Acts 15

Amam nematawa Kristen hiasi sandakolas

Anom amam magape Judiai miliana mataga Antiok maꞌipasa basef esis Kristen sagape wambota atota Godi. Masefela basef maꞌipas maꞌi, “Iꞌi ipaꞌ pindaiwaꞌma pigaila waf God nagaꞌipa Mosesafi ma owaꞌ petopaꞌ alop ipeꞌipia, atiasi God ina nuwambilaipa pitanimai, owaꞌatin.” a 

Amom maꞌias naꞌamba, mandaꞌ ukup Poli Barnabasi numbutip aꞌowaꞌ eaꞌ maꞌi basef banagafi mandahihianama maloma amom Judaimi. Eaꞌ esis Kristen sandandepa Poli Barnabas maloma anom amam magahapifa Kraisi wapani mondowasaꞌ Jerusalem maꞌi basef ifimba monandonaef maloma amom aposel maloma agufumi siosi.

Esis Kristen sasapaꞌam mafeꞌ eaꞌ mafeꞌ laꞌafena itap luꞌupa Fonisiai Samaria. Maꞌipasa basef esis Kristen sagape itap apamba biafipi ma sogogawa God eaꞌ nambema ukupa anis epes daias owaꞌ Judaisia. Esis Kristen sameꞌ basef ifimba fandaꞌ esis sandagala aꞌowaꞌ. b 

Amom mafeꞌ mataga Jerusalem, amom aposel maloma esis amam nematawa Kristen saloma agufumi asasimi sosafel sandalalamam sandaꞌmam gude amom. Eaꞌ Pol naloma Barnabas mosafel maꞌipas basefa maol hiani God natopalopama mandaꞌani. Owaꞌ anom Kristen Farisi mosafel maꞌipa esis maꞌi, “Ipaꞌ pendatopaꞌmasa alop asasipi, piꞌipasa sogaila wafa muꞌuli God nagasoꞌ Mosesani.”

Eaꞌ amom aposel maloma agufumi mugumafi maol Godi mandakolas mape eaꞌ monandona basef ifimba. c  Amom maꞌi basef hiafi ma eaꞌ, Pita nosafel nalutu naꞌipam naꞌi, “Ipaꞌ sahin owan, ipaꞌ pegawa, fowaꞌ God nawaloga maola afaꞌ, eaꞌ Anen nosahoꞌ aeꞌ eaꞌ ma egawalapa basef buꞌwafi ananifi ma epes daias owaꞌ Judaisia semeꞌefa sogahapifa God. d  God nogawa nelelemb esis amam nematawa hiasi eaꞌ, nihimbaꞌmafa nembel ananimbili ila ma esis. Anen nihimbaꞌmapa naꞌamba eaꞌ nasoꞌasa Ambal buꞌunai Ananinai esis siꞌi nagasoꞌapana apaꞌ. e  Anen ina nandaꞌ anef wafa apaꞌ a anef waf daiaf esis, owaꞌatin. Esis sahapifa God isimba atis opalef asasilifi fataga boꞌwalef. f  10 Deiꞌ maina ipaꞌ paꞌi ataꞌ pegagwamba God? Ipaꞌ ina pegwambasa hiahaom nimanimi esis Kristen sofaꞌam, owaꞌi. Fowaꞌ esis bafasapa eaꞌ apaꞌ wapani, ina laꞌifipama mogofaꞌ nimanimi ma mogatopaꞌ alop apeꞌipi, owaꞌatin. g  11 Apaꞌ mogawa ufiaꞌw akwamba Dembinai Jisas nagatopalopapa dowaf, deiꞌ God nofaꞌapa mutanimai eaꞌ ananipai, apaꞌ maloma esis wapani.” h 

12 Pita naꞌias naꞌamba owaꞌ, esis sandakolas atogini ina ataꞌ saꞌi anif basef, aꞌ owaꞌatin. Eaꞌ sambeꞌ aligaha Barnabasi Pol. Amom biam mawalapa basef hiafi ma God nowaꞌ banagam mandaꞌ hiahaom banagami siꞌi anen nandaꞌami ma nogohnaep esis amam nematawa owaꞌ Judaisia. i 

13 Amom maꞌipasa eaꞌ, Jems naꞌias naꞌi, “Ipaꞌ sahin owan, ipaꞌ pemeꞌ basef aeꞌafi. j  14 Simeon naꞌipapa eaꞌ ma dambadamba God nihimbaꞌmapa naliꞌ nagati esis amam nematawa owaꞌ Judaisia uwahipis nowambilai anis sogape ananisi. k  15 Eaꞌ basef fowaꞌ God nagaꞌipa amom profet fagail buk Baibeli eaꞌ naꞌamba atin siꞌi ifimba. Basef ifimba fagaꞌias faꞌi,

16 “Anafa aeꞌ itanima igafiꞌi, ipat atamba Deviti eaꞌ tagatuwi, atamba atiasi esaꞌmata totawa wapani. Hiahaom ipat atambai eaꞌ awasim, amamba atiasi endaꞌam motaga dambaim wapani, eaꞌ esaꞌmata totawa. 17 Ma atiasi esis soloma anis daias sogololama Godi wapani laꞌ lawa sogolaoma Dembinai, isimba hiasi efalasi eaꞌ aeꞌasi. 18 Fowaꞌ gani endilisi Dembinai nawalapa basef ifimba eaꞌ deiꞌ wapani naꞌif naꞌamba atin.”
19 Deiꞌ nomonas aeꞌasi sandandaꞌ naꞌamba. Epes anep miniꞌap asagambema nelelemb sagafeꞌma God eaꞌi, apaꞌ ina mosoꞌasa nimanimi esis, owaꞌ. l  20 Apaꞌ mondaꞌ anif basef fefeꞌma esis miꞌipas miꞌi ina seaꞌ gwaꞌaisi mais sondolalimasa god basoꞌamunaii, owaꞌi. Isimba alogw awagwi gwagailasi. Esis sindihiꞌamago waf afamba soꞌa waulafi eaꞌ ina seaꞌ mafis saham sogowaꞌ bamafugahama afumi, owaꞌi. Eaꞌ owaꞌi seaꞌ esimbela anis mafis amambai beloma anis daias wapani, owaꞌi. Aeꞌ aꞌi apaꞌ mondaꞌmasa basef ifimba atif fefeꞌma esis. m  21 Deiꞌ main, apaꞌ mogawa fowaꞌ gani nafiꞌi nafiꞌi nataga deiꞌ ma amom magawalapa basef God nagasoꞌ Mosesafi kofagefa eaꞌ ifimba atif magawalipasefa taun inimba hiani. Matalifamasef ifagw hiagwi apaꞌ Juda mandakolasugwi nimaguf hiafi sagapoma nomaꞌwafi.”

Esis sandaꞌ basef fafeꞌma esis Kristen owaꞌ Judaisia

22 Eaꞌ amom aposel maloma agufumi mugumafi maol Godi maloma esis Kristen hiasi saꞌi basef atifif sandandepa anom amam biam asasimi agufumi Judas agol waꞌagol Barsabas naloma Sailas. Amom biam amagah luꞌugahimi laꞌafena esis Kristeni. Eaꞌ saꞌi sosapaꞌam mefeꞌ Antiok moloma Poli Barnabas. 23 Esis sasoꞌama anif basef fagail pipai ma lagof amom biami Judasi Sailas fagaꞌi naꞌamba faꞌi, “Afaꞌ aposel afaꞌ agufufai sahopepa ipeꞌifai, eaꞌ afaꞌ deiꞌ wandaꞌago basef ifimba fafeꞌmago ipaꞌ sahin owan owaꞌ Judaipaia. Ipaꞌ pagape wambel Antioki ma itap luꞌupa Siriai Silisia, afaꞌ waꞌi nemaf buꞌwafi ma ipaꞌ sahin owan. n  24 Afaꞌ wameꞌas eaꞌ anis epes afaꞌisi safoꞌo sandaꞌepa pesafel gogolalasipa kwapeteꞌ ma basef asasifi, sandaꞌepa ombal mahepa ukup pandopelaepa. Esis sandaꞌam naꞌamba saꞌi sogahondoꞌ ukup ipeꞌipi. Apaꞌ afaꞌ inaꞌ waꞌipas safoꞌo sondaꞌepa naꞌamba, owaꞌ. 25 Afaꞌ wameꞌ basef ifimba eaꞌ waꞌipasa ukup pape atogon waꞌi basef wandameꞌmaef. Eaꞌ wandandepa amam amamba biama osapaꞌam mofeꞌmago ipaꞌ molomago biam apaꞌ ukup pagailam aꞌowaꞌi, Barnabasi Pol. 26 Amom biam ina ombal mahama mogololama ambagof amamugufi ma mogasaꞌma agol Dembinai apeꞌinai Jisas Kraisi mondaꞌ maol ananini, owaꞌ. 27 Afaꞌ deiꞌ wasapaꞌago Judas naloma Sailas ama atiasi miꞌipipa basef ifimba atif afaꞌ waꞌif wandaꞌef fagafeꞌmago ipeꞌi malogof amamugufi. o  28 Holi Spirit Ambal Godi nape nalomafa waꞌi basef wandameꞌmaef naꞌamba. Afaꞌ ina oseꞌepa anom nimanimi pefaꞌam, owaꞌ. Waf afambai atef ipaꞌ pendandaꞌaf. p  29 Ipaꞌ ina peaꞌ mafis saham sondolali ma god basoꞌamunaii, owaꞌi. Ipaꞌ ina peaꞌ esimbela anis mafis, owaꞌi. Ipaꞌ ina peaꞌ mafis sogowaꞌ bamafugahami ma afumi, owaꞌi. Eaꞌ pindihiꞌama waf afamba soꞌa waulafi awafi. Iꞌi ipaꞌ solawaipa andeandeꞌma pindihiꞌama waf afambai, andeandeꞌ ipaꞌ aꞌ pendaꞌ waf buꞌwafi.”

30 Eaꞌ esis sios sasapaꞌam mafiꞌi Antiok, makolasai esis Kristen atogon masoꞌasa pas isimba. 31 Eaꞌ esis satilis sonahasa basef ifimba buꞌwafi fegewaꞌ banaga esisi. q  32 Judas naloma Sailas amom profet. Deiꞌ maꞌipasa basef hiafi buꞌwafi esis Kristen, mowaꞌ banagas mafela ukup asasipi. 33 Amom ataꞌ mapani nogota laota kwasakwasala Antiok, esis Kristen sandaꞌmam nemaf buꞌwafi ma amom mogape ukup awanep. Eaꞌ sasapaꞌam mutanima mafeꞌ ma esis sasapaꞌam magafiꞌii. 34 [Apaꞌ Sailas naꞌi ataꞌ nupani Antiok.] 35 Owaꞌ owaꞌatin. Barnabas naloma Pol atom ataꞌ mapani Antiok, mandaꞌ maol maloma anom amam hiami wapani mawalapa basef buꞌwafi Dembinaii mawalipasef.

Poli Barnabas eaꞌ mandawal mafeꞌ daindai

36 Ama main anif nimaguf fafeꞌ ma hiꞌalef owaꞌ, Pol naꞌipa Barnabas naꞌi, “Afaꞌ biafa ataꞌ otanima ofeꞌ uti esis Kristen sahin owan taun hiagoma fowaꞌ wafeꞌ wagawalapa basef Dembinaima. Ama ogogawa esis, sape andeandeꞌ aꞌa owa.” r 

37 Eaꞌ Barnabas naꞌi noꞌwa Jon Mak nefeꞌ nolomam. Apaꞌ Pol nandaiwaꞌma anen nefeꞌ nogalomam. Deiꞌ main, aman anamba fowaꞌ nakwaha amom gani Pamfilia notanima nafeꞌ. Ina nalomam atin mafeꞌ mandaꞌ maol hiꞌalan, owaꞌ. 39 Amom biam mandaꞌ migimigaha isimba eaꞌ deiꞌ ina ataꞌ mandaꞌ maol atogon, aꞌowaꞌ. Eaꞌ Barnabas naoꞌwa Jon Mak nafeꞌ nalomana malota anop sip mafeꞌ anin ailan agol Saiprus. s  40 Apaꞌ Pol naoꞌwa Sailas nalomana mafeꞌ. Eaꞌ esis Kristen hiasi sasapaꞌam saꞌi, “Okom luꞌunai Dembinai nope nolomepa notopalopepa dowaf numafipa.”

41 Eaꞌ nafeꞌ laꞌafena itap apamba biafip luꞌupa Siriai Silisia naloma Sailas mafeꞌ mowaꞌ banaga esis Kristen.

Copyright information for `AOJ