1 Corinthians 9

Wafa maol amom aposel mandaꞌani

Deiꞌ aeꞌ aꞌi ihaliꞌipa esaꞌma nomonas ipeꞌisi. Ipaꞌ paꞌi aeꞌ ape wahifiwi ape aposel ati Dembinai Jisas eaꞌ aꞌa owaꞌ? Eaꞌ andaꞌ maol inimba atina deiꞌ ipaꞌ pataga Kristen, aꞌa owaꞌ? Ahoꞌ endilisi. a  Iꞌi anis epes ukup pandandaꞌ paꞌi aeꞌ owaꞌ aposela, diago, hapaisi. Ipaꞌ daoꞌ. Ipaꞌ pahapifa Dembinai pape sisihipama anen. Isimba atis deiꞌ ipaꞌ atipa siꞌi anol ametal lihimbaꞌma ipaꞌ hipai pegawe ape aposel andaꞌ maol Dembinaii.

Apaꞌ anis epes sandaꞌiꞌipamae sawaloge. Eaꞌ agwa basef naꞌamba. b  Endilisi afaꞌ aposel andeandeꞌma ogofaꞌ gwaꞌaisi maina maol afaꞌ wandaꞌani. c  Eaꞌ andeandeꞌma ogasoꞌ nematawa Kristen ofeꞌ ogalomawa siꞌi anom aposel maloma amom owapana Dembinai Jisasi maloma Pita mandaꞌas. Ina andeandeꞌma aeꞌi Barnabas atofa ondaꞌ maola ogofaꞌ otamba afaꞌimbai, apaꞌ anis daias ipaꞌ atipa petopalopas pimafiasa otamba. Naꞌambai owaꞌ.

Aman mamahonama nandaꞌ maol soldiai anen atona notala gwaꞌaisi mais ananisi? A epen ami nandaꞌ hiahawes nawas aof ama anen owaꞌ nofaꞌ gwaꞌaisiafa? O epen ami nimafi bulmakau ma anin owaꞌ neaꞌ nomagofa amoma? Owaꞌatin endilisi. Aeꞌ aila ukup epesi atip aꞌias naꞌamba? Owaꞌatin. Muꞌuli God nagasoꞌ Mosesani nagaꞌias naꞌamba atin. d  Moses nandaꞌ basef fagape muꞌuli Godi fagaꞌias naꞌamba faꞌi, “Bulmakau mandaꞌ maol mafaꞌasa olemb wit magandilamami maꞌi mogaꞌ anom, ipaꞌ ina pesopama malogof amamugufi, owaꞌi.”

Ipaꞌ paꞌi God okom mandapoma amom bulmakau atom aꞌamon? Owaꞌatin. e 
10 Anen okom maꞌi apaꞌ wapani. Ahoꞌ, basef ifimba faꞌiasa apaꞌ atepa. God okom maꞌi waf afambai. Epen nendaꞌ maol negalaꞌ itap ananipii neloma epen ami nendaꞌ maol negala gwaꞌaisi sagaof eaꞌi, anin daoꞌ okom mondandaꞌma opaf ananifi ma negefaꞌ hiahawes duꞌwanisa maol inimba. f  11 Afaꞌ wandaꞌ maol Godi wagape naꞌamba atin. Afaꞌ wawa hiahawes buꞌwasi Ambal buꞌunai Godi nagasoꞌafa asi laꞌafena ipaꞌ. Eaꞌ ipaꞌ ilama peseꞌafa anis hiahawes pegatopalopa alop afaꞌipi ma isimba ina ahifisa ipaꞌ, owaꞌatin. g  12 Ipaꞌ pasoꞌam hiahawes anom amam daiam magawalipipa basef Godii, apaꞌ afaꞌ deiꞌ mama? Afaꞌ wapani pesoꞌafa hiahawes ipeꞌisi, andeandeꞌ. Deiꞌ main, afaꞌ waliꞌ wandaꞌ maol wagatopalopipai.

Apaꞌ hiahawes isimba afaꞌ waꞌi ahoꞌma ogofaꞌasi, owaꞌ afaꞌ ina ofaꞌas. Fowaꞌ dambadamba afaꞌ waliꞌ wagafeꞌmago ipaꞌ wafiꞌi wafiꞌi wataga deiꞌ, afaꞌ wandaiwaꞌma ogwahefa ufiaꞌwa basef buꞌwafi Kraisi. Isimba atis afaꞌ wandaiwaꞌma ogofaꞌas. Eaꞌ isimba atis deiꞌ nimanimi hiami matagamafa. h 

13 Deiꞌ ipaꞌ ukup pendandaꞌ ma anif basef. Amom mandaꞌ maol ipat luꞌunai Godii mofaꞌ gwaꞌaisi ipat anamba. Ipaꞌ pegawa amom mandaꞌ maola belita atamba sondolalima mafisa Goda, amom wapani mofaꞌ mafis duꞌwaꞌwanisi belita atamba. i  14 Eaꞌ naꞌamba atin Dembinai nandaꞌ muꞌuli inimba nape. Amam ami magawalapa basef buꞌwafi Godii, amom ataꞌ mondofaꞌ hiahawesa esis amam nematawa sogofaꞌ basef buꞌwafi ma sogatopalopa alop amamupi. j 

15 Apaꞌ aeꞌ owaꞌ efaꞌ anis hiahawes isimbaia. Eaꞌ deiꞌ wapani ina andaꞌ basef ifimba ma igaꞌipipa aeꞌ andeandeꞌma egefaꞌ anin mae atitina ipaꞌ, owaꞌatin. Andeandeꞌma aeꞌ iliꞌ endagaꞌ. Aeꞌ andagala andaꞌ maol Godi atopalopepa owaꞌ efaꞌ anis hiahawes isimbaia. Aeꞌ deiꞌ andaiwaꞌma anin epen negaliꞌamona dagala aeꞌani ma egasaꞌma agol aeꞌagili ma waf afamba, owaꞌ. k  16 Apaꞌ aeꞌ ina andagala asaꞌma agol aeꞌagili atogol awalapa basef buꞌwafi Godi, owaꞌatin. Aeꞌ owaꞌ anoꞌw ufiaꞌwa esopama malagola igaꞌipasefa, owaꞌ. Okom aeꞌami mahafel endilisi ma aꞌi indaꞌipasef atin. Iꞌi aeꞌ owaꞌ ewalapa basef ifimba buꞌwafia, naꞌamba God neseꞌe nimanimi luꞌwami. l  17 Iꞌi okom aeꞌami atom endaꞌ maol inimba ananiniai, anaf efaꞌ otamba ma maol inimba. Owaꞌ owaꞌatin. Aeꞌ owaꞌ anoꞌw ufiaꞌwa, andandaꞌam atin. Deiꞌ main, inimba anin maol God naseꞌean aeꞌ endaꞌani. 18 Anaf efaꞌ hiahaom fasimi maima andaꞌ maol inimba? Hiahaom amamba fasimi naꞌamba. Aeꞌ andaꞌ waf afamba buꞌwafi atef. Hiahawes aeꞌ ila ma egefaꞌasa maol inimbai, isimba ina efaꞌas, owaꞌ. Aeꞌ awalapa basef buꞌwafi Godi asoꞌasef dowaf. Aeꞌ ina aꞌ efalasa hiahawes otamba maisa sogaseꞌe siꞌi muꞌuli Godi nagaꞌias, owaꞌ. m 

Pol nape lafela amam nematawa hiasi ma nogatopalopas

19 Aeꞌ ina andaꞌ maol ape lafela anin epen, owaꞌ. Aeꞌ ape wahifiwi. Apaꞌ okom aeꞌami atom andaꞌ aeꞌ ape siꞌi agape lafela epes hiasi ma egefaꞌi hiasi sondahama ikwafa pepel aeꞌani sogafeꞌma God. n  20 Isimba atis deiꞌ naep esis Judai ataga siꞌi Juda, ma igifaꞌai anis Juda. Aeꞌ ina ape lafela muꞌuli God nagasoꞌ Mosesani, owaꞌ. Apaꞌ naep isimba sagape lafela muꞌuli inimbai, aeꞌ wapani ape lafela muꞌuli inimba ma efaꞌi epes isimba sagafeꞌma God. o  21 Eaꞌ naep epes isimba sogololama muꞌuli inimba owaꞌ Judaisia, ataga siꞌi epes isimba sogololama muꞌuli inimbai, ma efaꞌi epes isimba sogafeꞌma God. Apaꞌ aeꞌ ina okom maseꞌe muꞌuli Godi, owaꞌatin. Deiꞌ aila muꞌuli Kraisi. p  22 Ama naep epes isimba owaꞌ banagasia, ataga siꞌi esis ama egefaꞌi epes owaꞌ banagasia. Aeꞌ ataga siꞌi egefaꞌ waf epes hiasi endondoma ufiawa hiawai ma iwambilai anis sogotanimai. 23 Aeꞌ andaꞌ maol inimba ma egafela agol basef buꞌwafi Godi ma anaf egefaꞌ hiahawes isimba buꞌwasi blesing epes isimba saila basef ifimbai sogofaꞌasi eloma anis epes Godi wapani.

Apaꞌ mondasagih banagambela mogofaꞌ hiahaom buꞌwami

24 Ipaꞌ pegawa epes sasagih sandaloloma atini hiasi sasagih hiꞌalas safeꞌ, apaꞌ atitin nikilaꞌas nefaꞌ prais hiahawes fasisi. Ipaꞌ pegawa isimba aꞌa owaꞌ? Eaꞌ ipaꞌ wapani pendasagih mehipa pegefaꞌ hiahawes isimba fasisi. q  25 Epes ami saꞌi sisagih sigikilaꞌi ma depambema inimbai, sandaꞌ maol numaꞌwini aꞌowaꞌ sagwamba alop asasipi samemeꞌmap nimaguf danda. Epes isimba sandaꞌam naꞌamba ma sogofaꞌ prais hiahaom buꞌwami kwasakwasala magape nogota bandatai. Apaꞌ Kristen mandaꞌama mogofaꞌ atapim hiahaom fasimi mogape dondoli. 26 Isimba atis aeꞌ deiꞌ naep doꞌ okom kilikalaꞌ asagih mehipa ikilaꞌ hiasi hiꞌigalas. Aeꞌ ape siꞌi anona aman nandaꞌ bokseni nagapaꞌ, owaꞌ nokwaha lagof ganigani noha fufutal atol dowadowafa, owaꞌatin. r  27 Aeꞌ banagewe aha alop aeꞌapi anindifap ahamap usiꞌip pape lafela okom aeꞌami. Naꞌamba egawalapa basef buꞌwafi ma anis epes daias, apaꞌ anaf owagama aeꞌ ina efaꞌ prais hiahaom fasimi, aꞌ owaꞌatin.

Copyright information for `AOJ