1 Timothy 6

Basefa epes agof akasi sandaꞌ maol dowafi

Ipaꞌ Kristen agof akipai pandaꞌ maol dowaf pagape lafela anis daiasi, ipaꞌ ataꞌ ukup pendandaꞌ naꞌamba. Dembami mugumafi ipeꞌi, ipaꞌ pinifelam piꞌi buꞌwami pesaꞌma agof amamugufi pemeꞌ basef amamifi. Ama anis epes daias ina atiasi siꞌi basef awafi ma agol Godi, ma waf ipaꞌ Kristeni, owaꞌ. a  Ipaꞌ agof akipai pandaꞌ maol dowadowafi ma amom agufumi dembami anom Kristen, ipaꞌ ina ukup pendandaꞌ naꞌamba piꞌi, “Anom Kristen sahopafa atom eaꞌ hapaimi, osambala malogof amamugufi.” Owaꞌatin.

Ipaꞌ ukup pendandaꞌ naꞌamba piꞌi, “Amom Kristen eaꞌ afaꞌ ukup pipilam, ondaꞌ maol amamini andeandeꞌ, ukilaꞌ maol wandaꞌana amom agufumi owaꞌ Kristenia.” Deiꞌ main, ipaꞌ agof akipai patopalopa amom Kristen ipaꞌ ukup pagapagailami. Timoti, basef ifimba ina niwalipasef nesaꞌma ukup asasipi newaꞌ banagas.

Waf endilisifi ma sogofaꞌ hiahaom hiami

Dondol inaꞌ niwalipa esis amam nematawa ma sondaꞌ waf fasifi, eaꞌ nesaꞌmasa sondaꞌam. b 
Basef dembinai Jisas Kraisi fawalipapa andeandeꞌma waf Godi. Iꞌi anona aman nokwaha basef ifimba ma nowalipa esisa anif basef daif owaꞌ fefeꞌ dondoꞌma basef ifimba fasisi usiꞌifi Jisasia, apaꞌ mogawa aman anamba naꞌi nondaꞌ duꞌwanigai. Anen ina nogawa kwasakwasala, owaꞌatin. Anen nomonas awasisinai. Anen okom mandaꞌi waf afamba nondopambema nogalomasafi atefa, nifitap nondalomasa basef kofagefa. Basef ifimba atif fagawalapa waf afambai. Opalef awalefa anis daindaias, sondaꞌ findiwa, ma sogape ukup aweawep pegapoma sahin owan. c  Epes isimba sandandaꞌ naꞌambai, ukup asasipi paolas endilisi, eaꞌ ina sahapila basef fasifi endilisifi, owaꞌ. Eaꞌ saꞌi basef sapaꞌef sandahihianama saloma anis. Eaꞌ saꞌi, “Ufiaꞌw akwamba Godi ufiaꞌw sogofaꞌ ugaꞌwi.” d 

Endilisi atis, epen ami nigaila waf Godi, ma anin okom mondandaꞌma hiahaom ananimi niꞌi. Eaꞌ maꞌum aꞌ dondoꞌma anin eaꞌ, opaf ananifi fope awanef nepe andeandeꞌ. e  Apaꞌ mogawa, mamamapa olapa magataga itap apaꞌe, nemaf afamba apaꞌ ina mofaꞌ anom hiahaom mafiꞌi, owaꞌ. Anaf mogagaꞌ wapani ina atiasi mofaꞌ anom maefah mofeꞌ molomapa itap apaꞌe, owaꞌatin endilisi. f  Apaꞌ anis gwaꞌaisi luwaguf mais sogaꞌomepa, apaꞌ miꞌias miꞌi, “Eaꞌ maꞌwis isimba eaꞌ andodoꞌma apaꞌ.” g 

Apaꞌ epes ukup pape saꞌi sogofaꞌ uga maina hianai, esis atiasi sowa ma gwamba anamba aunai, siꞌi huguf sandowam sambahoꞌwam magapoma mafisi ma mofeꞌ mowala mopoma sogaham. Eaꞌ atiasi ukup mamimami awami motagamasa hiahaom awami mondaꞌ esisa ukup mosoꞌas higiligalas lamonas endilisi. h  10 Waf afamba ukup pigaꞌi moni aꞌowaꞌ, kofagefa ma waf hiafi awafi. Anis epes ukup luꞌum maꞌimaꞌi moni aꞌowaꞌ, eaꞌ waf afambai fahondoꞌas sakwaha sagahapifa Jisas asafeꞌma waf awafi. Eaꞌ sofaꞌ akafimi hiami luꞌwami awami aꞌowaꞌ. i 

Inaꞌ nihapila ambal namili tatalaꞌil nendape lifilafi

11 Apaꞌ inaꞌ aman Godi, newaꞌ alafugama hiahawes isimba nefeꞌ nila waf afamba buꞌwafi. Eaꞌ nendaꞌ maola negefaꞌ waf usiꞌifi endilisifi Godi, nihapifa Jisasa okom mogamogaila anis daias. Ama nigalutu banagena ma waf awafi anis sondaꞌmenafi. Inaꞌ nendaꞌ waf saꞌumbilifi ma anis epes daias. j  12 Nigahapifa Krais siꞌi anin epen nasagih mehip nagaloma anis. Iꞌi anin nesagih mehip nefeꞌ nikilaꞌ, atiasi nefaꞌ hiahawes. Inaꞌ wapani naꞌamba atin. Iꞌi nihapifana banagena, anaf nepe andeandeꞌ lifilafi. Inaꞌ nihapila okom amamba ambal fasili lagape dondoli fowaꞌ God nofalena ma negofaꞌali. Anen nofalena nemaf afamba ma negawalapa hapif inimba ineꞌini naep epes hiasi sandaꞌ lotuma Godi. k  13 God nasoꞌam ambal hiahaom hiami eaꞌ Jisas Krais nawalapa basef kofagefa andeandeꞌma nogohnaep Pontius Pailat gavman dembinai. Naep Godi naloma Jisas Krais deiꞌ aseꞌena maol inimba naꞌamba. Inaꞌ nimafi nomonas ineꞌisi andeandeꞌ nindaila basef ifimba Godi datima. Alogw owaꞌi gwilifa, eaꞌ epes ina sondaꞌ findiwa ma basef ifimba. Nimafif nendape naꞌamba atin nefeꞌ netaga afamba Dembinai apeꞌinai Jisas Krais nogataga alihina. l  15 Nemaf afamba God nagaꞌiefi nosapaꞌana nifiꞌi. God atona kofagonama dagalai, anen atona Dembinai King nugumafi epes hiasii, soloma hiahaom hiami hiꞌigalami. Anen king Dembinai ma king hiamii, aꞌ Dembinai ma dembami hiamii. m  16 Eaꞌ anen atona owaꞌ nogagaꞌia, nagape mogogalaꞌi luꞌwami endilisii. Eaꞌ apaꞌ deiꞌ ina laꞌifipama mogafeꞌ felefeleꞌma anen, owaꞌ. Deiꞌ anin epen owaꞌ netelonaia. Owagama wapani, owaꞌ anin laꞌifina nogati anona, owaꞌatin. Aeꞌ aꞌi agol ananigili luꞌwagili goloma banagami ananimi mondapoma anen atona lifilafi dondol. Endilisi. n 

Basef ifimba ma hiahaom hiamisi

17 Inaꞌ niꞌipa epes isimba hiahaom hiamisi ma itap anaꞌe ina sondaꞌ duꞌwaniga sohapifa hiahaom amamba mamimami hiami awasim kwafalisi, owaꞌatin. Inaꞌ niꞌipa epes isimba ma sogahapifa God endilisi, daoꞌ andeandeꞌ. Anen atona nagasoꞌapai hiahaom hiami fasimi mandaꞌ ukup apeꞌipi pagataga sonogahapi. 18 Inaꞌ kipa epes isimba hiahaom hiamisi, sondaꞌama sogatopalopa maol fasini. Esis dondol sowala hiahawes asasisi sofeꞌma anis epes. o  19 Iꞌi sondaꞌas naꞌamba, andeandeꞌma atiasi sogakolasa hiahaom fasimi atom mogatopalopas anaf owagama. Sondaꞌas naꞌamba, sogofaꞌ ambal fasili endilisi. p 

Inaꞌ nimafi maol ineꞌini andeandeꞌ

20 O nogame Timoti, inaꞌ solawaina nindimafi basef ifimba God nagaseꞌenafi andeandeꞌ datima. Newaꞌ alafugama basef ifimba basoꞌafi wafifi sagaꞌi basef gawaifi. Basef ifimbai faꞌi fegahambombaga waf Godi. q  21 Anis epes sahapifa basef ifimba basoꞌafi saꞌi, “Apaꞌ mogogawai.” Apaꞌ owaꞌ deiꞌ sakwaha sagahapifa God andola sape.

Aeꞌ aꞌi God notopalopepa dowaf nowaꞌ banagaipa. Eaꞌ maꞌuf.

Copyright information for `AOJ