1 Corinthians 4

Anona nemaf Dembinai atona nowaloga amam mandaꞋ maol Ananinai

IpeꞋ pegawa afaꞋ wandaꞋ maol Kraisi umafi basef endilisimi Godi fowaꞋ mape mandambahiꞋi deiꞋ mataga mandawalap alihim. IꞋi aman dembinai noseꞋana maol enin epena nimafianai, enin nimafiana nendaꞋana andeandeꞋ hiꞋilana. IꞋi ipeꞋ pewaloga waf aeꞋanai ma enis epes sondaꞋme kot sowaloga waf aeꞋanai, aeꞋ okom naꞋi amama falafumi atom. AeꞋ wapotiꞋ aeꞋ atowe ina awaloga waf aeꞋanai, owaꞋ. Endilisi, basef mape opaf aeꞋanai nomon maꞋiami aeꞋ ina ati anona waf aonai andaꞋanai, owaꞋ. EaꞋ amama ina mihiꞋambe endilisi ma iꞋi, “AeꞋ epen buꞋuwei andeandeꞋ,” owaꞋ. Anona nemaf Dembinai atona nowaloga waf aeꞋanai. EaꞋ deiꞋ nogota dendeꞋanai ataꞋ owaꞋ. IpeꞋ owaꞋ pewaloga waf enin epen nandaꞋanai, owaꞋ. IpeꞋ ataꞋ pepe pehafa nemaf anama Dembinai niefiꞋianai. Nemaf anama anan nowalapai amamaga hiami mandamabahoꞋ mape akoti motaga mondawalap howalagoma. Nemaf anama Anan nowalapa ukup epes hiesi mape mandambahiꞋi motaga mondawalap alihim. EaꞋ God niꞋipapa basef ananimi apeꞋ hiapai atona etin mondahama maol apeꞋ mandaꞋanai, boꞋona o aona.

Esis Korin safela agof asasimi atom

Alupipei, aeꞋ okom naꞋi igiambamepa. Amama atom aeꞋ aloma Apolos wihiꞋambepa basef amama doꞋok aꞋipipami ofagema ma waf afaꞋinai. AfaꞋ wandaꞋam naꞋama ma ipeꞋ pelafa waf apeꞋinai basef amama ofagema maꞋiam maꞋi, “IpeꞋ ina pimbisilaꞋ miꞋuli anama, owaꞋ.”

EaꞋ deiꞋ ipeꞋ ina pesambala basef pefela agola anona aman, owaꞋ.
Alupipei, ipeꞋ ukup mape maꞋimama? Emi nandaꞋepa pape dembipei pikilaꞋ enis epes? Amamaga amama hiami God atona naseꞋepam. EaꞋ ipeꞋ ina pesambala basef piꞋi ipeꞋ etipa dembipei laꞋifipei, owaꞋ. Amamaga amama hiami ipeꞋimi, God atona naseꞋepam.

Endilisi, opalef ipeꞋimi siꞋim eaꞋ! IpeꞋ amamaga hiamipei siꞋipa dendeꞋ! IpeꞋ pikilaꞋafa pataga dembipei king! Uwahipipa! AeꞋ okom naꞋi endilisi ma petaga pepe dembipei king nambimb ope dembifai king olomepa! AeꞋ okom naꞋi naꞋama aꞋi God nandaꞋ afaꞋ aposel siꞋi epes sape agof aꞋasi sagiꞋ endilisi. Epes hiesi hiꞋalas sape ilif etapi saloma amam ensel wapotiꞋ satolofa wandahama epes isima atuwasi sohas seagaꞋi. 10 AfaꞋ wape siꞋi epes ukup masoꞋasi ma ofela agel Kraisi, eaꞋ ipeꞋ pape epes gawaipei ma waf Ananinai. AfaꞋ owaꞋ laꞋififa, eaꞋ ipeꞋ laꞋifipa. IpeꞋ agof luꞋwami, afaꞋ agof aꞋafa. 11 FowaꞋ gani wapotiꞋ nafiꞋi nataga nogota anaeꞋ wape nolomahafa batag fafatimufa endilisi, eaꞋ luwaguf hiahaom aꞋafa. Esis sumagwi lagof sahafa etin. AfaꞋ wambel aꞋafa ma ofeꞋ weape andeandeꞋ. 12 WandaꞋ maol luꞋunai endilisi ma lagof afaꞋimi atom. Esis saꞋi basef sandaꞋafa findiwafa eaꞋ afaꞋ laꞋififa ofaloꞋmas wagwamasa basef buꞋwami atom. Esis sandaꞋafa aofa, wape laꞋififa watilis, afaꞋ ina wagwamas, owaꞋ. 13 Esis saꞋipafa basef awami endilisi eaꞋ afaꞋ wagwamasa basef awanemi saꞋosaꞋombel. Wataga siꞋi alufuta awasimi endilisi ma etap hiagoma siꞋi alogw maimailami, siꞋi etap awagoma alufuta nanaꞋoma. FowaꞋ gani wape naꞋama etin wafiꞋi wataga deiꞋ.

Pol naꞋipa esis Korin naꞋi, “Pila waf aeꞋanai.”

14 AeꞋ ina andaꞋ basef amama ma mondaꞋepa ambagof ipeꞋimi aom, owaꞋ. AeꞋ okom nainailipa siꞋi awasi aeꞋipei, aꞋi iwalapa nomonas ipeꞋimi. 15 IꞋi endilisi ipeꞋ amam mowalipipa basef Kraisi 10,000-peleim eaꞋ hapaimi, ahapepa ipeꞋimi ina hiam, owaꞋ. Waf Krais Jisasi atona aeꞋ atowe ape ahalomepa ipeꞋiwei, ipeꞋ pataga batawisi aeꞋipei ma basef buꞋwami Godi awalipipami. 16 Amama atom deiꞋ afela ukup ipeꞋimi ma pila waf aeꞋanai pefeꞋ. 17 EaꞋ asapaꞋ Timoti nafeꞋmago ipeꞋ. Anan nogalome aeꞋanai wandaꞋ maol Dembinai. Anan numafi maol anama andeandeꞋ. AeꞋ okom nailana endilisi, deiꞋ asapaꞋana ma nambimb nefela ukup ipeꞋimi ma basef mihiꞋambepa feꞋ pe aeꞋami aila waf Kraisi. AeꞋ awalipa esis amam nematawa Godi sape wambel anama hiagoma ma basef maloma waf aeꞋanai eaꞋ amama atom.

18 IpeꞋ enipa ukup maꞋi aeꞋ nambimb ina efoꞋo itilipa eaꞋ deiꞋ pesambala basef aeꞋami. 19 OwaꞋetin. IꞋi Dembinai niꞋi aꞋe, naꞋama efeꞋmago ipeꞋ mehip. EaꞋ aeꞋ ina efeꞋmago ipeꞋma egawa basef amam masambala basef aeꞋami maꞋiami atom, owaꞋ. Basef amamumi hapaimi. AeꞋ aꞋi efoꞋo egawa waf naloma maina maol Godi amam mandaꞋanai. 20 DeiꞋ main, ofagema amama ma epes isima suwis wambota Godi numafias, amama ina amamaga maꞋiam etin, owaꞋ. Amama ina basef atom, owaꞋ. Amama pepel Godi atona. 21 IpeꞋ ukup maꞋi maina waf, paꞋi efaꞋago bumbulita okom wandafunai efoꞋo ma ihiꞋambepa, o paꞋi efaꞋago waf okom nainailipa efeꞋmepago? Amama nomonas ipeꞋimi atom.

Copyright information for `AOJFILIFITA