1 Corinthians 13

Apaꞌ ukup peleleꞌ pindaila anis amam nematawa endilisi

Iꞌi aeꞌ egawa ma igaꞌi diga naninani epesi goloma enseli wapani, ma aeꞌ owaꞌ okom mimilas eseꞌasa nembel etopalopasa, malogol diga aeꞌagai falafugai atoga siꞌi sagaha olefi wata sagalaꞌ dowaf. a  Iꞌi Ambal buꞌunai Godi noseꞌe presen hiahaom fasimi nosaꞌme ma egawalipasa basef Godi ma egegawa okom hiami Godi mape mandamabahiꞌi hiꞌigalam, ama egegawa gawa hiani hiꞌigalan wapani, ma igahapifa God banagambel endilisi ma laꞌifiwi esapaꞌ halafutagw gogafeꞌ gani doꞌwan, apaꞌ aeꞌ owaꞌ okom mimila esis amam nematawa endilisi, aeꞌ falafuwai atowe. b  Iꞌi aeꞌ egasoꞌasa hiahaom hiami aeꞌami hiꞌigalama esis isimba kwahusa hiahawesi ma endaꞌ maol Godi igaꞌi ahoꞌma anis epes sandaiwaꞌma Godi siꞌi sehe sogaofe nif egagaꞌ. Apaꞌ aeꞌ owaꞌ okom mimilas eseꞌas nembela, eaꞌ hapaimi. Anaf hiahaom amamba hiami ina motopalope molefate kwasakwasala, owaꞌatin endilisi.

Epen mamahina okom magaila anis epes daias endilisi, anin nandaꞌ waf buꞌwafi naꞌamba. Anin ina kwafalis nagwamasa waf awafi esis sandaꞌmanaf anini, owaꞌatin. Anin nape natitilis. Anin nati epes hiasi uwahipis natopalopas. Anin ina kowagalana epes hiahaom hiamiisii, owaꞌatin. Eaꞌ ina nagasaꞌma agol ananigili atigili, a anin ina okom magaꞌi anin atini, owaꞌatin. c  Anin saisailan atin nagape andeandeꞌi. Anin ina okom magapoma hiahawes ananisi aꞌowaꞌi, owaꞌatin. Anin ina okom numbutim kwafalisi, owaꞌ. Eaꞌ ina okom magapoma waf awafi anis daias sandaꞌmanafi, owaꞌatin. d  Anin ina nandagala ma waf awafi ikiakafi, owaꞌatin. Anin nandagala ma waf endilisifi buꞌwafi atef. e  Nimaguf hiafi dondol anin nandaꞌ waf afamba naꞌamba. Anin nembel bape awanembela nemaf mamahefa negameꞌ nimanimi akafimi hiami. Anin ina nagandina anis epes kwafalisa waf asasifi, owaꞌ. Anin nahapifa God endilisi nape nehafana ma nogatopalopa esis sogaloma anin wapani. Anin nalutu banagena ma nimanimi akafimi magatagaman.

Waf afamba ukup pagapagaila anis daias endilisi, afambai anaf ina higililaf, owaꞌatin endilisi. Apaꞌ waf afamba Ambal Godi nasaꞌmapa ma mogowalapa basef ananifi, afamba anaf higililaf hiꞌilaf. Presen inimba hiahaom fasimi ma epes sogawa sagaꞌi diga naninani hiana haonai, diga anamba hiana haonai anaf hiꞌilana. Presen inimba ma epes sogogawa gawa ma waf Godi, gawa inimbai anaf hiꞌilan wapani. Deiꞌ main, deiꞌ apaꞌ ataꞌ mogawa gawa duꞌwanin atin. Presen inimba Ambal buꞌunai Godi nasaꞌmasa sogawalapa basef ananifi siꞌi profet, basef ifimba wapani ataꞌ duꞌwanif atif. 10 Apaꞌ anaf hiahaom God okom maꞌi motaga mugagiꞌ endilisii mogataga, nemaf afamba hiahaom amamba deiꞌ mogataga waꞌawaꞌami atiasi hiꞌilam. 11 Fowaꞌ aeꞌ ataꞌ agape siꞌi awani aꞌi basef siꞌi awani. Aeꞌ amemeꞌma hiahawes siꞌi awani. Apaꞌ afamba agataga dambewe, akwaha waf afamba awanii. f  12 Deiꞌ apaꞌ mati hiahaom mataga eaꞌ, apaꞌ ina mandawalap alihim aꞌowaꞌ, ataꞌ owaꞌ. Mataga siꞌi mapelaga embel magati walofam atin. Apaꞌ anaf owagama nemaf dondoꞌafi fegataga, daoꞌ mundatima nogohnaep alihipa. Deiꞌ ataꞌ egawa waꞌawaꞌas atis. Apaꞌ nemaf afamba egawa isimba endilisi siꞌi God nogogawe. g 

13 Deiꞌ waf wanifif fape, afamba naꞌamba. Waf mogahapifa Kraisafi faloma waf mope mogahafa Godafi, waf ukup pagapagailas endilisiafi. Waf afamba wanifif. Apaꞌ fagaliꞌ endilisii, waf ukup pagapagailas endilisi.

Copyright information for `AOJ