1 Peter 3

Basefa amam maloma awau sandasoꞋamai

Basef amama maliꞋi maꞋi ipeꞋ pepe owina dembemi gavman moloma agufumi ipeꞋ pandaꞋ opeha amam. EaꞋ naꞋama etin ipeꞋ nematawa pasoꞋ amami pepe owina amam wauhupipa ipeꞋimi. IꞋi anom owaꞋ ataꞋ mila basef Godi, ipeꞋ pihiꞋambama waf buꞋunai atona laꞋelaꞋef. IpeꞋ ina piꞋipam anom basef, owaꞋ. EaꞋ pihiꞋambama miti waf buꞋunai ipeꞋ pandaꞋanai, ma amam mila basef Godi mombaleꞋefana. DeiꞋ main, amam anona nemaf miti ipeꞋ nematawa umbamahepa ma Goda pila waf buꞋunai atona pefeꞋ andeandeꞋ ma amam momboma opalefa God. IpeꞋ ina pendefaloꞋma sosaf naninani alop atopanai ma mondaꞋ ipeꞋ piti boꞋopa siꞋi pefaloꞋma balagah ipeꞋimi, owaꞋ. IpeꞋ ina pefaloꞋ endilisi sosaf atona wafinai siꞋi ombahigis maim buꞋwami o gol mondaꞋ gambigambis o luwaguf sosaf buꞋunai nailami ma hiesi sitilipa buꞋupei, owaꞋ. Hapaimi. Sosaf ipeꞋinai naꞋama, ipeꞋ pefaloꞋma opalef ipeꞋimi nomona ukup ipeꞋimi ma waf buꞋunai endilisinai. Sosaf anama ina anona nemaf aona, owaꞋ. Nope laꞋelaꞋef naꞋama. Opalef ipeꞋimi mope awanem eaꞋ ambagof ipeꞋimi mope andeandeꞋma waf soꞋumbilinai. Sosaf anama buꞋunai endilisi ma naep Godi. Nematawa Godi fowaꞋiwai ombaleꞋefana wape waꞋi endilisi God anona nemaf nila basef ananimi andeandeꞋ. Sosaf awaunai naꞋama, wandaꞋ waf buꞋunai opalef nomon eaꞋ wafeꞋ owina wauhupawa awaumi. Sara kwandaꞋam naꞋama etin. AkwaꞋw kombaleꞋefa aman akwaꞋunai Abraham eaꞋ kofalana kwaꞋi Dembinai akwaꞋunai. IꞋi ipeꞋ pendaꞋ waf buꞋunai ma owaꞋ umbamehepama amamaga maim miꞋi meatagamepei, ipeꞋ deiꞋ ehamawa akoꞋuwai.

IpeꞋ amam wauhupawa wapotiꞋ pimafiawa ma gawa buꞋunai, ukup mopoma alop awaunai ina laꞋifina, owaꞋ. IpeꞋ pendaꞋawa andeandeꞋ pefela agof awaumi. DeiꞋ main, awau wapotiꞋ deiꞋ walomepa ofaꞋ ambal namunai God noseꞋepana. IpeꞋ pendaꞋmawam naꞋama ma ina anom amamaga miliꞋakwa beten ipeꞋinai, owaꞋ.

ApeꞋ mope opalef etifim

Basef amama motambel naꞋama. IpeꞋ hipei pepe opalef etifim eaꞋ ukup mimila sahin owan ipeꞋisi. IpeꞋ ina pegwa waf aonai, owaꞋ. IꞋi esis siꞋipipa basef findiwaimi, ipeꞋ ina pegwamasam, owaꞋ. IꞋi esis sondaꞋmepa waf aonai, ipeꞋ pegwamas pendaꞋmas waf buꞋunai atona piꞋipas basef buꞋwami ma God nofaloꞋmas. DeiꞋ main, God nofalepa ma pefaꞋ amamaga buꞋwami anona nemaf nofaloꞋmepa. 10 SiꞋi basef Godi mail Buk Baibeli maꞋiam naꞋama maꞋi,

“Emi egafis siꞋi sendanifela Ambal namunai ma ukup miꞋi siti nemaf buꞋunai, esis simafi basef niliꞋakwa malogof asasimi andeandeꞋ ma ina siꞋi basef basoꞋmaimi.
11 Esis sondamboma sofaꞋma waf aonai, eaꞋ sondaꞋ waf buꞋunai atona. EaꞋ esis ukup mila opalef mope awanem moloma God noloma epes eaꞋ sondaꞋ waf anama nefeꞋ nepe laꞋifina. 12 DeiꞋ main, Dembinai anan nape naep maila epes isima sope andeandeꞋ ma waf buꞋunai eaꞋ numafias andeandeꞋ. LaꞋelaꞋef Anan nemeꞋ beten asasinai, eaꞋ isima sandaꞋ waf aonai Anan nandaꞋ okom wandafuna.”

IpeꞋ pefaꞋ nimanimi ma maol buꞋunai ipeꞋ pandaꞋanai

13 IꞋi ipeꞋ ukup mimila endilisi ma pendaꞋ waf buꞋunai atona, ina enin epen laꞋifina nendaꞋmepa waf aonai nehambombagepa, owaꞋ. 14 IꞋi ipeꞋ pefaꞋ nimanimi ma waf buꞋunai ipeꞋ pandaꞋanai, ipeꞋ pendanifel endilisi. IpeꞋ ina umbamehepama epes eaꞋ ina ukup aom, owaꞋ. 15 IpeꞋ ukup mopoma Krais atona nope Dembinai andeandeꞋma opalef ipeꞋimi pendaꞋ lotumana. EaꞋ pendandombam pepe laꞋelaꞋef ma pewalapa basef ofagema alihim pegwamasam emi egafis sohaliꞋipamami ma amamaga buꞋwami pape pehafami. 16 EaꞋ ipeꞋ pegwamasam peloma opalef awanemi eaꞋ pendaꞋas andeandeꞋ pinifelis. IpeꞋ pendaꞋ waf buꞋunai ma basef mape opalef nomoni maꞋiami maꞋipipa basef mihiꞋambepa waf ipeꞋinai ina aona, owaꞋ. PendaꞋam naꞋama ma esis siꞋipipa basef awami ma pe buꞋunai paila Kraisi ma esis ambagof aoma basef amama awami esis saꞋipipami. 17 DeiꞋ main, andeandeꞋma ipeꞋ pefaꞋ nimanimi ma waf buꞋunai. Amama mikilaꞋ wafa pefaꞋ nimanimi ma waf aonai ipeꞋ pandaꞋanai. IꞋi okom Godi niꞋi ipeꞋ pefaꞋ nimanimi amama ma waf buꞋunai, andeandeꞋ.

Krais nagaꞋ eaꞋ ma nakwaha waf aonai apeꞋ mandaꞋanai

18 IpeꞋ ukup mopoma Krais anan nagaꞋ nemaf atotona nakwaha waf aonai ipeꞋ pandaꞋanai eaꞋ amama maꞋum. Aman atotona buꞋunai nagaꞋ ma nagiambama epes hiesi sandaꞋ waf aonai ma nofaꞋas sefeꞋma God. Alop ananinai, sahana nagaꞋ. EaꞋ ambal ananinai, nohafel nape namona. 19 Ambal ananinai atona nafeꞋ nawalapa basefa ambagof amama sowaꞋam laꞋifim mape, epes isima 20 fowaꞋ sosambala basef Godi. Anan nanindifa okom nape nohafa nemaf anama Noa nandaꞋ sipanai. Sip anama epes kwaieꞋwis sawis sape andeandeꞋ, 8-peleis ina sagaꞋ ma embel luꞋwami, owaꞋ. 21 Embel amama luꞋwami mondolaꞋwifa sofaꞋ baptais migiambamepa pepe andeandeꞋ. Amama ina masaꞋopa alogwa alop atona andeꞋ, owaꞋ. Amama anom basef endilisi laꞋifimi apeꞋ maꞋiam maloma God, amama mataga mape opalef nomoni boꞋom andeandeꞋ. Amama mofaꞋepa petanimani ma pepel anama atona Jisas Krais notanima nohafel. 22 Anan nafeꞋ nalata ilif otaga nape waꞋol lagel daꞋisinai Godi. EaꞋ amam ensel hiami maloma agufumi mumafi ilifi mape owina Anan atona.

Copyright information for `AOJFILIFITA