Revelation of John 5

Bro Nkifrarhu mrokfom yorhwa skrorkfot Jonr htimort bi yakrirhato psifkort bi silimett

Tfit htimoya nd sia kingt rhumo Yimarhu tirmiftn fakitohmort skrorkfot.
(5.1) Nd skrorkfot bi nkifram yakitohmoa buket. Ndar yiham buk mifm kakitohwonom bingot nkifram skrorm mrokfom rhumoatm nd skrorm yak nyusaku fnahhato mrokfom hti fnahmoumm.
Nd skrorkfot mano mano mrokfom wandfamomm. Wandfa-momn tfit yakrirhato 7-pela nmbuharoh psifkorm silimmomm.
(5.1) Nd skrorkfothu 7-pela nmbuharoh psifm yak natt tkitmn kenderm kandhi hnuhato tarioh trkuyaf hanymoa tkitmn piksakfot bi hingrna hta nhombretm yakmoamn tatanyjaf hanymoumm. Nd tatanyjaf hanyuk tkitm nhai wom yima furam nd kandhi hnuhato tatanyjaf hanyet tkitm yak ppokfot. Tu be nhai mif. Nd tu piksa tikatrpar yak ppokfot.
Nd skror-kfot inji htini hanymoyann tfit htimoya wom nngrajohet mounmotr nnhuhato kfo ptha ttiwon memor, “Tone fitoh yima tungunar nieruharn nd silkfom yakta hanyruhatrm nd skrorkfot rhuyuk mrokfom htiruham?” Na nd mounmotrhu mrokfot inji wanyhato duka memoya nhai wom hefenr tohyuk frohrn o bbinysoft tohyuk frohrn o yiro Maringour tohyuk frohrn nd skrorkfot yak nyusakuhato yiro mrokfom htikfot. Hti hambriwa nd skrorkfothu yak nyusakuyuk yimar. Dukafotihato bro nureft fakmota. Tfit nd sia kingt rhu htfasmo nungothetroh womr kfo memora, “Anurwahn! Wawanyn! Tor Juda tangiroh Laionr, tu King Defit frikef yuhathu tu tannefenr, ror tohmo yahrt nhai finjinarmor. Yahr nungothat bi fakmort. Rorn nd 7-pela silkfom yak thu hanyrahrm.”

Jonr Sifsif Yonr htimo yuhat

Nd nungothetr inji wanyni hany-hato tfit Sifsif Yonr htimoyanr brbo sia kingtpno mtohmor. Htimoya nd sia kingt husfihus foh nunga kanjo ruhet shrm mano mano toh htfasmom, tfit rompnonio 24 nungothetm toh htfasmomm. Nd Sifsif Yonr htimoyanr yimaroh was fnhum hatohwor. Rorhu mfhat htimoyanr 7-pela komm toh-womr yo 7-pela nyingam korhmr. Nd nyingam Bro Nkifrar kfo hta bohtayuk yafothayem. Nd yafothamn ndar yuht bbinysoft kukatohwomt. Tfit hti-moyanr nd Sifsif Yonr nd sia kingt rhuyuk Yimarhu tirmifko yakitohmo skrorkfot rim fakmort. Tfit htiyafo hanymoya nd husfihus foh nunga kanjo ruhet shrmi 24 nungothetm nd Sifsif Yonrhu nyingatikko bangu myukna hanymom. Nungothetm rpa rpa fakitoh nhombra bugamom musik wumtyuk gita kanjohot shrm yo dborioh mthet shrm kur mtha hanyet dis gorkfot. Nd dborioh mthet shrm, ndm Kristenm Bro Nkifrarpno kfo bruttnewa nmbuhat fak nuhasmom. Yo wany-moyanm wom nfri windohr fakmom. Nd windohr inji kfo hanymomr:

“Ni bi wasmotmn nohmo.
Nd ninhu kku futn bi fak nhafoh-motm
wonk wonk kmim, wonk wonk yarmumat kfet kmi kmim,
wonk wonk thetm, wonk wonk ruheft ruhetm.
Be bi Bro Nkifrarhu yufat korhm.
Ndnettn nd skror htayuk silkfom yak thurfonm.
10 Nd yimam bi Bro Nkifrarhu kingdomkfot fak htamotnm
be bi nmoh Bro Nkifrarhu pris hingrneft bi tohwom.
Be kingm tohruhamn
bbinysofthu met yindarim romn yakitohrahmm.”

Sifsif Yonrhu yufat yuta hagrhamo yuhat

11 Ndt inji htini hanyhato tfit memoya ayukatohafoya, wanymoya mounmot rifhur yura wutohhato wanakumom. Nhai kuken mounmot rifhur htirmoya, be tu tausen tausen milion milion mounmotm htimoya. Nd mounmotm niamomn toh dbu hmbremomm nd sia kingt rhuyuk Yimar yo husfihus foh nunga kanjo ruhet shrm yo 24 nungothetm. 12 Nd mounmotroh tng rihar mfro wanakuyafo memom,

“Nd Sifsif Yonr yimam bi was-ngotmor, tu yufeter,
rorn tu bro bbukefeter yo dborioh dukefeter,
rorn tu dborioh rhu nmbuhat kakitohwort,
yo rorrparn yimam kfo yuta hagrhahato
yimam kfo yindhorkfot.”
13 Nd mounmotroh tngm wanyni hanyhato tfit Bro Nkifrar hefenri bbinysoft hingrna htamo yimam nd foh nungat nd tamoh tamoht wany-moyanm kfo yindhor memom,

“Nd Yimar sia kingt yorhwari Sifsif Yonr
rof kfo yindhor tngm rpat ayak bugafm,
yuta nawohyuk tngm kfo yindhor nmbuham,
bbukefm rofrpafn yiha yiha arhu nkifranitwam.”
14 Nd 4-pela shrm kfo fakio memom, “To be inji.” Be nd nungothetm bangu tabokmehato lotumom.

Copyright information for `AMP