Revelation of John 8

Sifsif Yonr 7-yuk silkfot fak thumort

Tfit hti hanymoyanr Sifsif Yonr tfit 7-yuk silkfot fak thumort. Nd 7-yuk silkfot yak thumohat hefen bugar be buskukrat rhumor, nhai wom tamoh nmbarefenr o nyungefenr wanyrmoya. Haf aua be buskukra furat rhumor. Buskukrat rhunimorn ee tfit kto htiyak hanymoya Bro Nkifrarhu nyingako mtohyuk 7-pela mounmotm 7-pela fumrm hi hanymomm.

Yo tfit wom mounmotr htiyak hanymoyanr dborioh mthet paurakfot htahato tarioh mthayuk gore hingrnayet pengt yakitohakhato altakfotpno mtoh hanymor. Mtohmotr nd yonmari dborioh mthet paurat hemomr. Nd paurat Bro Nkifrar hiket yimaroh kfo bruttnaneft nd paurakfot rpat Bro Nkifrarhu nyingatikko rhuyuk altakfot-pno mhtahato rpat tarioh mthafoyukmn nd paurat hemomr. Yo htimoyanr nd ror yakmo paurat tarioh mthafmotrt nd dborioh hip gbefri Bro Nkifrar hiket yimaroh kfo bruttnayuk mrokfom nd Bro Nkifrarhu nyingatikko tohyuk mounmotrhu pengt htanyhato rpat muhmom. Nd mounmotr nd hingr-neft hingrnani bugamortn, tfit nd altathu kah bantikr tawokakmorr nd dborioh mthet paurakfot htahato tarioh mthayuk pengt yakmorn nd kah bantikr htamorrn, tfit yarim hatohnehato thu trufafmotrr bbiny-sofkor fawihnamor. Inji namotr tohr wathu rbighato nyungu mirefetr yimor. Yo toh fnhur wufohninamor. Yo nunes tonemot.

Husfihus mounmotm fumrm fumrmo yuhat

Tfit nd 7-pela mounmotm 7-pela fumrm yakitohmom rom bi toh yibonmom rroh fumrroh fumrneft.

Barkof mounmotrhu fumrr hatoh-hato fumrmorr. Fumrmotrr ren aiset kaht ee kkut rpat yakmomm wom bbinysof nmbuhatn yak tipakhato watumomm. Nd bbinysof nmbuhat watumotmm nd bbinysof nmbuhati nd bbinysoft tohyuk bro mi suhm yo mifan suhm, kipr suhm, gutn suhm, nd ndm kur witamom.
(8.7) Nd bbinysof nmbuhat krhopam yakmot nhai be yuht bbinysof bugat kur witarmot. Nhai. Be 1/3 bbinysof nmbuharpat yo nd bbinysof nmbuhat rhuyuk shrm kur witamom.


Yo tfit husyuk mounmotrhu fumrr fumrmorr. Rorhu fumrrpno be tu yonmari kaht nda yuht kminysoft kur funewa kanjohot bro kaht yak-momt wom maromb nmbuhat watu-momt. Watumotmt nhaf nd maromb nmbuhathu bupam kkupata bugamomn nd maromb nmbuhat hirhato yewussoh htfasmo yirat nd yiro marombt hutraf-mo tamoh tamoht noh witamot yo nd yura marombt wutone atonemo sifm ndm htimoyanm rpat bafinat yimom.
(8.8-9) Nd maromb nmbuhati nd marom nmbuhat rhuyuk tamoh tamohm krhopa yakmom ndm nhaf be marombthu 1/3 kforpat krhopam fakmot.


10 Tfit husfirpehyuk mounmotrhu fumrr fumrmorr. Fumrmotrr nd bro gunyr kshm kanjo funarriwar wuyoh-ninehato misuhmorm wom tkit nmbu-haroh bupa tasyuk tkitmi yo wom tkit nmuham yorhwa tek yinham. 11 (Nd gunyrhu yufat Kurjbnehetr.) Nd tekmi tek yinham nd gunyr misuhmotrm nd bupa tasyuk tekmi tek yinharoh bupam kurjbnehmom. Yimam nd tekmi yinharoh kurjbnehet bupam tas yamomn noh wurasoh bugamom.
(8.11) Nd tekmi yinharoh bupam kurjbnehmo nmbuhat nhaf nhai be ndar bbinysofthu tekmi yinha bugam kurjbnehrmom nhai, be 1/3 tekmi yinharkforparoh bupa kurjbnehmom.


12 Tfit husfihusyuk mounmotrhu fumrr fumrmorr. Fumrmotrr mar yiha tayuk marrhu wom nukeft kur spohmot yo yifung tayuk yamti gunyroh wom nukefm kur spohmomm. Ndnettn wom yihar marr nhai mta fnahhato ta krifaf bugarmor. Nhai. Buha wom yiha nmbuhat marr afo mta nohnimor. Yifungt nhaf inji. Nhai yamti gunym yifungr ta nfha bugarmomr. Nhai. Buha wom yifung nmbuhat afo mta nohnimom.
(8.12) Nd marri yifungt krhopam yakmohat nhaf 1/3 yiharpar buha marr mta nohmor afo. Nhai be yuht yiha bugar marr mnohrmor. Yifungt nhaf yifungthu nukeft hayuk yam gunyim 1/3 yifungrpar nhai tarmom yam gunyim.


13 Yo tfit yura mountn gribfanano hti hanymoya wom dobir hta htfas-mour. Nd dobir hta htfasmoarn yima tngt yakhato tu mfro mfro kfo hany memour, “Wayeye! Wayeye! Wayeye! Wuroh husfirpa mounmotroh husfirpa fumrroh krhopam be tu bro krhopa mifm bbinysoft tohyuk yimam yakrahm!”

Copyright information for `AMP