## Amam mandaꞋ maol siosi amama mandaꞋ maol Godi

Alupipei, fowaꞋ aeꞋ ina aꞋipipa basef siꞋi aꞋipasam epes isima saila okom Ambal BuꞋunai Godi, owaꞋ. AꞋipipam siꞋi aꞋipasam epes isima ukup masoꞋasa basef ofagema Godi, siꞋi awasi ataꞋ saꞋ nomagof atomi. FowaꞋ aseꞋepa nomagof atom. Ina deiꞋ aseꞋepa gwaꞋaimi laꞋifimi, ataꞋ owaꞋ. DeiꞋ main, ipeꞋ ina laꞋifipa, ataꞋ owaꞋ. AeꞋ aꞋiam endilisi, ipeꞋ deiꞋ wapotiꞋ ataꞋ owaꞋ. DeiꞋ main, ipeꞋ ataꞋ pape laꞋelaꞋef paila waf etapanai. Endilisi, waf anama nawalapai waf kowalasanai naloma ukup aoma sahin owan ma basef safitapami ataꞋ mape laꞋelaꞋefa ipeꞋ. Amama mihiꞋamba apeꞋ hiapai ipeꞋ ataꞋ paila waf anama aonai etapanai. Waf anama epes etapesi atona. Enin epen naꞋi, “AeꞋ epen Poli.” Enin naꞋi, “AeꞋ epen Apolosi.” Waf anama nawalapa ipeꞋ ataꞋ pape siꞋi epes paila waf etapanai atona.

IpeꞋ ataꞋ ukup motamea andeandeꞋ. Apolos emi egafuna? AeꞋ Pol emi egafowe? AfaꞋ biafa wandaꞋ maoli atofa. Dembinai naseꞋafa maol nandandafa. EaꞋ maol anama afaꞋ biafa wandaꞋanai, eaf anama atona deiꞋ ipeꞋ pembaleꞋefa Krais. ApeꞋ hiapai mandaꞋ maol anama God nasiꞋipami. AeꞋ aliꞋ awalipipa basef Godi siꞋi ewaha olelemb gwaꞋaimi, eaꞋ Apolos nagiꞋ nakoloꞋ embel nasaꞋopam. EaꞋ God atotona nandaꞋam mataga. EaꞋ deiꞋ epen inima newaha olelemb gwaꞋaimi, enin agel aꞋana. EaꞋ epen nakoloꞋ embel nasaꞋopami enin wapotiꞋ agel aꞋana, eaꞋ God nandaꞋ gwaꞋaimi amama matagai, Anan nefaꞋ agel luꞋunai. EaꞋ epen inima newaha olelemb gwaꞋaimi naloma epen inima nakoloꞋ embel nasaꞋopami, esis bias sandaꞋ maol anama atona. EaꞋ esis bias atona etin anona nemaf sofaꞋ amamaga mandahama maol sandaꞋanai. AfaꞋ biafa wandaꞋ maol etifinama God. EaꞋ ipeꞋ siꞋi aof Ananinai. EaꞋ ipeꞋ siꞋi ipat Godi.

## Amam mandaꞋ maola siosi siꞋi mandaꞋ ifagwi

10 God nandahome. EaꞋ Anan nandaꞋ aeꞋ ataga ape siꞋi epen gawainai nandaꞋ ifagwi. EaꞋ awa olaf nape naliꞋi eaꞋ enis salaꞋ ipat natomana. EaꞋ epes hiesi atona etin sundumafuma andeandeꞋ solaꞋ ipat notoma olaf anama. 11 IpeꞋ pegawa God nandaꞋ Jisas Krais nape naliꞋ siꞋi olaf notawa naliꞋi. Amama atom ina ataꞋ enin epen laꞋifina newa anona olaf wapotiꞋ, owaꞋetin. 12 IꞋi emi egafis siꞋi solaꞋ ipat notoma olaf anama ilifi solaꞋana, esis sondaꞋ gol solaꞋana o sondaꞋ siliwa solaꞋana, o sondaꞋ anom otamba salatamami solaꞋana, o sondaꞋ lawah o sondaꞋ walol o otalef alimi solaꞋana. 13 Nemaf anama Krais niefiꞋianai maol anama epes hiesi sandaꞋanai notaga nondawalap alihina nope boꞋona o aona. Nemaf anama notaga noloma nif luꞋwami. EaꞋ nif amama mondo maol anama hianai ma epes hiesi atona etin hiꞋilasa sogawa maol asasinai boꞋona o aona. 14 IꞋi enin epen nolaꞋ ipat notoma olaf anama ilifi ma nif owaꞋ fendona, anona nemaf nefaꞋ anom amamaga buꞋwami. 15 EaꞋ iꞋi ipat epen nandaꞋ maoli fendona hiꞋilana, anona nemaf ina nefaꞋ amamaga buꞋwami, owaꞋ. Endilisi God nofaꞋana notanimani, eaꞋ amamaga aꞋana nepe naꞋa siꞋi epen netanima nandaloꞋ nifi.

## Sios amam nematawa Godi siꞋi ipat luꞋunai Ananinai

16 IpeꞋ pegawa o owaꞋ? IpeꞋ etipa siꞋi ipat luꞋunai Godi, eaꞋ Ambal BuꞋunai Ananinai nape nomona opalef ipeꞋimi. 17 IꞋi emi egafis sohambombaga ipat anama Godi, anona nemaf God nohambombaga epes isima. DeiꞋ main, ipat anama Ananinai boꞋona andeandeꞋ. Anama eaꞋ ipeꞋ etipa.

## ApeꞋ ina mefela agof epesi, owaꞋ

18 NaꞋama ipeꞋ pembasoꞋma ipeꞋ etipa. IꞋi emi egalin ipeꞋinai okom niꞋi enin gawaini siꞋi epes etapasi sofalasi, epen inima andeandeꞋma nemboma okom ananinai ataꞋ netaga okom nahaga nagaolani niliꞋ ma nambimb netaga epen gawaini endilisi. 19 DeiꞋ main, gawa etapanai anama falafunai siꞋi basef epes ukup masoꞋasi saꞋiami ma naep Godi. SiꞋi Baibel naꞋiam naꞋi, “God nofaꞋ epes gawaisi ma waf gawainai naninani asasinai atona basoꞋomainai siꞋi epes saha mafis esalef.”

20 EaꞋ Baibel naꞋiam wapotiꞋ naꞋama naꞋi, “Dembinai nogawa nomonas epes gawaisi falafumi atom.”

21 EaꞋ enin epen ina nefela agof apeꞋ epesi, owaꞋ. Amamaga hiami ipeꞋimi atom. 22 Pol naloma Apolos naloma Pita, amam ipeꞋimi atom. Etap anaeꞋ naloma ambal namunai naloma gaꞋ naloma amamaga deiꞋ mapani, anona nemaf migiꞋ meatagai, amama hiami ipeꞋimi atom. 23 EaꞋ ipeꞋ epes Krais Jisasi eaꞋ Anan Godi.