1 Corinthians 16

Otamba magiambama amam nematawa Godi

DeiꞋ aeꞋ anom basefa otamba ipeꞋ paꞋi pekolasoma pesoꞋ esis amam nematawa Godi. AeꞋ aliꞋ ihiꞋambas eaf sondaꞋ maol anama ma esis Kristen Galesiaisi sandakolas deindeiꞋ eaꞋ deiꞋ aꞋi ipeꞋ pendaꞋam naꞋama etin. Sande nimeguf hiami ipeꞋ hipei atona etin ukup miꞋi otamba pefaꞋama wik naliꞋi eaꞋ pewaloga otamba amama pembeꞋam dendeꞋ ma ipeꞋ pefaꞋam moꞋoh dei pimafiam ifagw ipeꞋimi. Ama anona nemaf ipeꞋ ina pendaꞋ maol luꞋunai pegolopa otamba, owaꞋ. Anona nemaf aeꞋ etagamepa, ipeꞋ pendandepa anom amama mofaꞋ otamba amama mofeꞋ Jerusalem. Ama aeꞋ iꞋipama basef amoma mofaꞋam esapaꞋam mefeꞋ. IꞋi andeandeꞋma efeꞋ wapotiꞋ, amam mofeꞋ molome.

Pol naꞋi nefeꞋ niti esis Korin

Anona nemaf aeꞋ efoꞋo iliꞋ ewala etap hiagoma Masedonia, eaꞋ efoꞋo etagamepa. DeiꞋ main, aeꞋ okom naꞋi ataꞋ iliꞋ ewala etap hiagoma Masedonia efeꞋ. AeꞋ okom naꞋi ataꞋ epe anom nimeguf elomepa. AeꞋ ina egawa, epe elomepa nimeguf maꞋum nogota naoh mohafel luꞋum eaꞋ efeꞋ maina wambel, ipeꞋ pigiambame pimafi ma amamaga, pitumi pehapone eaf. IpeꞋ pegawa aeꞋ andaiwaꞋma efoꞋo itilipa nogota bandana, owaꞋ. IꞋi Dembinai niꞋiam naꞋama, aꞋi epe anom nimeguf elomepa. EaꞋ aeꞋ aꞋi epe naꞋae Efesus efeꞋ etagama nemaf anama Pentikos.

DeiꞋ main, God nausiꞋame eaf nagal alihina ma endaꞋ maol buꞋunai eloma amam nematawa hiesi samboma opalef sembaleꞋefa God endilisi. EaꞋ hiesi sandaiwaꞋma sondaꞋ maol anama.

10 IꞋi Timoti nofoꞋo notagamaepa, ipeꞋ pimafiana andeandeꞋ ma anan nope opaf boꞋona laꞋafena ipeꞋ. DeiꞋ main, anan nape nandaꞋ maol Dembinai siꞋi aeꞋ ape andaꞋana. 11 NaꞋama enin epen okom niꞋi Timoti falafunai neseꞋana alafuga, naꞋama owaꞋ. IpeꞋ pendaꞋ opaf ananinai nope awanena peseꞋana amamaga pigiambamana pitumana pehaponana eaf ma opaf ananinai boꞋona nifiꞋmai aeꞋ. AeꞋ epe ehafana noloma enis alupusi.

12 Basef sahalomapa apeꞋinai Apolos mape naꞋama. Nimeguf hiami aꞋipana aꞋi anan ataꞋ nolomago anom alupumi ataꞋ mofoꞋo mitiago ipeꞋ, eaꞋ anan nandaiwaꞋ endilisi ma nofoꞋo deiꞋ. Nambimb anan niti Dembinai nondaꞋ eaf, anan nofoꞋo.

Basef akutaimi Pol naꞋiami

13 IpeꞋ pindumafuma andeandeꞋ pitu laꞋifipa pembaleꞋefa Krais. IpeꞋ ina umbamehepa, owaꞋ. Pitu laꞋifipa. 14 Amamaga hiami ipeꞋ pendaꞋami, ipeꞋ ukup mimila God noloma epes hiesi.

15 IpeꞋ pegawa wambota Stefanasi saliꞋ sataga Kristen saliꞋma esis Grik hiesi. EaꞋ esis ukup maꞋimaꞋi endilisi laꞋelaꞋefa sandaꞋ maol sagiambama epes Godi. Alupipei, aeꞋ aꞋipipa basef laꞋifimi 16 pepe owina epes isima soloma emi egafis sandaoꞋoma sandaꞋ maol anama. 17 DeiꞋ aeꞋ endanifel ma Stefanas naloma Fortunatus maloma Akaikus amam mafiꞋmai aeꞋ. DeiꞋ main, ipeꞋ ina nambimb laꞋifipama pifiꞋi naꞋae, owaꞋ. Amam deiꞋ migiambame mahoꞋofepa mafiꞋmai aeꞋ. 18 Amam mandaꞋ opaf aeꞋanai nape boꞋona magiambame ataga laꞋifiwi eaꞋ magiambama ipeꞋ wapotiꞋ. EaꞋ andeandeꞋma ipeꞋ pefela agof amam naꞋamaimi.

19 EaꞋ amam nematawa Godi sape deindeiꞋ etap anama hiagoma Esia sandaꞋmepago nemaf buꞋunai. Akwila naloma Prisila saloma esis amam nematawa Godi sandakolas etifigin ipat asasinai, esis wapotiꞋ sandaꞋmepago nemaf buꞋunai endilisi ma agel Dembinai. 20 Alupusi hiesi sape naꞋae sandaꞋmepago nemaf buꞋunai ipeꞋ. Waf amam nematawa Godi, ipeꞋ hipei atona etin peseꞋama lagof etin pelomago sahin owan ipeꞋisi.

21 DeiꞋ aeꞋ Pol ahapila pen lagel aeꞋanai atona andaꞋmepago basef amama bandami atom. AeꞋ andaꞋmepago nemaf buꞋunai ipeꞋ.

22 IꞋi emi egafis sendaiwaꞋma sosoꞋ opalefa esis Dembinai, okom aeꞋanai aꞋi anona nemaf God nohambombagago epes isima hegililas.

Dembinai apeꞋinai, aeꞋ okom nohafel endilisi aꞋi ineꞋ fiꞋi.
23 AeꞋ aꞋi okom Dembinai Jisasi nainaila ipeꞋ nigiambamepa naꞋa nope nolomago ipeꞋ nondaꞋepa petaga laꞋifipa.

24 AeꞋ aꞋi okom luꞋunai aeꞋanai nainaila ipeꞋi nefeꞋmago ipeꞋ hipei palome mape laꞋifipa paloma Krais Jisas.

Copyright information for `AOJFILIFITA