1 Corinthians 12

Presen amamaga buꞋwami Ambal BuꞋunai Godi nasiꞋipami

IpeꞋ alupipei, aeꞋ aꞋi endaꞋmepago basef amama ma presen amamaga buꞋwami Ambal BuꞋunai Godi nasoꞋ ipeꞋ atona etinami. DeiꞋ main, andaiwaꞋma enipa ipeꞋ ukup mololaipa ma amama. IpeꞋ pegawa ma fowaꞋ ipeꞋ ataꞋ pape awepa ma pape pandaꞋ waf aonai pelolama God, nogota anama ipeꞋ ukup maila god basoꞋomainai maima mahondeꞋipei pailam owaꞋ moga mieꞋi. EaꞋ ipeꞋ pegawa emi epen Ambal BuꞋunai Godi nafelan naꞋi basef, ina niꞋi basef niꞋi, “Jisas owagama higililana,” owaꞋ. EaꞋ emi epen Ambal BuꞋunai Godi aꞋani, enin ina anona nemaf niꞋi basef niꞋi, “Jisas Anan Dembinai,” owaꞋ.

Presen anama buꞋunai Ambal BuꞋunai Godi naseꞋapana naꞋai, anama hianai naninani. Anama Ambal Godi atona naseꞋapana. Maol Dembinai hianai naninani nape, eaꞋ Dembinai atotona nape numafiana. Waf hianai naninani mandaꞋ maolanai, eaꞋ God atotona naseꞋapa pepel epes hiapai ma laꞋifipa mondaꞋ maol anama hianai.

Ambal BuꞋunai Godi nawalapa pepel ananinai ma epes hiesi atona etina nagiambama hiesi. Epen atitin Ambal BuꞋunai Godi naseꞋan pepela nihiꞋambamasa gawa hianai buꞋunai naninani ma nowalapa basefa epes hiesi. EaꞋ enin epen Ambal BuꞋunai Godi anama atona naseꞋana pepela newalapa basef ofagema waf Godi ma esis amam nematawa sogawam andeandeꞋ. EaꞋ enin epen Ambal BuꞋunai Godi atona nagiambaman nembaleꞋefa God nataga laꞋifin nandaꞋ maol ananinai andeandeꞋ. EaꞋ enin epen nefaꞋ pepela nigiambama epes isima awes nandaꞋasi sataga boꞋwes. Ambal BuꞋunai anama atona. 10 EaꞋ enin epen Ambal Godi nagiambaman naseꞋan pepela nendaꞋ amamaga laꞋifimi siꞋi God nandaꞋami. EaꞋ enin epen Ambal Godi nafelan naꞋi basef Godi. Enin epen nefaꞋ gawa ma newaloga ambagof mamumami hiami, buꞋwami o awami. EaꞋ enin negawa ma naꞋi diga naninani hianai. EaꞋ enin epen negawa ma nemboma basefa diga naninani. 11 Ambal BuꞋunai Godi anama atona nandaꞋ maol nawalapa presen anama hianai. Ama okom ananinai atona naseꞋas presen anama buꞋunai nafeꞋma epes hiesi atona etin.

ApeꞋ amam nematawa Godi siꞋi alop waꞋawaꞋana alop atotona

12 Alop apeꞋ epesi etifina eaꞋ waꞋawaꞋana hianai eaꞋ alop anama hianai luꞋuna saꞋona nafeꞋ nail alop siꞋina atotona. Krais wapotiꞋ naꞋama etin. 13 DeiꞋ main, apeꞋ hiapai mofaꞋ baptaisa Ambal BuꞋunai Godi atotona. NandaꞋapa mataga alop atotona, esis Juda saloma esis owaꞋ Judaisi saloma esis sape wafifisi, saloma esis agof aꞋasi sape owina enis epes wapotiꞋ. ApeꞋ hiapai mofaꞋ Ambal Godi atotona nape nalomapa laꞋelaꞋef.

14 ApeꞋ mogawa alop ina etifina, owaꞋ. Alop waꞋawaꞋana hianai. 15 IꞋi boꞋwaga niꞋi, “AeꞋ ina lagol ape alop siꞋina, owaꞋ.” IꞋi boꞋwaga anama niꞋi basef naꞋamani, ina andeandeꞋ, owaꞋ. Basef amama hapaimi. BoꞋwaga nape alop siꞋina anama atona.

16 EaꞋ aliga wapotiꞋ niꞋi, “AeꞋ ina naep ape alop siꞋina, owaꞋ.” IꞋi aliga niꞋiam naꞋama, ina andeandeꞋ, owaꞋ. Basef amama hapaimi. Aliga nape alop siꞋina anama atona. 17 IꞋi alop hianai siꞋina eaꞋ naep atom hiꞋilam, deiꞋ nemeꞋ basef niꞋimama? OwaꞋ. IꞋi alop hianai siꞋina aligah atom mope hiꞋilana, deiꞋ nemeꞋ alogw niꞋimama? 18 EaꞋ alop ina nataga siꞋi naꞋama, owaꞋ. God atona fowaꞋ nogawa okom naꞋi alop atona etin luꞋuna saꞋona deiꞋ nandaꞋana nape nandahama siꞋi okom ananinai atona naꞋiam. 19 IꞋi alop waꞋana nope anona alop etifina hiꞋilana, alop anama siꞋina ina nape alop endilisinai, owaꞋ. 20 Alop ina nataga nandandaꞋ naꞋama, owaꞋ. Alop waꞋawaꞋana saꞋosaꞋona hianai, eaꞋ alop siꞋina etifina.

21 Naep ina laꞋifima miꞋipa lagof miꞋi, “AfaꞋ wandaiwaꞋma ipeꞋ pepe pelomafa. AfaꞋ atofa ope, andeandeꞋ.”

EaꞋ balaga wapotiꞋ ina laꞋifima niꞋipa boꞋwagah niꞋi, “AeꞋ andaiwaꞋma ipeꞋ pepe pelome, owaꞋ. AeꞋ atowe epe, andeandeꞋ.” OwaꞋetin.

22 Alop anama waꞋawaꞋana falafuna apeꞋ maꞋi owaꞋ laꞋifina, iꞋi anama owaꞋ nondala nope, anona nemaf alop anama siꞋina ina laꞋifina, owaꞋ. 23 EaꞋ alop anama waꞋana apeꞋ ambagof awamunai, apeꞋ mofaloꞋmana endilisi mumafiana andeandeꞋ. 24 EaꞋ alop waꞋawaꞋana owaꞋ ambagof awamunai, anama apeꞋ ina mofaloꞋmana mumafiana naꞋama, owaꞋ. Alop anama wila ma nandala nape. God atona nasa alop anama waꞋawaꞋana hianai nail etifigin nataga alop atotona. Alop waꞋawaꞋana hianai agof aꞋanai God nandana nataga buꞋunai. 25 Anan nandaꞋam naꞋama ma alop anama ina anona nemaf nondawal waꞋawaꞋana, owaꞋ. Alop anama hianai waꞋawaꞋana nimafiana atona etin. 26 IꞋi alop waꞋana nemeꞋ ekepehana, alop hianai siꞋina atuwasi nemeꞋ ekepehana naꞋama etin. IꞋi enis epes sinifela waꞋana, hianai siꞋina nondanifel hiꞋilana nolomana.

27 Amama atom deiꞋ ipeꞋ hipei pape alop Kraisi siꞋina. EaꞋ ipeꞋ hipei atona etin alop waꞋawaꞋana ananinai atona. 28 God nahapona enis epes ananisi sape naꞋama ma sios. MaliꞋi aposel, sagiꞋi profet, safeꞋma wenifi, esis tisa sawalipasa basef ofagema Godi. EaꞋ sagiꞋma amama epes isima sandaꞋ betena sandaꞋ laꞋifimi siꞋi God nandaꞋami. EaꞋ epes isima sandaꞋ awes nandaꞋasi sataga boꞋwes wapotiꞋ eaꞋ esis isima sagiambama enis epesi, saloma amam mumafi maol siosi naninani hianai saloma isima sogawa ma siꞋi diga naninani hianai. 29 DeiꞋ ipeꞋ ukup mape maꞋimama? IpeꞋ paꞋi amam hiami mape aposel atom? PaꞋi amam hiami mape profet atom? IpeꞋ paꞋi amam hiami mape tisa atom? PaꞋi esis hiesi sandaꞋ amamaga laꞋifimi siꞋi God nandaꞋami? 30 PaꞋi esis hiesi sofaꞋ presen anama buꞋunai ma sondaꞋ awes nandaꞋasi sataga boꞋwes wapotiꞋ? PaꞋi esis hiesi sogawa ma siꞋi diga naninani hianai? PaꞋi hiesi sogawa ma somboma basefa diga anama naninani? OwaꞋetin. 31 EaꞋ ipeꞋ hipei ukup mohafela pefaꞋ presen amamaga buꞋwami maliꞋi.

EaꞋ deiꞋ aꞋi ihiꞋambepa anona eaf buꞋunai nikilaꞋ endilisi presen anama hianai.

Copyright information for `AOJFILIFITA