1 Corinthians 11

IpeꞋ okokoma waf aeꞋanai pila aeꞋ siꞋi aeꞋ okokoma waf Kraisi ailana.

Waf saseꞋala balagah ma sandaꞋ lotu

LaꞋelaꞋef ipeꞋ okokoma aeꞋ paila basef amama hiami aꞋipipami. Basef amama efaꞋami deiꞋ aꞋipipam ipeꞋ. Amama atom deiꞋ anifelipa aꞋi pandaꞋ waf buꞋunai endilisi.

DeiꞋ aeꞋ aꞋi ipeꞋ pegawa basef amama. Agilinai amam hiami anan Krais atona eaꞋ agilinai akoꞋunai waulunamaꞋw atona eaꞋ agilinai Kraisi God atona. IꞋi emi aman Ambal BuꞋunai Godi nefelona naꞋipasa basef Godi siꞋi profet o nandaꞋ beten ama siti anan naseꞋala balaga, aman anama nandaꞋ agel Kraisi nowala. EaꞋ emi nemataꞋw wapotiꞋ Ambal Godi nafeloꞋw kwaꞋipasa basef Godi siꞋi profet o kwandaꞋ beten ama owaꞋ koseꞋala balaga akoꞋunai, akwaꞋw wapotiꞋ kwandaꞋ agel waulunamaꞋwi aona. Amama naꞋama etin siꞋi kwando balaga akoꞋunai hiꞋalana. IꞋi nematawa owaꞋ oseꞋala balagah awaumi, awo otopaꞋam bandam. Waf apeꞋ hiapai nape naꞋama. IꞋi ambagof aoma weatopaꞋam bandam o ondowam hiꞋilam, apeꞋ maꞋi waf anama aonai nandaꞋ nematawa ambagof aom. DeiꞋ amama atom andeandeꞋma awo oseꞋalom.

Amam ina moseꞋala balagah amamumi, owaꞋ. DeiꞋ main, God nandaꞋ amam mandati siꞋi Anan ama mowalapai pepel luꞋunai Ananinai. EaꞋ nematawa wawalapai pepel luꞋunai amami. DeiꞋ main, God ina nandaꞋ amana alop nemataꞋwi, owaꞋ. Anan nandaꞋ nemataꞋwa alop amani. EaꞋ amama wapotiꞋ, God ina okom naꞋi nemataꞋw deiꞋ nandaꞋ amana nagiambama akwaꞋw, owaꞋ. Anan okom naꞋi aman deiꞋ nandaꞋ nemataꞋwa kwagiambamana. 10 Amama atom deiꞋ nematawa oseꞋala balagah awaumi ondolaꞋwifa ope owina amam wauhupawa awoumi. Awo oseꞋalam ombahoꞋama umbamahawa ma amam ensel motolowa.

11 ApeꞋ mape laꞋifipama Dembinai mape naꞋama. Ina nemataꞋw atoꞋw kope aman aꞋakw aman atona nope nemataꞋw aꞋana, owaꞋ. 12 God nandaꞋ nemataꞋwa alop amani eaꞋ naꞋama etin deiꞋ nandaꞋ amam mataga alop nematawai. EaꞋ God ofagonama amamaga amama hiami hiꞋalam.

13 DeiꞋ ipeꞋ etipa ataꞋ pewaloga basef amama. IꞋi nematawa ina oseꞋala balagah awaumi ondaꞋ betena God, amama andeandeꞋ o owaꞋ? 14 Waf apeꞋinai amam nematawai atona nihiꞋambepa naꞋama. IꞋi amam balagah laumi, amama mandaꞋam ambagof aom. 15 EaꞋ iꞋi nematawa balagah mopaiwa, andeandeꞋ, balagah siꞋi sosaf buꞋunai awaunai. DeiꞋ main, God atona naseꞋawa balagah laumi awo ma mosoꞋala balagah awaumi. 16 EaꞋ iꞋi emi epen nesmbala basef amama, anan negawa apeꞋ ina maila anona waf, owaꞋetin. Maila waf anama atona. EaꞋ esis amam nematawa Godi hiesi deiꞋ sailana naꞋama etin.

Esis Korin sahambombaga gwaꞋaimi Dembinai

17 AeꞋ aꞋi iꞋipipa anom basef ma ipeꞋ, eaꞋ aeꞋ ina efela agof ipeꞋimi, owaꞋ. Nogota anama pandakolas pandaꞋ lotu, amama mahambombagepa. 18 AꞋi iliꞋ iꞋipipa amama. Nogota anama ipeꞋ pandakolas pandaꞋ lotu, ipeꞋ pandawal etin. AeꞋ ameꞋ basefa ipeꞋ naꞋama. EaꞋ aeꞋ okom naꞋi endilisi ipeꞋ pandawal, o owaꞋ? 19 Endilisi, ipeꞋ pandawal etin paꞋi waf anama buꞋunai ma emi egafis saila basef endilisi sotaga sondawalap alihis? OwaꞋetin. 20 Nemaf anama ipeꞋ hipei pandakolas, ipeꞋ ina pefaꞋ gwaꞋaimi Dembinai, owaꞋ. 21 IpeꞋ hipei atona etin mehip paliꞋ paꞋ gwaꞋaimi ipeꞋimi atom. EaꞋ anin nolomahan nape, eaꞋ enin epen naꞋ embel wain hianai nahaga nagaol. 22 IpeꞋ ifagw aꞋepama peaꞋ gwaꞋaimi embel maim? IpeꞋ paꞋi amam nematawa Godi isima awasi falafisi etis? IpeꞋ paꞋi pendaꞋ enis epes gwaꞋaimi aꞋasi ambagof aom? DeiꞋ atuwasi iꞋi maim basefa ipeꞋ? Efela agof ipeꞋimi? OwaꞋetin. Amamaga amama ipeꞋ pandaꞋami aeꞋ ina anifelipa efela agof ipeꞋimi, owaꞋ.

Dembinai Jisas naseꞋama gwaꞋaimi ananimi amam alupumi Ananimi

23 Basef amama aeꞋ aꞋipipami amama aeꞋ efaꞋama Dembinai atona. Amama naꞋama. Owamb anama Judas naseꞋama Jisas nafeꞋ lagof amam naumbih, ma owamb anama Dembinai Jisas nafela bret 24 eaꞋ nanifela God nawalona naꞋi, “Anama alop aeꞋanai, aseꞋepana agiambamepa. IpeꞋ pendaꞋam naꞋama etin ukup okokoma aeꞋ.”

25 Amam maꞋam hiꞋalam, Anan nafelai anona kap embel malanai nandaꞋam naꞋama etin naꞋi, “Kap anama basef laꞋifimi dambaimi aeꞋami endilisimi atom. Basef amama esimbel aeꞋami atom malo magiambamepa. Nimeguf hiami danda ipeꞋ pendaꞋ amama peaꞋ embel, pendaꞋam naꞋama ma ukup okokoma aeꞋ.”

FowaꞋ Jisas naꞋipa alupumi ananimi naꞋama.
26 Nimeguf hiami ipeꞋ peaꞋ bret naloma kap embel amama, ipeꞋ pewalapa basefa Dembinai nagaꞋ motaga alihim mefeꞋ mefeꞋ motagama nemaf Anan niefiꞋianai.

Emi epen nehambombaga gwaꞋaimi Dembinai, ofagema ananimi atom

27 IꞋi enin epen owaꞋ okokom miliꞋ andeandeꞋ ma neaꞋ gwaꞋaimi amama bret naloma embela kap Dembinai neaꞋam naꞋa, enin nandaꞋ waf aonai ma alop noloma esimbel Dembinai, eaꞋ epen inima ofagema mopoma enin etin. 28 ApeꞋ hiapai ataꞋ muliꞋ nomonas motamea andeandeꞋ meaꞋ bret noloma embel kap amama. 29 DeiꞋ main, iꞋi epen owaꞋ nomonas motamea andeandeꞋ ma basef ofagema ma alop Dembinai ma enin neaꞋ gwaꞋaimi embel naꞋa, ofagema mapoma epen inima etin. 30 Amama atom deiꞋ amam nematawa hiesi ipeꞋisi owaꞋ laꞋifis eaꞋ awes hianai nandaꞋas eaꞋ enis sagaꞋ ma waf anama. 31 IꞋi apeꞋ muliꞋ nomonas motamea andeandeꞋ, anona nemaf ina anom ofagema motagama apeꞋ, owaꞋ. 32 EaꞋ iꞋi Dembinai nihihiꞋa waf apeꞋinai ma nogwa waf aonai ma apeꞋ, amama Anan naseꞋapa nimanimi nandaꞋapa mope andeandeꞋ ma anona nemaf ina higililapa moloma epes saila waf etapanai, owaꞋ.

33 EaꞋ deiꞋ ipeꞋ alupipei aeꞋipei, maina nemaf ipeꞋ pendakolasa peaꞋ gwaꞋaimi Dembinai, ipeꞋ ataꞋ pepe pehafa enis sifiꞋi. 34 IꞋi emi egafis nolomohas, esis ataꞋ siliꞋ seaꞋ gwaꞋaimi ifagw asasimi. NaꞋama God nondaꞋmepa basefa ipeꞋ.

Basef amama tuꞋwanim mapani ataꞋ owaꞋ iꞋipipami, maina nemaf efeꞋmago ipeꞋ, iꞋipipam.

Copyright information for `AOJFILIFITA