John 21

Alipumi Jisasi amom 7-pelaim matolona

Jisas nagaꞌ nosafel wapani ma eaꞌ, alipufai ananifai aꞌ watolona wapani nimaguf bif. Aꞌi owaꞌ main, wagiꞌ watolona wapani. Basef fagaꞌias naꞌamba. Jisas nafeꞌma afaꞌ gani dumb luꞌwambi Taiberias. Anofa afaꞌ ondowaꞌanima atogon wagapani afamba. Saimon Pita, Tomas agol waꞌagol Didimas maloma Nataniel, anen Kenainai, itap luꞌupa Galili. Amom maloma nogaopana biam Sebedii maloma amom biam daiam Jisasi ondowaꞌanima wape atogon. a  Eaꞌ Saimon Pita naꞌipafa naꞌi, “Aeꞌ aꞌi efeꞌ igi agof.”

Eaꞌ afaꞌ waꞌi, “Olomena ofeꞌ atin.”

Eaꞌ wafeꞌ walota anota bot wafeꞌ waꞌi ugi agof wafeꞌ wandaꞌam owamb ambamba laomb dandaꞌ apaꞌ afaꞌ ina wagi anol aol, owaꞌatin.

Wafilu kuhimbita atota Jisas nafeꞌ nalutu dumb ambamba akata apaꞌ afaꞌ ina ogawa waꞌi anen Jisas, owaꞌ. b 

Eaꞌ nofalafa naꞌi, “Awami saꞌupai, ipaꞌ pagi anogof agof aꞌa owaꞌ?”

Eaꞌ wagwamana basef waꞌi, “Owaꞌatin.” c 

Eaꞌ naꞌipafa naꞌi, “Ipaꞌ ataꞌ pela anemb bewala bot atamba waꞌol lagol kwahisigilima. Eaꞌ atiasi apiti anogof agof.”

Eaꞌ afaꞌ waꞌi ola anemb owaꞌ, owafai agof hiami. Eaꞌ ina laꞌififa ogagiai anemb bilitai begatoma bot nomon, owaꞌatin. Deiꞌ main? Agof hiami aꞌowaꞌ mala anemba namba asiꞌina. d 

Aeꞌ alipuwai Jisasi okom magamagailai, aꞌipa Pita aꞌi, “Nanumba Dembinai afaꞌinai.”

Saimon Pita dokoꞌ natagwaha saket ananitai taꞌoh eaꞌ nandaꞌ maol owaꞌ, nameꞌ basef ifimba nala saket wapani nandaꞌ kopiꞌ nowala embel dumb nopaul nafeꞌ embel.
Eaꞌ afaꞌ daiafa watoma bot wagiꞌmana wagiai anemb siꞌinama agof. Afaꞌ ina wail laogona akata, owaꞌ. Siꞌi 100 mita. Wafeꞌ wataga akata, wati anif nif fandif eaꞌ wati anagof agof fasef nif faloma anota bret.

10 Eaꞌ Jisas naꞌipafa naꞌi, “Ipaꞌ faꞌi anagof agof dokoꞌ pagagiagufi.” e 

11 Eaꞌ Saimon Pita nalota bot atamba nagiai anemb bafiꞌi akata. Anemb ambamba siꞌimba agof luꞌwagufi atogof 153-pelaiguf. Apaꞌ anemb ina peleꞌatamb, owaꞌatin.

12 Eaꞌ Jisas naꞌipafa naꞌi, “Ipaꞌ fiꞌi ma ataꞌ peaꞌ gwaꞌaisi.”

Apaꞌ afaꞌ ina anona banagona ma nohaliꞌana nigaꞌi, “Inaꞌ ami?”

Owaꞌatin. Deiꞌ main, afaꞌ ogawa anen Dembinai afaꞌinai. f 
13 Jisas nafiꞌi nofaꞌ bret nasoꞌafa, a agof wapani naꞌamba atin. g 

14 Fowaꞌ Jisas nogosafel wapani, naliꞌ nafeꞌma afaꞌ alipufai ananifai watolona nimaguf bif. Aꞌi owaꞌ main, deiꞌ watolona wapani aꞌ wanif. h 

Jisas naꞌipa Pita naꞌi, “Inaꞌ neseꞌama gwaꞌaisi sipsip aeꞌami”

15 Afaꞌ waꞌ gwaꞌaisi ma eaꞌ, Jisas naꞌipa Saimon Pita naꞌi, “Saimon nogama Joni, inaꞌ okom maimaili aꞌowaꞌ nikilaꞌ anom alipumi amamba daiam, aꞌa owaꞌ?”

Eaꞌ anen naꞌi, “Ahoꞌ, Dembinai. Inaꞌ negawa aeꞌ okom maimailina.”

Eaꞌ Jisas naꞌipana naꞌi, “Inaꞌ neseꞌama gwaꞌaisi sipsip nogami aeꞌami.” i 

16 Eaꞌ Jisas nahaliꞌana wapani naꞌi, “Saimon nogama Joni, inaꞌ okom maimaili endilisi, aꞌa owaꞌ?”

Eaꞌ nagwamana basef naꞌi, “Ahoꞌ, Dembinai. Inaꞌ negawa aeꞌ okom maimailina.”

Eaꞌ Jisas naꞌipana naꞌi, “Inaꞌ nimafi sipsip aeꞌami.” j 

17 Jisas naliꞌ nahaliꞌana bif eaꞌ deiꞌ nahaliꞌana wapani aꞌ wanif naꞌi, “Saimon nogama Joni, inaꞌ okom maimaili aꞌa owaꞌ?”

Eaꞌ Pita okom iwanim naꞌipana naꞌi, “Dembinai, inaꞌ negawa hiahaom hiami. Inaꞌ negawa aeꞌ okom maimailina.”

Eaꞌ Jisas naꞌipana naꞌi, “Inaꞌ neseꞌama gwaꞌaisi sipsip aeꞌami.
18 Endilisi aeꞌ aꞌipina, fowaꞌ inaꞌ ataꞌ saꞌwina, inaꞌ nowahoꞌ let eaꞌ nafeꞌ mamahagoma nomonas ineꞌisi saꞌi negafeꞌma. Apaꞌ owagama inaꞌ negatagama hagena, inaꞌ atiasi nendowa logof ineꞌigufi ma anom amam daiam mowahoꞌmena let mohapilina nefeꞌ anamba inaꞌ nindaiwaꞌmagoma.” k 

19 Jisas naꞌipana naꞌamba ma nigihimbaꞌmam ufiaꞌw ma soha Pita nogagaꞌ ma epes hiasi sogasaꞌma agol Godi luꞌwagol.

Eaꞌ deiꞌ Jisas naꞌipana naꞌi, “Nila aeꞌ.” l 

Basef alipunai Jisas okom magamagailana aꞌowaꞌi

20 Eaꞌ Pita nandambema nati aeꞌ, alipuwai Jisas okom magamagailai, agiꞌmam afiꞌi. Aeꞌ maꞌuwi fowaꞌ afaꞌ wape waꞌ gwaꞌaisi ma indisiꞌah felefeleꞌma Jisas ahaliꞌana agaꞌi, “Dembinai, atiasi ami niꞌipa boumi ma nigihimbaꞌmama inaꞌ negapoma?”

21 Eaꞌ Pita natiti aeꞌ, nahaliꞌ Jisas naꞌi, “Dembinai, aman anamba anaf nope niꞌimama?” m 

22 Eaꞌ Jisas nagwamana basef naꞌi, “Iꞌi aeꞌ iꞌi anen aꞌ nope ambal lopaona nope nefeꞌ nefeꞌ afamba aeꞌ igitanimai, isimba ina maol ineꞌini, owaꞌatin. Inaꞌ nila aeꞌ.”

23 Eaꞌ basef basoꞌafi wafifi ifimba fafeꞌma afaꞌ alipufai Jisasi faꞌias naꞌamba faꞌi, “Aman anamba anaf ina nogaꞌ, owaꞌ.”

Apaꞌ Jisas ina naꞌipafa basef ifimba esis sagaꞌiefi, owaꞌ. Basef ifimba kwamaifi.

Jisas naꞌi basef ifimba atif naꞌi, “Iꞌi aeꞌ iꞌi anen nope nefeꞌ nefeꞌ ma nemaf aeꞌ igitanimai, isimba ina maol ineꞌini, owaꞌatin.” n 

24 Aman anamba alipunai Jisasi eaꞌ aeꞌ maꞌuwi. Aeꞌ aꞌipipa basef ifimba ma hiahaom amamba Jisas nandaꞌami deiꞌ andaꞌam magail buk akwaꞌi. Apaꞌ Kristen mogawa basef ifimba endilisifi atif aeꞌ andaꞌafi. o 

25 Jisas nandaꞌ anin maol hiani daian wapani. Iꞌi anis epes sondaꞌ basefa maol Jisasi hiꞌilan filai, aeꞌ aꞌi itap anamba hiagoma owaꞌ anagona buk hianai nogaꞌoha, owaꞌatin. Asiꞌigin dog.

Basef eaꞌ maꞌuf.

Copyright information for `AOJ