasoh hnomha nefm nahaso-kfot. Fitoh met yindarim dborioh dborioh nefm nahasiwum, rom to be nd dborioh nefmn nahasokfot. Fitoh met yindarim Bro Nkifrar kanjo toh-wom, rom to be Bro Nkifrar kanjo toh hasokfot. Yihar bi brbohhnewatr nhai wom finji wom finji nakfot. Fitohtet toheft yimam tohwom, to be nd toheft tohkfot.”

12 Jisasr kfo memor, “Wawanyko! Bi brbohwa nianeft. Yimam nahnayuk nefm htiyak hanyhato ttha nhombra hanyruhanm. 13 Nanrpaya barkofa yo nanrpaya wuroha. Na kfomoya shrkar yarim fnahmor yo tfit na kforuha shrkar tfit rim fnahnirahr.

14 Yimam bi wuskam kifsa rmon htayetm, rom be yindhorkfot. Rom nd toh nkifraniyuk miroh yukham yak yanyeft rom nhai wom mrokfo duhatem. Yo rom nhai wom mrokfo duhatem taun yifhatikthu rim fnahnineft. 15 To nd yima tipetm o yima grwasetm o forkat haruhetm o yima wasyuk wajim haruhetm o yima htakyuk wajim haruhetm o yaum kanjo ijoh tone htfasetm o yima was furetm o tahi rmonm o nkifra tahim lotuyetm o yima kfo fura nhehetm, ndhtet ndhtet metm o yindarim nhai taun yifhatik rim fnahniruhatm. Be inji briahako tohrahm.

16 Na Jisasann mounmotr kfo tkrurafmotanr niko siosroh met yinda-riko mrokfom kfo ptha nuhasmorko. Na King Defit frikefthu trhanayuk tu tannefena. Na dbha ksfut mfro tarrewa gunya.”

17 Bro Nkifrarhu Yafothati Sifsif Yonrhu yakyuk mett kfo naku kangf, “Jisase, wania.” To tfit nd gonborngthu mrokfot wanyuk yimako tawo kfo mekfot, “Jisase, wania.” Frohr bupa knewur, nd yimar niakfot. Yimar kangr bupa ayeya, nd yimar niahato nd toh nkifraniyet bupam yehato toh nkifra-rahr. Bro Nkifrar be he furarahrr.

Jonr bro kfo duka mrokfom kfomo yuhat

18 Na Jona bro kfo duka mrokfot kahukanm nda gonborngt yorhwa profet mrokfom wanuka met yindarim. Fitoh yimar nda profetm pthayuk mrokfom htihato tfit turoh dukefmn wom nfri mrokfo nmbuham rihtekrm, nd yimar, Bro Nkifrar nda gonborngt kfoyuk krhopam nd yima yak thombat, wom nfri krhopam htahutarahrr. 19 O wom yimar gonborngt rhuyuk wom profet mrokfom fak thurm, nhai Bro Nkifrarhu nfri kmir fkniruhatr. Yo nd toh nkifrayuk mishu yukham yimam yehato toh nkifrewam, nd mishu yuk-ham nhai ror yehato toh nkifraruhatr.

20 Nd rhuruha nefm kfo ptha srhwa yimar kfo kangr, “Na yudbat nia mifruha.”

To be inji. Bro Nungothet Jisase, wania.
21 Bro Jisasrhu yuhuwafeft atuh kasi bugatwatm met yindari bugam.

Copyright information for `AMP