1 Corinthians 14

Presen amamaga buꞋwami Ambal BuꞋunai Godi naseꞋapami

IpeꞋ laꞋifipa piliꞋ ukup mila epes hiesi peseꞋasa opalef esis. EaꞋ ukup ipeꞋimi mohafel endilisi ma pefaꞋ presen anama buꞋunai Ambal BuꞋunai Godi naseꞋapanai. EaꞋ presen naliꞋi ma ipeꞋ pendaꞋ maol laꞋifipa pefaꞋanai, anama naꞋama. Presen Ambal Godi nefelepa ma pewalapa basef Godi siꞋi profet. ApeꞋ mogawa emi egafis saꞋi basefa diga naninani esis ina saꞋipa anom basef epes, owaꞋ. SaꞋi saloma God atona. DeiꞋ main, ina enis epes sagawa diga anama, owaꞋ. Pepel Ambal Godi atona esis saꞋi basef amama fowaꞋ mape mandambahiꞋi. EaꞋ emi egafis Ambal Godi nafelasa saꞋi basef Godi siꞋi profet, epes isima saꞋipam sandaꞋam saꞋipasam sandaꞋas laꞋfisa sombaleꞋefa Dembinai eaꞋ saꞋipas safelasa sondaꞋ waf buꞋunai nondaꞋ opalef asasimi awanem. Emi egafis saꞋi basefa diga naninani, esis sandaꞋ esis etis sataga laꞋifis. EaꞋ emi egafis Ambal Godi nafelas sawalapa basef Godi siꞋi profet, isima sandaꞋ esis amam nematawa Kristen sataga laꞋifis. AeꞋ okom naꞋi ipeꞋ hipei piꞋi basefa diga naninani. EaꞋ emi egafis Ambal Godi nafelasa sowalapa basef Godi siꞋi profet, esis sikilaꞋ epes isima saꞋi basefa diga naninani owaꞋ sombomam siꞋiam alihim. DeiꞋ main, iꞋi epen inima owaꞋ nembomam niꞋiam alihim, basef amama ina migiambama esis amam nematawa Kristen sotaga laꞋifis, owaꞋ. EaꞋ iꞋi nembomam alihim, basef amama migiambamas sotaga laꞋifis.

Alupipei, ipeꞋ ukup mopama basef amama andeandeꞋ. IꞋi aeꞋ efeꞋmago ipeꞋ ma iꞋi basefa anona diga, atuwasi igiambamepa petaga laꞋifipa piꞋimama? OwaꞋetin. EaꞋ iꞋi embomam iꞋipipa anom basef God nihiꞋambepam iꞋipipa gawa buꞋunai ipeꞋ iwalipipama basef ofagema Godi siꞋi profeta Ambal Godi nefela aeꞋ ieꞋipipami.

ApeꞋ mowalapa basef Godi alihima diga

Amamaga ambal aꞋami, siꞋi batagw moloma gita, amama naꞋama etin siꞋi diga anama hianai. IꞋi amam owaꞋ mogal melef mondaꞋ maguf mamumami motaga, atuwasi membeꞋ aligah mogawa maguf amamumi alihim miꞋimama? OwaꞋetin. IꞋi bugel alof owaꞋ nogal niꞋi alihina, amam mondaꞋ wandafi mundamafuma mope mondandombola wandaf miꞋimama? OwaꞋetin. IpeꞋ wapotiꞋ naꞋama etin. IꞋi ipeꞋ piꞋi basefa anona diga esis owaꞋ sogawanai, atuwasi sogawa basef amama ofagema siꞋimama? OwaꞋetin. Atuwasi basef ipeꞋimi mefeꞋ hiꞋilam etin. 10 Endilisi, naninani nape etap anaeꞋ. EaꞋ ina anona diga falafunai atona, owaꞋ. Basef ofagema mape diga naninani hianai. 11 IꞋi aeꞋ owaꞋ egawa basef ofagema enin epen naꞋiami, atuwasi anan okom nopoma aeꞋ niꞋi aeꞋ epen aꞋi anona diga anona wambel. EaꞋ aeꞋ wapotiꞋ okom napoma enin, iꞋi naꞋi anona diga anona wambel. 12 IpeꞋ wapotiꞋ naꞋama etin. IpeꞋ ukup mohafel endilisi ma pefaꞋ presen anama buꞋunai Ambal Godi nasiꞋipanai. EaꞋ ipeꞋ pendaꞋ maol laꞋifipa endilisi ma pefaꞋ presen anama nagiambama eses Kristen sotaga laꞋifis.

13 EaꞋ epen emi naꞋi basefa anona diga, anan nendaꞋ betena Goda neseꞋan gawa nemboma basefa diga anama. 14 DeiꞋ main, iꞋi endaꞋ betena anona diga, ambal aeꞋanai atona nandaꞋ beten, eaꞋ okom aeꞋanai nape etin. 15 EaꞋ deiꞋ endaꞋam iꞋimama? AeꞋ endaꞋ betena ambal aeꞋanai eloma okom aeꞋanai wapotiꞋ. AeꞋ endaꞋ awalefa ambal aeꞋanai eloma okom aeꞋanai wapotiꞋ. 16 IꞋi ipeꞋ pinifela Goda ukup ipeꞋimi atom, ama epen owaꞋ nefaꞋ presen anama buꞋunai Ambal Godi nasiꞋipanai, deiꞋ anan negawa niꞋimama ma beten anama ipeꞋinai ma nieꞋi endilisi? OwaꞋetin. IꞋi ipeꞋ pendaꞋ beten piꞋi basef buꞋwami endilisi, ina pigiambama epen inima netaga laꞋifin, owaꞋ. DeiꞋ main, anan ina negawa basef amama ipeꞋimi, owaꞋ. 18 AeꞋ anifela God nimeguf hiami ma aeꞋ aꞋi basefa diga naninani. IpeꞋ ina laꞋifipama pikilaꞋ aeꞋ ma presen anama, owaꞋ. 19 EaꞋ nemaf anama epe eloma esis amam nematawa mondakolas, aeꞋ aꞋi iꞋi basefa amef bandami wenifim biefima okom aeꞋanai ihiꞋamba esisa sogawam. EaꞋ iꞋi aeꞋ iꞋipasa basefa amef laumi motaga hihif siꞋi 10,000 peleima anona diga naꞋiami, eaꞋ hapaimi, falafumi atom.

20 IpeꞋ alupipei, ipeꞋ ina pepe ukup motamea siꞋi awasi, hapaimi. Waf aonai, ipeꞋ ukup boꞋom motamea andeandeꞋ ukup moseꞋepam siꞋi awasi. EaꞋ nomonas ipeꞋimi motaga siꞋi epes dembesi. 21 Anom basefa miꞋuli Godi mail buk maꞋi,

“Dembinai naꞋi, anona nemaf AeꞋ endaꞋ enis epes anona wambota saꞋi anona diga efelas siꞋipasa basef aeꞋami epes isima aeꞋasi, eaꞋ esis ina nambimb sila basef amama, owaꞋ.”
22 DeiꞋ mogawa presen anama paꞋi basefa diga naninani, anama ina ikwaf God nandaꞋana esis sombaleꞋefanai, owaꞋ. Anan nandaꞋana epes isima owaꞋ sombaleꞋefanai. EaꞋ presen anama Ambal BuꞋunai Godi nafelepa pawalapa basef ananimi siꞋi profet, anama ina ikwaf God naseꞋasana epes isima owaꞋ seambaleꞋefanai, owaꞋ. Anama ikwaf isima sembaleꞋefanai etis.

23 EaꞋ iꞋi esis amam nematawa Godi hiesi sondowaꞋanima etifigin ama ipeꞋ hipei piꞋi basefa diga naninani ma enis epes owaꞋ sefaꞋ presen anama o enis owaꞋ seambaleꞋefa Kraisi sifiꞋi sope solomepa, siꞋi, “IpeꞋ pahaga pagaoli.”

24 EaꞋ iꞋi Ambal BuꞋunai Godi nefela ipeꞋ hipei ma pewalapa basef Godi siꞋi profet eaꞋ enin epen owaꞋ nembaleꞋefa Kraisi o owaꞋ negawa basef Godi andeandeꞋi nifiꞋi niwis, basef ipeꞋ hipei atuwasi moha okom epen inima eaꞋ moha opaf ananinai ma maina waf napaini. 25 Basef hiami mape mandambahoꞋ okom ananinai, amama atuwasi motaga mondawalap alihima enin nifiꞋi nindiwa nembawa nitimaloꞋ nefela agel Godi nowalapa basef naꞋama niꞋi, “Endilisi, God nape nalomepa.”

Waf sandaꞋ lotuwanai notaga andeandeꞋ

26 IpeꞋ alupipei, deiꞋ basef amama akutaimi aeꞋami mape naꞋama. Nemaf anama pendowaꞋanima, presen anama hianai Ambal BuꞋunai Godi nasiꞋipanai napoma ipeꞋ hipei naꞋama. Enin epen nendaꞋ anona awaf, enin epen niꞋi anom basef Godi niwalipipa, enin epen God naseꞋana anom basefa nowalapam, eaꞋ enin epen negawa ma niꞋi anona diga, eaꞋ enin epen negawa ma nemboma basef ma diga anama. IpeꞋ pendaꞋ amamaga amama hiami ma pigiambama esis amam nematawa Godi sotaga laꞋifis. 27 IꞋi enis ukup mohafela siꞋi basefa anona diga, bias o wenis siꞋi basef atona etin. EaꞋ maꞋum amama. EaꞋ ina sokolasa malogof siꞋi, owaꞋ. SiꞋiam atona etin. Amama eaꞋ maꞋum. EaꞋ enin epen atitin nemboma basef amama. 28 EaꞋ iꞋi owaꞋ enin epena nembomam, epen inima naꞋi nieꞋi basefa anona diga fesoꞋman nepan ma basef amama maina nemaf sandaꞋ lotuanai. Atuwasi enin etin niꞋiam neloma God.

29 EaꞋ amam profet biam o wanom Ambal BuꞋunai Godi nafelama mowalapa basef Ananimi, amam mowalapam. EaꞋ anom amam mowaloga basef amama. 30 IꞋi enin epen tol nepe lotu nemeꞋ basefa God nihiꞋamban anom basefa epen inima, aman anama naliꞋ naitu nawalapa basefi fesoꞋmona nope. 31 IpeꞋ hipei Ambal Godi nafelepa pawalapa basef Godi siꞋi profet, ipeꞋ pewalapam atona etin piꞋiam deindeiꞋ ma epes hiesi semeꞋam okokomama mondaꞋas sotaga laꞋifis. 32 Emi egafis sofaꞋ presen anama Ambal Godi nafelasa sowalapa basef ananimi siꞋi profet, sumafi presen anama andeandeꞋ. 33 DeiꞋ main, God ina ofagenama saꞋi basef mamumami, owaꞋ. Anan nandaꞋ waf buꞋunai opalef etifim mape awanem.

Wambel hiagoma esis amam nematawa Godi sondowaꞋanima sape,
34 awau nematawa ina witu wiꞋi basef, owaꞋ. Awo fesoꞋmawa ope etin. Sios amam nematawa Godi waf eaꞋ anama atona. Nematawa ina ope uliꞋma sios, owaꞋ. Ope owin siꞋi miꞋuli Godi naꞋiam. 35 IꞋi awo wiꞋi ogawa anom basef ofagema, atuwasi ofeꞋma ifagw awaumi ohaliꞋ wauhupawa miꞋipawa. IꞋi anoꞋw nemataꞋw kondaꞋ basef ipeꞋ sios pandakolas, waf anama ina andeandeꞋ.

36 DeiꞋ aꞋi ihaliꞋipa. IpeꞋ ofagepama basef Godi? IpeꞋ etipa pefaꞋ basef Godi eaꞋ enis amam nematawa owaꞋ? OwaꞋetin. 37 IꞋi emi egafis ukup miꞋi Ambal BuꞋunai Godi nafelasa sawalapa basef Godi siꞋi profet, o siꞋi esis sefaꞋ anona presen buꞋunai, esis sogawa basef amama deiꞋ andaꞋmepami, amama miꞋuli Dembinai. 38 IꞋi esis sindaiwaꞋma basef amama, ipeꞋ wapotiꞋ pindaiwaꞋma esis.

39 IpeꞋ alupipei aeꞋipei, ukup ipeꞋimi mohafel endilisi ma Ambal Godi nefelepa pewalapa basef ananimi siꞋi profet. EaꞋ ipeꞋ ina pesopama eafa pieꞋi basefa diga naninani, owaꞋ. 40 Nemaf anama ipeꞋ amam nematawa pendowaꞋanima pendaꞋ lotu, ipeꞋ pendaꞋ maol andeandeꞋma lotu ipeꞋinai notaga boꞋona.

Copyright information for `AOJFILIFITA